Read Iban Daniel 4 Bible Online

Daniel 4 - Iban bible

Daniel 4

¹Raja Nebukadnesar ngirumka pesan tu ngagai orang di semua menua, bansa enggau jaku di dunya tu: “Tabi!

²Pendingka cherita aku pasal utai ti nyelai enggau kereja ajih ti udah diayanka Allah Taala ti Pemadu Tinggi ngagai aku.

³“Naka meh pemesai kereja ti nyelai ti dipandangka Allah Taala ngagai kitai! Naka meh pemesai kereja ajih ti dikereja Iya! Allah Taala endang Raja belama iya. Iya deka merintah belama lama iya.

⁴“Aku udah diau lantang senang dalam istana aku, sereta kaya-raja.

⁵Tang aku bisi mimpi ti ngasuh ati aku rawan, enggau genera ti balat ngenakutka ati aku lebuh aku tinduk.

⁶Aku lalu mesanka semua penyanding penemu di menua Babilon betemu enggau aku, lalu madahka reti mimpi nya ngagai aku.

⁷Udah nya semua orang ke tau tilit, orang ke tau keramat, bala manang, enggau orang ke landik pasal bintang, dibai tama, lalu aku madahka mimpi aku ngagai sida. Tang sida enda ulih nerangka reti mimpi nya ngagai aku.

⁸Udah nya Daniel datai. (Iya mega dikumbai Beltesasar, ngangkatka nama petara aku.) Roh bala petara[4] ti kudus bisi dalam iya. Nya alai aku lalu madahka mimpi aku ngagai iya. Ku aku bejaku enggau iya:

⁹Beltesasar, nuan tu tuai orang ke tau nilit nasit. Aku nemu roh bala petara[5] ti kudus bisi dalam nuan, lalu nuan meretika semua misteri. Baka tu ku mimpi[6] aku. Padahka reti mimpi nya ngagai aku.

¹⁰“Lebuh aku tinduk, aku begenera meda sepun kayu ti besai bediri ba tengah-tengah dunya.

¹¹Kayu nya mansang besai-sebesai datai ke nyau nyentuk ke langit, lalu ulih dipeda semua mensia di dunya tu.

¹²Daun iya manah, lalu buah iya lebat - chukup diempa semua mensia di dunya tu. Jelu babas belelak di baruh iya. Burung begagaka tansang ba dan iya, lalu genap macham utai ti idup bela makai buah iya.

¹³“Lebuh aku benung berundingka genera nya, aku meda siku melikat nurun ari serega. Melikat nya endang seruran bejaga sereta sedia.

¹⁴Iya bejaku enggau nyawa ti inggar, “Tebang kayu nya, lalu tetak dan iya. Gugurka daun iya, lalu taburka buah iya. Buru jelu ari baruh iya, enggau burung ari dan iya.

¹⁵Tang awakka tuga iya tinggal ba tanah, dibelit ngena belulang besi enggau temaga. Awakka tuga nya mengkang ba padang nya dibalut rumput. “ ‘Awakka ambun labuh ninggang orang tu, lalu awakka iya diau di babas begulai enggau jelu.

¹⁶Dalam kandang tujuh taun iya nadai agi ngembuan runding mensia, tang runding jelu.

¹⁷Tu meh pemutus penemu bala melikat ke sedia sereta bejaga nya. Nya alai, awakka semua orang di semua endur nemu Allah Taala ti Pemadu Tinggi bisi kuasa atas perintah mensia, lalu Iya ulih meri perintah nya ngagai sebarang orang ke dipilih Iya - nyengkaum ngagai orang ke pemadu nadai guna.’

¹⁸“Tu meh mimpi aku,” ku Raja Nebukadnesar bejaku. “Nya alai, Beltesasar, padahka reti mimpi nya ngagai aku. Nadai orang ari bala penyanding penemu aku ulih madahka reti mimpi nya ngagai aku, tang nuan ulih, laban roh bala petara[7] ti kudus bisi dalam nuan.”

¹⁹Lebuh iya ninga nya, Daniel, ke dikumbai Beltesasar, berasai balat amat irau ati, datai ke nyau enda ulih bejaku. Ku raja nya bejaku enggau iya, “Beltesasar, anang nejuka mimpi enggau pesan mimpi nya ngasuh ati nuan irau.” Ku Beltesasar nyaut, “Tuan Raja, naka meh pemanah enti sema mimpi enggau reti iya ditujuka ngagai bala munsuh nuan, lalu ukai ngagai nuan empu.

²⁰Kayu ti tinggi, datai ke nyau nyentuk ke langit, ulih dipeda semua mensia di dunya tu.

²¹Daun iya manah, lalu buah iya chukup kena nupi semua dunya. Jelu babas belelak di baruh iya, lalu burung begagaka tansang ba dan iya.

²²“Tuan Raja, kayu ti tinggi sereta tegap nya ngambarka nuan empu. Nuan udah nyadi besai datai ke nuan nyau nyentuk ke langit, lalu kuasa nuan ngerembai di serata dunya.

²³Lebuh Tuan Raja benung ngemataka utai nya, siku melikat nurun ari serega lalu bejaku, ‘Tebang kayu nya, lalu rusak iya, tang awakka tuga iya mengkang ba tanah. Belit tuga nya ngena belulang besi enggau temaga, lalu tinggalka iya dia ba tanah dibalut rumput. Awakka ambun labuh ninggang orang tu, lalu awakka iya diau dia tujuh taun begulai enggau jelu.’

²⁴“Nya alai tu reti mimpi nuan, Tuan Raja. Tu utai ti udah dipadahka Allah Taala ti Pemadu Tinggi deka nyadi ba nuan.

²⁵Nuan deka diburu ari orang mayuh, lalu nuan deka diau begulai enggau jelu babas. Dalam pengelama tujuh taun nuan deka ngulam rumput baka sapi, lalu tinduk ba sebelah padang, ditinggang ambun. Udah nya baru nuan deka ngaku Allah Taala ti Pemadu Tinggi endang bekuasa atas semua perintah mensia, lalu iya ulih meri perintah nya ngagai sebarang orang ke dipilih Iya.

²⁶Melikat nya ngeletak tuga nya ditinggalka ba tanah. Reti nya, nuan deka nyadi raja baru lebuh nuan ngaku Allah Taala endang merintah semua dunya.

²⁷ Nya alai titihka jaku lalau ti diberi aku, Tuan Raja. Badu agi bedosa. Kereja utai ti ngena, lalu kasihka orang ke seranta. Nya baru nuan deka mengkang kaya-raja.”

²⁸Semua utai nya lalu nyadi magang ba Raja Nebukadnesar.

²⁹Dua belas taun udah lepas nya, lebuh iya benung bejalai ba perabung istana iya di Babilon,

³⁰iya bejaku, “Peda pemanah nengeri Babilon! Aku udah ngaga iya nyadi indu nengeri aku, kena aku ngayanka kuasa, pengering, mulia enggau penampak nama aku ti nyadi raja.”

³¹Sebedau leka jaku nya pansut ari nyawa iya, siti nyawa lalu bejaku ari serega, “Raja Nebukadnesar, pendingka jaku aku! Kuasa nuan ti nyadi raja diatu diambi ari nuan.

³²Nuan deka diburu ari orang mayuh, diau begulai enggau jelu babas, lalu makai rumput baka sapi dalam pengelama tujuh taun. Udah nya nuan deka ngaku Allah Taala ti Pemadu Tinggi bisi kuasa atas perintah mensia, lalu Iya ulih meri perintah nya ngagai sebarang orang ke dipilih Iya.”

³³Utai ti disebut nya lalu nyadi tekala nya. Nebukadnesar diburu ari orang mayuh, lalu makai rumput baka sapi. Ambun labuh ninggang tubuh iya, lalu buk iya mansang panjai sepemanjai hari baka bulu menaul, lalu kukut iya panjai baka kukut burung.

³⁴ Ku raja nya bejaku, “Lebuh tujuh taun nya nyau udah abis, aku engkadah ke langit, lalu aku badu agi gila. Aku lalu muji Allah Taala ti Pemadu Tinggi, lalu ngemesai sereta ngemuliaka Iya ke idup belama lama iya. “Iya deka merintah belama lama iya, lalu perintah Iya deka meruan belama lama iya.

³⁵Orang di dunya tu nadai reti ba Iya. Melikat di serega enggau mensia di dunya tu endang diperintah Iya magang. Nadai orang ulih ngelaban peneka Iya tauka nyakal utai ti dikereja Iya.

³⁶“Lebuh aku nyau udah badu agi gila, basa, pangkat aku ti nyadi raja, enggau mulia perintah aku lalu dipulaika baru ngagai aku. Bala pemesai, enggau bala aku ti tinggi pangkat nyambut penatai aku, lalu kuasa aku ti nyadi raja dipulaika baru ngagai aku, sereta enggau basa ti lebih agi ari ti dulu suba.

³⁷“Nya alai, diatu aku, Nebukadnesar, muji, ngemesai sereta ngemuliaka Raja Serega. Semua utai ti dikereja Iya endang ngena sereta lurus magang, lalu Iya ulih ngemaruhka sebarang orang ke ngenyumbungka diri.”