Read Iban Daniel 12 Bible Online

Daniel 12 - Iban bible

Daniel 12

¹ Ku melikat nya bejaku, “Lebuh maya nya ila, melikat Mikael, ke nyaga bala nuan, deka pegari. Udah nya penusah ti besai deka nyadi. Nadai penusah ti jai agi ari nya udah kala nyadi kenyau ari penumbuh bansa ti terubah menya. Lebuh maya nya ila, semua orang ari bansa nuan, ke bisi nama ditulis dalam bup Allah Taala, deka diidupka.

² Mayuh sida ke udah mati, deka idup baru. Sekeda deka idup belama iya, lalu sekeda deka dipechat belama iya.

³ Bala tuai ti bepenemu-dalam deka manchar baka penampak langit. Lalu sida ke udah ngajar orang ngereja utai ti ngena, deka manchar baka bintang belama iya.”

⁴ Ku iya bejaku enggau aku, “Nya alai, Daniel, tutup bup nya, lalu lekatka chop tambit ba iya nyentuk ngagai pengujung dunya. Ba jam ke diatu, mayuh orang deka masau jam nguji meratika utai ti nyadi.”

⁵Udah nya aku lalu tepedaka dua iku orang bediri ba tebing sungai, siku ba tebing seberai, lalu siku ba tebing seberai.

⁶Siku ari seduai nya nanya melikat ke bediri ari ulu iya, “Ni pengelama baru utai ti nyelai nya badu agi nyadi?”

⁷ Melikat nya lalu ngedarka jari iya kedua piak ke langit, lalu besumpah dalam nama Allah Taala ti idup belama iya, lalu aku ninga iya nyebut, “Pengelama iya tiga taun setengah. Lebuh bala nembiak Allah Taala badu agi diperinsa, nya meh maya semua utai tu badu agi nyadi.”

⁸Aku ninga utai ti disebut iya, tang aku enda meretika utai nya. Nya alai aku nanya, “Tang baka ni ku jalai semua utai tu deka badu agi nyadi, Tuan?”

⁹Ku iya nyaut, “Nuan enda tau enda mupuk diatu, Daniel, laban leka jaku tu resia sereta dilalaika nyentuk ngagai pengujung dunya.

¹⁰ Mayuh orang deka dituchi. Sida ke jai enda ulih mereti, tang deka majak nyadi orang ke jai. Semina sida ke bepenemu-dalam aja deka mereti.

¹¹ “Kenyau ari maya pengawa ngenjuk piring tiap hari nya dipadamka, reti nya, kenyau ari maya penatai Utai Ti Balat Jai [25] nya, 1,290 hari deka lempus.

¹²Beberekat meh orang ke mengkang tetap ati nyentuk ngagai 1,335 hari nya udah lempus!

¹³“Lalu nuan, Daniel, enda tau enda tetap ati nyentuk ke ujung. Udah bekau nya nuan deka mati, tang nuan deka angkat idup baru lalu nerima upah nuan ba pengujung dunya.”