Read Iban Daniel 3 Bible Online

Daniel 3 - Iban bible

Daniel 3

¹Raja Nebukadnesar ngasuh orang ngaga engkeramba emas. Peninggi engkeramba nya dua puluh tujuh meter, lalu buka iya tiga meter. Raja nya ngasuh orang nirika engkeramba nya ba emperan Dura, dalam sitak menua Babilon.

²Udah nya raja meri atur ngasuh semua bala pemesai iya begempuru - bala anak raja, bala tuan gabenor, sapit gabenor, orang ke ngemataka wang, bala hakim, majistret, enggau semua bala pemesai ari semua sitak menua. Sida diperintah datai ngagai pengerami nyerahka engkeramba ti udah didirika Raja Nebukadnesar.

³Lebuh semua bala pemesai begempuru ba pengawa nyerahka engkeramba nya, sida bediri di mua engkeramba nya.

⁴Siku orang lalu bejaku enggau nyawa ti inggar, “Kita ke datai ari semua menua, bansa enggau jaku!

⁵Kita deka ninga munyi terumpit ditangkanka enggau munyi kesuling, engkeratung, sape enggau belikan, enggau munyi kereban musik ti bukai. Lebuh musik nya berengkah ditebah, kita enda tau enda meremi lalu nyembah engkeramba emas ti didirika Raja Nebukadnesar.

⁶Barang sapa enda meremi lalu nyembah engkeramba nya deka tekala nya ditikauka ngagai serumbung api.”

⁷Nya alai, lebuh orang ari semua menua, bansa enggau jaku ninga musik nya, sida meremi lalu nyembah engkeramba emas ti didirika Raja Nebukadnesar.

⁸Nya meh maya sekeda orang Babilon ngambi peluang besalah orang Judah.

⁹Ku sida bejaku enggau Raja Nebukadnesar, “Awakka Tuan Raja idup belama iya!

¹⁰Tuan Raja udah meri atur: lebuh musik berengkah ditebah, semua orang enda tau enda meremi lalu nyembah engkeramba emas nya,

¹¹lalu barang sapa enda meremi lalu nyembah engkeramba nya deka dibuai ngagai serumbung api.

¹²Sekeda orang Judah ti udah diasuh nuan megai sitak menua Babilon - Sadrak, Mesak, enggau Abednego - udah enda ngasika atur Tuan Raja. Sida enda nyembah petara nuan tauka meremi ngagai engkeramba ti didirika nuan.”

¹³Lebuh raja ninga nya, iya balat amat ringat, lalu ngasuh orang mai sida tiga nya ngagai iya.

¹⁴Ku iya bejaku enggau sida, “Sadrak, Mesak, enggau Abednego, kati kita amat enggai nyembah petara aku, lalu enggai meremi ngagai engkeramba emas ti didirika aku?

¹⁵Diatu, lebuh kita ninga munyi terumpit, kesuling, engkeratung, sape enggau belikan, enggau munyi semua kereban musik ti bukai, kita enda tau enda meremi lalu nyembah engkeramba nya. Enti kita enda, kita deka tekala nya ditikauka ngagai serumbung api. Kati kita bisi petara ti ulih ngelepaska kita ari jari aku?”

¹⁶Sadrak, Mesak, enggau Abednego lalu nyaut, “O Tuan Raja, kami enda ibuh bejaku ngarika diri empu.

¹⁷Enti Allah Taala ti dipetuaika kami ulih ngelepaska kami ari api ti mau nya, enggau ari kuasa nuan, awakka Iya meh ngelepaska kami,[2] Tuan Raja.

¹⁸Tang enti Iya enda ngelepaska kami, kami madahka ngagai nuan Tuan Raja, enggai meh kami nyembah petara nuan, lalu meremi ngagai engkeramba emas ti didirika nuan.”

¹⁹Nebukadnesar lalu balat amat ringat. Mua iya mirah, ringat ngagai Sadrak, Mesak enggau Abednego. Iya lalu ngasuh orang masang api dalam serumbung nya tujuh kali angat agi ari selama.

²⁰Iya lalu ngasuh orang ke pemadu kering ari bala soldadu iya nanchang sida tiga, lalu nikauka sida ngagai serumbung api nya.

²¹Sida tiga lalu ditanchang mengkang ngena pekayan sida, iya nya baju, baju panjai, selapuk, enggau semua pekayan bukai. Sida tiga lalu ditikauka ngagai serumbung api nya.

²²Laban raja udah meri atur ngasuh orang masang api nya enggau naka pengangat, bala orang ke mai sida tiga ngagai serumbung api nya, lalu mati angus kena diang api nya.

²³ Sadrak, Mesak, enggau Abednego, ti agi mengkang ditanchang, labuh ngagai tengah-tengah serumbung api ti mau nya.

²⁴Tekala nya Raja Nebukadnesar lalu bediri, laban iya alit ati. Ku iya nanya ngagai bala pemesai iya, “Ukai enda tiga iku orang ditanchang kita, lalu ditikauka kita ngagai serumbung api nya tadi?” Disaut sida, “Sigi amat, Tuan Raja.”

²⁵“Enti pia, nama kebuah aku meda empat iku orang bejalai ba tengah-tengah api nya?” ku iya nanya. “Sida nya enda ditanchang, lalu sida enda bebadi, lalu iya ti keempat nya baka gamal melikat.”[3]

²⁶Nebukadnesar lalu mansang semak ngagai mua pintu serumbung api nya, lalu ngangau, “Sadrak! Mesak! Abednego! Nembiak Allah Taala ti Pemadu Tinggi! Pansut kita!” Sida tiga lalu pansut ari api nya.

²⁷Semua anak raja, tuan gabenor, sapit gabenor, enggau pemesai raja ti bukai lalu begelumu meda orang tiga iku nya, ti enda bebadi laban api nya. Buk sida enda angus, gari sida enda diempa api, lalu sida nadai bebau asap.

²⁸Ku Nebukadnesar bejaku, “Pujika Allah Taala ti disembah Sadrak, Mesak enggau Abednego! Iya udah ngirumka melikat Iya, lalu ngelepaska sida tu ke betuai sereta arapka Iya. Sida udah ngelanggar atur aku, lalu berambunka nyawa enggai meremi sereta nyembah petara bukai tang semina Allah Taala sida empu.

²⁹“Diatu aku meri atur: enti orang ari sebarang menua, bansa enggau jaku, ngeleseka Allah Taala sida Sadrak, Mesak, enggau Abednego, tubuh orang nya deka dicharikka, lalu rumah iya deka digaga nyadi tembawai, laban nadai petara bukai ulih ngelepaska orang baka nya.”

³⁰Raja nya lalu nikika pangkat Sadrak, Mesak, enggau Abednego ngagai pangkat ti tinggi agi dalam sitak menua Babilon.