Read Iban Daniel 8 Bible Online

Daniel 8 - Iban bible

Daniel 8

¹Ketiga taun Belsasar udah nyadi raja, aku begenera kedua kali.[14]

²Dalam genera nya aku nemu diri dalam nengeri Susa ti bekuta, dalam sitak menua Elam. Aku bediri ba tebing Sungai Ulai,

³lalu ba tebing sungai nya aku tepedaka siku bedus ti lelaki ti bisi dua iti tanduk ti panjai. Siti ari tanduk nya panjai agi sereta baru agi ari tanduk ti siti.

⁴Aku nengkilaka bedus ti lelaki nya nanduk tunga ke barat, ke utara, enggau tunga ke selatan. Nadai siku jelu ulih nagang iya, tauka ulih ngerarika diri ari kuasa iya. Iya ngereja utai nitihka peneka ati iya empu, lalu iya sumbung.

⁵Lebuh aku benung belematika reti utai nya, siku kambin datai belanda laju amat ari barat datai ke kaki iya nyau enda terengkah ba tanah. Iya bisi siti tanduk ti besai ba entara mata iya.

⁶Iya mansang ngagai bedus ti lelaki ti dipeda aku bediri ba tebing sungai, lalu belanda nempuh iya enggau pengabis pengering iya.

⁷Aku nengkilaka iya nyerang bedus ti lelaki nya. Iya balat amat ringat datai ke nanduk bedus ti lelaki nya enggau naka pemalat, lalu matahka kedua-dua iti tanduk bedus ti lelaki nya. Bedus ti lelaki nya enda ulih ngelaban iya, lalu rebah ke tanah, lalu dilunjak iya, lalu nadai orang ulih ngelepaska bedus ti lelaki nya ari kuasa iya.

⁸Kambin nya majak balat agi sumbung, tang lebuh iya nyadi pemadu bekuasa, tanduk iya patah. Tanduk nya lalu diganti empat iti tanduk ti besai. Genap iti tanduk nya nunjuk kebukai magang.

⁹Ari siti tanduk nya pansut siti tanduk ti mit, lalu kuasa tanduk ti mit tu ngerembai tunga ke selatan, enggau ke timur, enggau ngagai Menua Ti Udah Disemaya.

¹⁰ Tanduk nya nyadi kering datai ke ulih nyerang bala soldadu serega, nyerang bintang, lalu muai sekeda sida ke tanah, lalu ngelunjak sida.

¹¹Tanduk ti mit nya mega berani nyakap Anak Raja ti nyadi tuai soldadu serega, madamka semua pengawa ti beberika piring tiap hari ngagai Anak Raja nya, lalu ngerusak Rumah Sembiang.

¹²Orang ngereja penyalah ba endur nya, ukai ngenjuk piring ti endang patut diberi tiap hari,[15] lalu agama ti bendar dibuai ke tanah. Tanduk nya mujur dalam semua utai ti dikereja iya.

¹³Udah nya aku ninga siku melikat betanya ngagai pangan diri, “Ni pengelama utai ti dipeda dalam genera tu agi majak nyadi? Ni pengelama dosa ti jai tu deka majak nganti piring ti diberi tiap hari? Ni pengelama bala soldadu serega enggau Rumah Sembiang tu diindik?”

¹⁴Aku ninga melikat nya nyaut, “Utai tu deka majak nyadi 2,300 lemai enggau 2,300 pagi lebuh piring nya diberi. Udah nya baru Rumah Sembiang nya deka digaga baru.”

¹⁵Lebuh aku benung nguji berundingka reti genera nya, siku orang lalu tekala nya bediri di mua aku.

¹⁶ Aku lalu ninga siku melikat ngangau ari seberai Sungai Ulai, “Gabriel, terangka ngagai iya reti utai ti udah dipeda iya.”

¹⁷Gabriel datai lalu bediri ngimbai aku. Aku lalu balat amat takut datai ke aku nyau rebah ke tanah. Ku Gabriel bejaku enggau aku, “Anak mensia, nuan enda tau enda nemu reti genera nya. Genera nya besangkut-paut enggau pengujung dunya.”

¹⁸Lebuh iya benung bejaku, aku rebah ke tanah, luput. Tang iya megai aku, ngangkatka aku lalu nirika aku.

¹⁹Lalu ku iya bejaku, “Aku ngayanka ngagai nuan utai ti deka nyadi ketegal pengeringat Allah Taala. Genera nya madahka pengujung dunya.

²⁰“Bedus lelaki ti bisi dua iti tanduk ti dipeda nuan, ngambarka perintah menua Media enggau menua Persia.

²¹Kambin nya ngambarka perintah menua Gerika, lalu tanduk ti besai ba entara mata iya nya ngambarka raja ti keterubah.

²²Tanduk ti empat iti, ti pansut lebuh tanduk ti keterubah nya patah, ngambarka perintah nya deka dibagi ngagai empat bengkah perintah, ti enda sebaka pengering enggau perintah ti keterubah.

²³“Lebuh perintah empat bengkah nya baru deka abis, lalu nyau jai datai ke sida enda tau enda diukum, siku raja ke kieh sereta jai, deka pegari.

²⁴Iya deka nyadi kering, tang ukai laban kuasa iya empu. Iya deka balat ngerusak utai, lalu iya deka mujur dalam semua utai ti dikereja iya. Iya deka ngerusak orang ke bekuasa, enggau bala nembiak Allah Taala.

²⁵Laban iya pintar, iya ulih nipu orang. Iya deka temegahka diri empu, lalu ngerusak mayuh orang enggau ngenyit. Indah Raja ke pemadu besai ari semua raja deh dichakap iya, tang iya deka dirusak, tang ukai ngena kuasa mensia.

²⁶Genera pasal piring ti diberi lebuh lemai enggau pagi hari, ti udah diterangka ngagai nuan, deka dikamatka. Tang awakka utai nya nyadi resia diatu, laban utai nya deka dikamatka jemah ila.”

²⁷Aku tusah ati sereta sakit dalam kandang dua tiga hari nya. Udah nya aku angkat, lalu pulai baru ngagai pengawa ti udah diasuh raja kereja aku, tang aku agi mengkang alit ati ke genera nya, lalu enda nemu reti iya.