Read Iban Daniel 2 Bible Online

Daniel 2 - Iban bible

Daniel 2

¹Kedua taun Nebukadnesar udah nyadi raja, iya bisi mimpi. Mimpi nya balat amat ngasuh ati iya irau, datai ke nyau enda ulih tinduk.

²Nya alai iya mesanka bala nembiak iya ke nemu betilitka nasit, orang ke tau keramat, sida dukun enggau sida manang, minta sida nerangka reti mimpi nya ngagai iya. Sida datai lalu bediri di mua raja.

³Raja lalu bejaku enggau sida, “Ati aku balat irauka mimpi aku. Aku keran deka nemu reti mimpi nya.”

⁴Ku sida nyaut raja ngena jaku orang Aram,[1] “Awakka Tuan Raja idup belama iya! Padahka mimpi nuan ngagai kami, nya baru kami nemu nerangka reti mimpi nya ngagai nuan.”

⁵Ku raja nyaut sida, “Aku udah mutuska runding deka ngasuh kita madahka mimpi nya ngagai aku. Udah nya baru kita nerangka reti mimpi nya ngagai aku. Enti kita enda ulih, aku deka ngasuh orang nyarikka tubuh kita, lalu rumah kita digaga nyadi tembawai.

⁶Tang enti kita ulih madahka mimpi enggau reti mimpi nya ngagai aku, aku deka ngupah kita ngena pemeri enggau basa ti besai. Nya alai, padahka mimpi nya, enggau reti iya ngagai aku.”

⁷Sida lalu nyaut raja nya baru, “Enti Tuan Raja deka madahka ngagai kami mimpi nya, nya baru kami nerangka reti iya.”

⁸Lebuh raja ninga nya, iya lalu bejaku enggau nyawa ti inggar, “Betul sangka aku! Kita tu semina masau jam ngapa, laban kita nemu aku endang udah mutuska penemu

⁹deka ngukum semua kita enti kita enda madahka mimpi nya ngagai aku. Kita udah besetuju enggau pangan diri deka ngemulaka aku, laban kita ngarapka aku deka ngubah runding diri. Padahka mimpi nya ngagai aku. Nya baru aku deka nemu kita amat nemu nerangka reti mimpi nya ngagai aku.”

¹⁰Bala penyanding penemu raja lalu nyaut, “Nadai orang di dunya tu ulih madahka utai ti keran deka ditemu Tuan Raja. Nadai raja, nyengkaum raja ti pemadu besai sereta pemadu bekuasa, udah bisi kala minta utai ti munyi tu ari bala nembiak iya ti tau tilit, ti tau keramat, enggau ari bala manang.

¹¹Utai ti dipinta Tuan Raja nya kelalu mar dikereja. Semina petara aja ulih ngereja utai nya ke nuan, tang petara nadai diau begulai enggau mensia.”

¹²Lebuh raja ninga jaku nya, iya ringat. Iya lalu ngasuh semua penyanding penemu raja di menua Babilon, dibunuh magang.

¹³Nya alai atur lalu dipejalaika, ngasuh semua sida dibunuh magang, nyengkaum Daniel enggau bala pangan iya.

¹⁴Udah nya Daniel lalu mansang ngagai Ariok, ti nyadi tuai ke bala jejaga raja, ti udah diberi atur bejalaika ukum nya. Daniel bejaku enggau bejimat,

¹⁵lebuh iya nanya ngagai Ariok pasal kebuah raja ti udah meri atur ti kasar baka nya. Ariok lalu nusui ngagai Daniel pasal utai ti udah nyadi.

¹⁶Daniel lalu tekala nya betemu enggau raja lalu minta raja nginsur timpuh nya panjai agi, ngambika iya ulih madahka reti mimpi nya ngagai raja.

¹⁷Udah nya Daniel pulai, lalu nusui pasal utai ti udah nyadi ngagai pangan iya Hananiah, Misael, enggau Asariah.

¹⁸Iya ngasuh sida besampi ngagai Allah Taala ti di serega minta pengasih ari Iya, lalu minta Iya nerangka misteri nya ngagai sida, ngambika sida enda kena bunuh sama enggau bala penyanding penemu ti bukai di menua Babilon.

¹⁹Malam nya misteri nya lalu dipandangka ngagai Daniel ngena siti genera. Daniel lalu muji Allah Taala ti di serega:

²⁰“Allah Taala endang pintar sereta bekuasa! Pujika Iya belama lama iya.

²¹Iya ngatur jam enggau musin. Iya ngeletak orang nyadi raja, lalu Iya mega muai raja. Iya meri penemu-dalam lalu ngasuh orang mereti.

²²Iya mandangka utai ti dalam sereta resia. Iya nemu utai ti dilalaika dalam pemetang, lalu Iya Empu diau dalam penampak.

²³Aku muji sereta ngemesaika Nuan, O Allah Taala aki ini aku. Nuan udah meri aku penemu-dalam enggau pengering. Nuan udah nyaut sampi aku lalu nunjukka ngagai kami utai ti patut dipadahka kami ngagai raja.”

²⁴Daniel lalu mansang ngagai Ariok, ti udah diasuh raja munuh bala penyanding penemu raja. Ku Daniel bejaku enggau Ariok, “Anang munuh sida. Bai aku ngagai raja ngambika aku madahka reti mimpi nya ngagai iya.”

²⁵Ariok lalu tekala nya mai Daniel betemu enggau Raja Nebukadnesar, lalu madahka ngagai raja, “Aku bisi udah tetemuka siku orang Judah ti udah dibuai ari menua sida, ke ulih madahka reti mimpi Tuan Raja.”

²⁶Ku raja bejaku enggau Daniel (ke dikumbai Beltesasar), “Kati nuan ulih madahka mimpi aku, enggau reti iya?”

²⁷Ku Daniel nyaut, “Tuan Raja, nadai siku manang tauka orang ke tau keramat, tauka orang ke tau tilit, tauka landik pasal bintang, ulih madahka misteri nya ngagai nuan.

²⁸Tang di serega bisi Allah Taala ti mandangka utai ti resia. Iya udah madahka ngagai Tuan Raja utai ti deka nyadi jemah ila. Diatu aku deka madahka mimpi nya ngagai nuan, genera ti dipeda nuan lebuh nuan tinduk.

²⁹“Lebuh Tuan Raja benung tinduk, nuan bemimpika utai ti deka nyadi jemah ila, lalu Allah Taala, ke mandangka utai ti resia, nunjuk ke nuan utai ti deka nyadi.

³⁰Nyadi misteri tu udah dipandangka ngagai aku, ukai laban aku lebih agi bepenemu-dalam ari orang bukai, tang ngambika Tuan Raja nemu reti mimpi nya, lalu meretika runding ti udah datai ba ati nuan.

³¹“Tuan Raja, dalam genera nuan nya, nuan meda, bediri di mua nuan, siku engkeramba ti besai, ti terang sereta beperenching, lalu balat ngenakutka.

³²Pala iya digaga ari emas ti pemadu tulin. Dada enggau lengan iya digaga ari pirak. Punggung enggau pun pah iya digaga ari temaga.

³³Betis iya digaga ari besi, lalu kaki iya digaga ari besi bechampur enggau tanah liat.

³⁴Lebuh nuan benung merening ngagai utai nya, sigi batu ti besai tingkil ari tingkah, lalu mangka ngagai kaki besi enggau tanah liat engkeramba nya, lalu ngeredakka kaki nya.

³⁵Tekala nya besi, tanah liat, temaga, pirak enggau emas nya lalu besepur baka amau ba endur alai nungku. Ribut lalu ngebuka semua amau nya. Tang batu nya mansang besai-sebesai lalu nyadi sigi bukit ti ngelamun semua dunya.

³⁶“Nya meh mimpi nuan. Diatu aku deka madahka reti mimpi nya ngagai nuan.

³⁷Tuan Raja, nuan tu raja ti besai agi ari semua raja. Allah Taala ti di serega udah ngasuh nuan nyadi raja, lalu udah meri ngagai nuan kuasa, pengering enggau basa.

³⁸Iya udah ngasuh nuan merintah semua dunya, sereta merintah semua jelu enggau burung. Pala emas nya ngambarka nuan empu.

³⁹Udah bekau nuan, siti agi perintah deka pegari, tang iya enda ngemesai perintah nuan, lalu udah bekau nya, perintah ti ketiga, iya nya perintah temaga, ti deka merintah semua dunya.

⁴⁰Udah nya bisi perintah ti keempat, ti kering baka besi, ti mechah lalu ngeredakka semua utai. Lalu baka besi ti mechahka semua utai, iya deka mechah lalu ngeredakka semua perintah ti dulu ari nya.

⁴¹Nuan mega bisi meda kaki enggau tunjuk kaki nya digaga ari tanah liat enggau ari besi. Reti nya, perintah nya deka bebagi. Iya deka ngembuan pengering besi, laban besi bisi bechampur enggau tanah liat.

⁴²Tunjuk kaki - ti digaga ari besi enggau tanah liat - nunjukka perintah nya kering, tang bisi mega pengelemi.

⁴³Nuan mega meda besi nya udah dichampur enggau tanah liat. Reti nya, orang ke megai perintah di menua nya deka nguji berakupka ruang bilik sida ngena chara belaki bini bepasuk bansa, tang sida enda ulih, baka besi ti enda ulih bechampur enggau tanah liat.

⁴⁴Lebuh bala raja nya megai perintah, Allah Taala ti di serega deka numbuhka siti perintah ti enda nemu abis. Perintah nya ila enda ulih dialahka, tang iya deka ngerusak semua perintah bukai, lalu udah nya iya deka meruan belama iya.

⁴⁵Nuan bisi meda chara batu nya tingkil ari tingkah, nadai ditegu mensia, enggau chara batu nya mangka ngagai engkeramba ti digaga ari besi, temaga, tanah liat, pirak enggau emas. Utai nya kena Allah Taala ti besai madahka ngagai Tuan Raja utai ti deka nyadi jemah ila. Aku udah madahka mimpi nuan, lalu udah madahka reti mimpi nya ti bendar ngagai nuan.”

⁴⁶Udah nya Raja Nebukadnesar nyungkurka diri ke tanah, lalu meri atur ngasuh piring enggau pemeri diberi ngagai Daniel.

⁴⁷Ku raja nya bejaku, “Allah Taala nuan besai agi ari semua petara. Iya TUHAN ke semua raja. Iya mandangka semua misteri. Aku nemu nya laban nuan udah ulih nerangka misteri tu.”

⁴⁸Raja nya lalu meri Daniel pangkat ti tinggi. Iya meri pemeri ti manah ngagai Daniel. Iya ngasuh Daniel nyadi tuai sitak menua Babilon, sereta ngasuh iya nyadi tuai semua penyanding penemu raja.

⁴⁹Nitihka pinta Daniel, raja lalu ngasuh Sadrak, Mesak, enggau Abednego nyadi tuai ngemataka pengawa perintah dalam sitak menua Babilon. Tang Daniel mengkang bekereja di istana raja.