Read Iban Daniel 5 Bible Online

Daniel 5 - Iban bible

Daniel 5

¹Nyadi sekali Raja Belsasar ngambi seribu iku orang ke tinggi pangkat ngagai siti pengerami makai besai, lalu sida begulai ngirup wain.

²Lebuh sida benung ngirup, Belsasar ngasuh orang ngambi changkir enggau mangkuk emas enggau pirak ti udah ditabanka apai iya Nebukadnesar ari Rumah Sembiang di Jerusalem. Kebuah raja nya ngasuh orang ngambi mangkuk enggau changkir nya, ngambika iya, bala pemesai iya, bala bini iya, enggau bala indu simpan iya ulih ngirup ngena utai nya.

³Changkir enggau mangkuk emas nya lalu tekala nya dibai ke dalam, lalu semua sida bela ngirup wain ngena changkir enggau mangkuk nya

⁴lalu muji bala petara ti digaga ari emas, pirak, temaga, besi, kayu enggau batu.

⁵Tekala nya siti jari mensia lalu pegari, lalu belabuh nulis ba dinding istana nya, ba endur ti pemadu terang dipanchar lampu. Raja empu meda jari nya nulis.

⁶Raja balat amat takut. Mua iya puchat, lalu patung iya nyau getar-getar.

⁷Iya manjung ngasuh orang ngangauka bala orang ke tau keramat, bala manang, enggau bala orang ke landik pasal bintang. Lebuh sida tama, raja lalu bejaku enggau sida, “Barang sapa nemu macha tulis tu, lalu madahka reti iya ngagai aku, deka diasuh begari ngena gari ungu raja, betenggakka rantai emas, lalu nyadi orang ke lumur tiga bekuasa dalam menua tu.”

⁸Bala penyanding penemu raja lalu mansang ke mua, tang nadai siku sida nemu macha tulis nya, tauka madahka reti iya ngagai raja.

⁹Raja Belsasar balat amat irau ati, lalu mua iya balat agi puchat, lalu bala pemesai iya nadai nemu utai ti patut dikereja sida.

¹⁰Lebuh indai raja ninga raja enggau bala pemesai iya inggar, iya lalu tama ngagai balai endur makai besai nya. Ku iya, “Awakka Tuan Raja idup belama iya! Anang takut, lalu anang ngasuh mua nuan puchat baka nya.

¹¹Di menua ti diperintah nuan tu bisi siku lelaki ke ngembuan Roh Allah Taala[8] dalam iya. Lebuh apai nuan nyadi raja, lelaki tu udah ngayanka diri nemu berunding, bisi penemu, enggau penemu-dalam baka bala petara. Lalu Raja Nebukadnesar, iya nya apai nuan udah ngasuh iya nyadi tuai bala orang ke nemu nilit nasit, ti tau keramat, bala manang, enggau orang ke landik pasal bintang.

¹²Iya bisi pengelandik ti nyelai, lalu iya bepenemu-dalam, sereta landik nerangka reti mimpi, nerangka entelah, enggau nerangka utai ti resia. Nya alai, pesanka lelaki nya. Nama iya Daniel, tang raja udah ngumbai iya Beltesasar. Awakka Daniel madahka reti semua utai tu ngagai nuan.”

¹³Daniel lalu dibai betemu enggau raja, lalu ku raja bejaku enggau iya, “Kati nuan tu Daniel, orang Judah ti udah dibuai ari menua nuan empu, lalu ditabanka apai aku kitu ari menua Judah?

¹⁴Aku bisi udah ninga berita pasal Roh Allah Taala[9] ti kudus bisi dalam nuan, lalu nuan bisi pengelandik sereta bisi penemu enggau penemu-dalam.

¹⁵Bala penyanding penemu enggau bala orang ke tau keramat udah dibai tama kitu, lalu diasuh macha tulis tu, ngambika sida madahka reti utai nya ngagai aku, tang sida enda nemu reti utai nya.

¹⁶Nyadi aku udah bisi ninga pasal nuan ke nemu nerangka utai ti resia, lalu nemu nerangka utai ti mar diperatika. Enti nuan nemu macha tulis tu, lalu madahka reti utai nya ngagai aku, nuan deka dirasukka enggau gari ungu ti diraja, betenggakka rantai emas kena nandaka nuan dibasa orang, lalu nyadi orang ke lumur tiga bekuasa di menua tu.”

¹⁷Ku Daniel nyaut, “Simpan nuan empu meh pemeri nuan nya, tauka beri ngagai orang bukai. Aku deka macha ke Tuan Raja utai ti udah ditulis nya, lalu madahka reti iya ngagai nuan.

¹⁸“Allah Taala ti Pemadu Tinggi udah ngasuh apai nuan Nebukadnesar nyadi raja ti besai, lalu udah meri ngagai iya mulia enggau kuasa.

¹⁹Iya udah besai amat kuasa datai ke orang ari semua menua, bansa, enggau jaku nyau getar-getar takutka iya. Enti iya deka munuh orang, iya munuh. Enti iya deka nejuka orang nya idup, iya nejuka orang nya idup. Iya mechat tauka ngemesaika orang nitihka peneka ati iya empu.

²⁰Tang laban iya sumbung, kieh ati sereta jai enggau orang, iya udah dibuai ari kerusi diraja iya, lalu nadai dibasa orang agi.

²¹Iya udah diburu ari orang mayuh, lalu iya berunding baka jelu. Iya diau begulai enggau keledai kampung, ngulam rumput baka sapi, lalu tinduk ba sebelah padang, lalu iya nadai utai kena ngelindung diri ari ambun. Ke pengujung iya, iya ngaku Allah Taala ti Pemadu Tinggi endang bekuasa atas semua perintah mensia, lalu ulih meri perintah nya ngagai sebarang orang ke dipilih Iya.

²²“Tang nuan ke anak iya, enda ngemaruhka diri, taja pen nuan nemu semua utai tu.

²³Nuan ngereja utai ti ngelaban TUHAN ti di serega, lalu nuan udah mai ngagai endur tu changkir enggau mangkuk ti udah ditabanka ari Rumah Sembiang. Nuan enggau bala pemesai nuan, bala bini nuan, enggau bala indu simpan nuan bela ngirup wain ngena changkir enggau mangkuk nya, lalu muji bala petara ti digaga ari emas, pirak, temaga, besi, kayu enggau batu, petara ti enda ulih meda, enda ulih ninga, enda nemu utai. Tang nuan enda ngemesaika Allah Taala ti ngeletak nuan idup tauka mati, ke ngatur semua utai ti dikereja nuan.

²⁴Nya kebuah Allah Taala udah ngasuh jari nya nulis leka jaku tu.

²⁵“Tu utai ti udah ditulis: ‘Diitung, diitung, ditimbang, dibagi.’ [10]

²⁶Lalu tu reti utai ti ditulis nya: diitung:, Allah Taala udah ngitung penyampau hari perintah nuan, lalu udah ngabiska iya.

²⁷Ditimbang: Nuan udah ditimbang ngena dachin, lalu ditemu kelalu lempung.

²⁸Dibagi: Menua nuan deka dibagi, lalu diberi ngagai orang Media enggau orang Persia.” [11]

²⁹Belsasar lalu ngasuh bala ulun iya ngerasukka gari diraja ti bechura ungu ba Daniel, lalu ngerasukka tenggak emas ba rekung iya kena nandaka iya dibasa. Lalu iya ngasuh Daniel nyadi orang ke lumur tiga bekuasa di menua nya.

³⁰Malam nya Raja Belsasar menua Babilon dibunuh.

³¹Lalu Darius orang Media, ke umur 62 taun lebuh maya nya, ngerampas kuasa lalu nyadi raja menua nya.