Read Iban Daniel 11 Bible Online

Daniel 11 - Iban bible

Daniel 11

¹Iya nya [20] meh melikat ke nulung sereta nyaga aku.

²Lalu utai ti deka dipadahka aku ngagai nuan nya utai ti amat.” Ku melikat nya bejaku, “Tiga iku agi raja deka megai perintah di menua Persia, lalu ditangkanka raja ti keempat, ti deka nyadi kaya agi ari semua sida ti bukai. Lebuh iya udah nyadi kering laban pengaya iya, iya deka nyakap perintah menua Gerika.

³“Udah nya siku raja ti berani deka pegari. Iya deka merintah sebuah menua ti besai, lalu iya deka ngereja utai nitihka peneka ati iya.

⁴Tang lebuh kuasa iya nyau besai amat, menua ti diperintah iya deka pechah lalu dibagi empat. Bala raja ke ukai ari peturun iya deka merintah nganti iya, tang sida nya enda bekuasa baka iya.

⁵“Raja menua Ejip deka nyadi kering. Tang siku ari tuai soldadu iya deka nyadi kering agi, lalu megai perintah di menua ti besai agi.

⁶Nyau berapa taun udah bekau nya, raja menua Ejip deka beserakup enggau raja menua Siria, lalu ngasuh anak indu iya jadi enggau raja menua Siria. Tang penyerakup seduai nya enda tan lama, lalu anak indu raja menua Ejip nya, laki iya, anak iya,[21] enggau bala ulun ke sama bejalai enggau iya, deka dibunuh magang.

⁷Enda lama udah bekau nya, siku ari kaban belayan indu nya deka nyadi raja. Orang nya deka nyerang bala soldadu raja menua Siria, tama ngagai kuta sida, lalu ngalahka sida.

⁸Orang nya deka mai pulai baru ngagai menua Ejip engkeramba petara sida enggau perengka emas enggau pirak ti udah diserahka ngagai bala petara nya. Lebuh menua nya udah bebaik dua tiga taun

⁹raja menua Siria deka nyerang menua Ejip, tang iya deka dipejalka nyurutka diri.

¹⁰“Bala anak lelaki raja menua Siria deka nyendiaka diri beperang, lalu ngempuruka mayuh bala soldadu. Siku ari bala anak raja nya deka ngalun baka ai bah, lalu nyerang kuta munsuh.

¹¹Raja menua Ejip deka ringat, lalu beperang ngelaban raja menua Siria, lalu nangkap bala soldadu raja menua Siria.

¹²Raja menua Ejip deka temegahka diri ke menang, sereta temegahka pemayuh bala soldadu ti udah dibunuh iya, tang iya enda menang belama.

¹³“Raja menua Siria deka pulai baru, lalu ngempuruka mayuh agi bala soldadu ari ti dulu. Ba maya ti ngena, iya deka datai baru mai bala soldadu ti mayuh bendar, ti chukup disikap enggau senyata.

¹⁴Nya baru mayuh orang deka angkat ngelaban raja menua Ejip. Lalu sekeda orang ke mangah ari bansa nuan empu, Daniel, deka angkat ngelaban ketegal genera ti udah dipeda sida, tang sida deka alah.

¹⁵Raja menua Siria deka ngelulung nengeri ti bekuta nya, lalu ngalahka nengeri nya. Bala soldadu menua Ejip lalu enggai agi ngelaban. Indah soldadu sida ke pemadu kering, deh nadai pengering agi.

¹⁶Orang Siria ke nyerang nya deka merinsaka sida enggau sepeneka ati sida, lalu nadai orang tan ngelaban iya. Iya deka bediri di Menua Ti Udah Disemaya, lalu merintah menua nya.

¹⁷“Raja menua Siria deka bekira nyerang ngena semua bala soldadu iya. Udah nya, ngambika iya ulih ngerusak menua munsuh, iya deka beserakup enggau munsuh nya, lalu ngasuh anak indu iya [22] jadi enggau munsuh nya. Tang pelan iya enda mujur.

¹⁸Udah bekau nya, raja menua Siria deka nyerang mayuh bengkah bansa ti ba tebing tasik, lalu ngalahka sida. Tang siku tuai orang menua bukai deka ngalahka iya, lalu madamka penyumbung iya. Tuai nya deka mutarka penyumbung raja Siria kena iya malas penyumbung raja nya empu.[23]

¹⁹Raja nya deka pulai baru ngagai kuta di menua iya empu, tang iya deka alah laban munsuh, lalu nya meh pengujung iya.

²⁰“Iya deka ditangkanka siku agi raja, ti deka ngasuh siku pemesai nekanka pengidup orang mayuh lalu mejalka sida mayar chukai, kena iya nambahka pengaya menua ti diperintah iya. Enda lama udah bekau nya iya deka dibunuh, tang ukai di mua orang mayuh, lalu ukai lebuh maya perang.”

²¹Melikat nya lalu majak meri penerang: “Raja menua Siria ti deka nangkanka iya, nya orang ke jai lalu enda patut nyadi raja, tang iya deka datai lalu ngerampas kuasa ngena jalai tipu.

²²Barang sapa ngelaban iya, nyengkaum Imam Besai Allah Taala, deka dibuai lalu dibunuh.

²³Iya deka nyain sempekat enggau mayuh bengkah bansa bukai, lalu nipu sida, lalu iya deka mansang kering-sekering, taja pen iya megai perintah di menua ti mit.

²⁴Iya deka nyerang enggau ngenyit sitak menua ti kaya, lalu deka ngereja utai ti enda kala dikereja bala aki ini iya. Udah nya iya deka magi ngagai bala orang ke nitihka iya, barang enggau reta tengkira ti udah dirampas iya lebuh beperang. Iya deka bekira nyerang mayuh bengkah kuta, tang timpuh iya nyau deka abis enda lama da agi.

²⁵“Enggau ati ti berani iya deka ngempuruka mayuh bala soldadu kena iya nyerang raja menua Ejip ke sedia deka ngelaban iya ngena bala soldadu ti mayuh sereta kering. Tang raja menua Ejip deka kena tipu, lalu iya enda ulih mujur.

²⁶Bala penyanding penemu ti nyempil enggau iya, deka ngerusak iya. Bala soldadu iya deka lus dibunuh.

²⁷Udah nya raja dua iku nya deka duduk begulai makai ba siti mija, tang juluk ati seduai iya jai, lalu seduai iya deka ngemulaka pangan diri. Seduai iya nadai bulih utai ti dikinginka seduai iya, laban timpuh utai nya apin datai.

²⁸Raja menua Siria deka pulai baru ngagai menua iya empu mai semua perapasan ti udah dirampas iya, lalu udah mutuska runding deka ngerusak agama bala nembiak Allah Taala. Iya deka ngereja utai nitihka peneka ati iya, lalu udah nya pulai baru ngagai menua iya empu.

²⁹“Udah bekau nya iya deka nyerang menua Ejip baru, tang sekali tu utai ti deka nyadi nya lain agi ari ti dulu.

³⁰ Orang bansa Rome deka datai ngena kapal lalu ngelaban iya, lalu iya deka takut. “Udah nya iya deka nikal, mai ati ti balat ringat, lalu nguji ngerusak agama bala nembiak Allah Taala, nitihka jaku lalau ari orang ke udah ngelengkaka agama nya.

³¹ Sekeda bala soldadu iya deka ngamahka Rumah Sembiang. Sida deka madamka pengawa ti beberika piring tiap hari, lalu nirika Utai Ti Balat Jai.[24]

³²Ngena jalai tipu, raja nya deka ngulihka sukung ari sida ke udah ngelengkaka agama sida, tang orang ke nitihka Allah Taala deka ngelaban sida.

³³Bala tuai ti bepenemu-dalam deka magi penemu-dalam ngagai mayuh orang bukai. Tang dalam berapa hari aja sekeda sida deka mati beperang, tauka mati ditunu, lalu sekeda deka dirumpak, lalu digaga nyadi orang tangkap.

³⁴Lebuh pengawa bebunuh nya benung nyadi, bala nembiak Allah Taala deka nerima tulung mimit, taja pen mayuh orang ke setanah enggau sida semina deka beserakup kena ngiga penguntung ke diri empu aja.

³⁵Sekeda bala tuai ti bepenemu-dalam deka dibunuh, tang pemati sida deka nuchi orang mayuh. Utai tu deka majak nyadi datai ke ujung, ba maya ti udah diletak Allah Taala.

³⁶ “Raja menua Siria deka ngereja utai nitihka peneka ati iya empu. Iya deka temegah madahka diri besai agi ari sebarang petara, kering agi ari Allah Taala ti Pemadu Tinggi. Iya ulih ngereja utai nya nyentuk ngagai maya Allah Taala deka ngukum iya. Allah Taala deka ngereja utai nitihka pelan Allah Taala empu.

³⁷Raja nya enggai ibuhka petara ti udah dipetuaika bala aki ini iya, enggau petara ti dikerinduka sida ke indu. Iya ti bendar, iya enggai ibuhka semua petara, laban iya ngumbai diri besai agi ari sida.

³⁸Tang iya deka ngemesaika petara ti nyaga kuta. Iya deka meri emas, pirak, batu ti berega, enggau pemeri bukai ti berega ngagai petara ti enda kala disembah aki ini iya.

³⁹Iya deka ngasuh orang ke nyembah petara orang bansa bukai, nyaga kuta iya. Iya deka meri basa ti besai ngagai sida ke nerima iya nyadi raja, meri sida pangkat ti tinggi, lalu meri sida tanah nyadika upah sida.

⁴⁰“Lebuh timpuh raja menua Siria nyau deka abis, raja menua Ejip deka nyerang iya, lalu raja menua Siria deka ngelaban ngena semua kuasa iya, ngena kerita perang, kuda, enggau berapa buah kapal. Iya deka nyerang mayuh bengkah menua, baka ai bah.

⁴¹Iya deka mega nyerang Menua Ti Udah Disemaya lalu munuh bepuluh ribu iku orang, tang menua Edom, Moap, enggau teda menua Amon, enda diserang.

⁴²Lebuh iya nyerang semua menua nya, iya enda ngalau menua Ejip.

⁴³Iya deka nabanka pengaya ti dilalaika ti digaga ari emas, pirak enggau utai bukai ti dikesayauka, ari menua Ejip. Iya deka ngalahka menua Libia enggau menua Etiopia.

⁴⁴Udah nya iya deka takut ninga berita ti datai ari timur enggau ari utara, lalu iya deka bebendar belaban, lalu munuh mayuh orang.

⁴⁵Iya deka nirika langkau kain diraja iya ti besai ba entara tasik enggau bukit ti kudus. Tang iya deka mati, nadai orang nulung.”