Read Iban Daniel 6 Bible Online

Daniel 6 - Iban bible

Daniel 6

¹Darius lalu mutuska runding deka ngeletak seratus dua puluh iku orang nyadi tuan gabenor di menua ti diperintah iya.

²Nambahka nya, iya milih Daniel enggau dua iku orang bukai ngemataka bala tuan gabenor, enggau ngintu semua reta tengkira raja.

³Enda lama udah bekau nya, Daniel ngayanka diri landik agi gawa ari orang dua iku ti bukai nya, enggau ari bala tuan gabenor. Laban Daniel berupai landik agi, raja lalu berunding deka ngasuh iya merintah semua menua nya.

⁴Udah nya orang dua iku nya, sereta enggau bala gabenor nya nguji ngiga penyalah Daniel lebuh iya bejalaika pengawa perintah di menua nya. Tang sida nadai nemu penyalah iya, laban Daniel endang orang ke tau dikarapka, lalu enda ngereja utai ti salah tauka enda lurus.

⁵Ku sida bejaku enggau pangan diri, “Kitai enda ulih ngiga utai kena besalahka Daniel, kelimpah ari utai ti besangkut-paut enggau agama iya empu”

⁶Nya alai sida betemu enggau raja, lalu bejaku, “Raja Darius, awakka Tuan Raja idup belama iya!

⁷Semua kami ke bejalaika pengawa perintah di menua tu - bala orang ke ngemataka pengawa gabenor, sida gabenor empu, sapit gabenor, enggau bala pemesai ti bukai - udah besetuju minta nuan, Tuan Raja, meri siti atur nagang semua orang minta utai ari sebarang petara, tauka ari mensia, dalam kandang tiga puluh hari, tang semina minta utai ari Tuan Raja aja. Atur tu deka dipejalaika enggau terit, lalu barang sapa ngelanggar atur tu deka dibuai ngagai lubang singa.

⁸Nya alai, awakka Tuan Raja meri atur nya ngagai orang Media enggau orang Persia, lalu nyain atur nya, ngambika atur nya enda tau diubah.”

⁹Raja Darius lalu nyain atur nya.

¹⁰Lebuh Daniel nemu atur nya udah disain, iya lalu pulai ke rumah. Nyadi ba siti bilik ti di sadau rumah iya, mayuh jenila ti nunga ngagai Jerusalem. Endang baka selama, dalam bilik nya iya besugang ba mua jenila, lalu besampi ngagai Allah Taala tiga kali sehari.

¹¹Lebuh bala orang ke ngelaban Daniel meda iya besampi ngagai Allah Taala,

¹²semua sida lalu mansang ngagai raja, deka bedawaka Daniel. Ku sida, “Tuan Raja, nuan udah nyain atur ngeletak barang sapa minta utai ari sebarang petara tauka mensia, tang semina ari Tuan Raja empu aja dalam kandang tiga puluh hari, deka dibuai ngagai lubang singa.” Ku raja nyaut, “Sigi amat! Nitihka adat orang Media enggau orang Persia, atur nya enda tau diubah.”

¹³Udah nya sida lalu nyaut raja, “Siku ari orang ke udah dibuai ari menua Judah, ke benama Daniel, enda bebasaka Tuan Raja lalu enda ngasika atur ti diberi nuan. Iya besampi tiap hari, tiga kali sehari.”

¹⁴Lebuh raja ninga nya, ati iya balat tusah, lalu iya enggau naka ulih ngiga jalai nyelamatka Daniel. Iya majak begigaka jalai nya nyentuk ngagai padam mata panas.

¹⁵Udah nya bala orang ke bepekat ngelaban Daniel lalu datai baru ngagai raja, lalu bejaku enggau iya, “Tuan Raja nemu, nitihka adat orang Media enggau orang Persia, nadai atur ti diberi raja, tau diubah.”

¹⁶ Nya alai raja lalu meri atur ngasuh Daniel dibai lalu ditikauka ngagai lubang singa. Ku iya bejaku enggau Daniel, “Awakka Allah Taala nuan, ke dipetuaika nuan enggau ati ti taluk, ngidupka nuan.”

¹⁷Sigi batu lalu diengkahka ba mua lubang nya, lalu raja ngelekatka chop tambit iya empu, enggau chop bala pemesai iya, ba batu nya, ngambika orang enda ulih ngelepaska Daniel.

¹⁸Udah nya raja lalu pulai ngagai istana iya. Semalam-malam nya iya enda tinduk, enda makai, enda ngelantangka diri.

¹⁹Ba urung rerak tawas, raja angkat lalu beguai-guai mansang ngagai lubang singa.

²⁰Lebuh iya datai dia, iya ngangau enggau ati ti irau, “Daniel, nembiak Allah Taala ti idup! Kati Allah Taala ti seruran dipetuaika nuan, ulih nyelamatka nuan ari bala singa?”

²¹Daniel lalu nyaut, “Awakka Tuan Raja idup belama iya!

²² Allah Taala udah ngasuh melikat Iya nutup mulut singa, ngambika sida enda ngemediska aku. Iya ngereja nya laban Iya nemu aku endang nadai penyalah, enggau laban aku nadai udah ngereja utai ti salah ngelaban nuan, O Tuan Raja.”

²³Raja lalu gaga amat ati, lalu meri atur ngasuh orang narit Daniel pansut ari lubang singa. Sida lalu narit iya pansut. Dia sida meda iya nadai nama-nama, laban iya arapka Allah Taala.

²⁴Udah nya raja lalu meri atur ngasuh orang nangkap semua sida ke udah bedawaka Daniel, lalu ngasuh sida dibuai ngagai lubang singa nya, sama enggau bini anak sida. Sebedau sida terengkah ba buntut lubang nya, bala singa endang udah nyambarka sida, lalu ngeredakka semua tulang sida.

²⁵Udah nya Raja Darius nulis ngagai orang di semua menua, bansa enggau jaku di dunya tu. “Tabi!

²⁶Aku meri atur ngagai serata menua ti diperintah aku, ngeletak semua orang enda tau enda nangi sereta bebasaka Allah Taala ti dipetuaika Daniel. “Iya Allah Taala ti idup, lalu Iya deka merintah belama iya. Perintah Iya enda ulih dirusak, lalu kuasa Iya enda nemu abis.

²⁷Iya ngidup sereta ngelepas. Iya ngereja pengawa ti nyelai, enggau kereja ajih di serega enggau di dunya. Iya udah nyelamatka Daniel ari jelu singa.”

²⁸Daniel mujur dalam semua utai lebuh maya perintah Darius, enggau lebuh maya perintah Sairus ari Persia.