Read Iban Daniel 9 Bible Online

Daniel 9 - Iban bible

Daniel 9

¹Darius anak Serses, orang Media, megai perintah di menua Babilon.

² Dalam taun ti keterubah iya megai perintah, aku belajarka Bup Kudus, lalu berundingka tujuh puluh taun Jerusalem udah nyadi tembawai, nitihka utai ti udah dipadahka TUHAN ngagai nabi Jeremiah.

³Aku lalu besampi enggau bebendar ngagai TUHAN Allah Taala, minta kasih ngagai Iya. Aku bepasa, lalu begari ngena kain guni, lalu duduk malai amau.

⁴Aku besampi ngagai TUHAN Allah Taala aku, lalu ngaku dosa bansa aku empu. Ku aku, “TUHAN Allah Taala, Nuan endang besai, lalu kami nangika Nuan. Nuan endang tetap ati ngagai sempekat Nuan, lalu ngayanka pengerindu ti meruan ngagai orang ke rinduka Nuan sereta ngereja utai ti diasuh Nuan.

⁵“Kami udah bedosa, kami udah jai, kami udah ngereja penyalah. Kami udah nulak utai ti diasuh Nuan kereja kami, lalu kami udah limpang ari utai ti ngena ti udah diayanka Nuan ngagai kami.

⁶Kami enda mendingka bala nembiak Nuan, iya nya sida nabi, ke bejaku dalam nama Nuan ngagai bala raja kami, bala orang ke merintah kami, bala aki ini kami, enggau ngagai semua bansa kami.

⁷ Nuan, TUHAN, endang seruran ngereja utai ti ngena, tang kami udah ngemaluka diri empu. Utai tu endang amat ba semua bala kami ke diau di Judea enggau di Jerusalem, enggau ba semua orang Israel ti udah diachirka Nuan ba sebelah menua ti jauh enggau ti semak, ketegal sida udah enda tetap ati ngagai Nuan.

⁸Bala raja kami, bala orang ke merintah kami, enggau bala aki ini kami udah ngereja utai ti balat ngemaluka kami empu, lalu udah bedosa ngelaban Nuan, O TUHAN.

⁹Nuan endang penuh laban pengasih enggau pengampun, taja pen kami udah angkat ngelaban Nuan.

¹⁰Kami enda mendingka Nuan, O TUHAN Allah Taala kami, lebuh Nuan ngasuh kami nitihka adat ti udah diberi Nuan ngagai kami nengah bala nembiak Nuan, iya nya sida nabi.

¹¹ Semua orang Israel udah ngelanggar adat Nuan lalu enggai mendingka jaku Nuan. Kami udah bedosa ngelaban Nuan. Nya alai Nuan udah ngasuh kami ditinggang semua sumpah ti ditulis dalam Adat nembiak Nuan Moses.

¹²Nuan udah ngereja utai ti deka dikereja Nuan ngagai kami enggau ngagai orang ke merintah kami. Nuan udah ngukum Jerusalem lebih balat agi ari Nuan ke ngukum nengeri bukai di dunya tu,

¹³lalu ngasuh kami ditinggang semua ukum ti disebut dalam Adat Moses. Datai ke diatu, O TUHAN Allah Taala kami, kami apin nguji ngelengkaka dosa kami, tauka nitihka pemendar ti diberi Nuan ngagai kami lalu ngerinduka ati Nuan.

¹⁴Nuan, O TUHAN Allah Taala kami, endang sedia deka ngukum kami, lalu Nuan udah ngukum kami, laban Nuan endang seruran ngereja utai ti ngena, lalu kami enda mendingka Nuan.

¹⁵ “O TUHAN Allah Taala kami, Nuan udah ngayanka kuasa Nuan lebuh Nuan mai bala nembiak Nuan pansut ari menua Ejip, lalu kuasa Nuan endang agi mengkang dikingatka kami. Kami udah bedosa. Kami udah salah.

¹⁶Nuan udah bejaku ngarika kami dulu menya, nya alai anang agi ringat ngagai Jerusalem. Nengeri tu endang enggi Nuan, bukit Nuan ti kudus.[16] Semua orang di menua ti ngelingi kami endang enda bebasaka Jerusalem, sereta ngeleseka bala nembiak Nuan ketegal dosa kami, enggau ketegal penyai ti udah dikereja bala aki ini kami.

¹⁷ O Allah Taala, dingaka sampi enggau peminta aku tu. Gaga baru meh Rumah Nuan ti udah rusak. Gaga iya baru ngambika semua orang deka nemu Nuan endang Allah Taala.

¹⁸ Pendingka kami, O Allah Taala. Malik ngagai kami, lalu peda meh penusah kami, enggau pemerinsa nengeri ti ngangkatka nama Nuan. Kami besampi ngagai Nuan laban Nuan endang kasih, ukai laban kami udah ngereja utai ti ngena.

¹⁹TUHAN, pendingka kami. Ampun meh kami. Dingaka kami, lalu kereja meh utai ti dipinta kami! Anang betangguh, ngambika semua orang nemu Nuan endang Allah Taala. Nengeri tu enggau bala orang tu endang enggi Nuan magang.”

²⁰Aku majak besampi, ngaku dosa aku enggau dosa bansa aku, dosa orang Israel, lalu minta TUHAN Allah Taala aku nirika baru Rumah Sembiang Iya ti kudus.

²¹ Lebuh aku benung besampi, Gabriel, ti udah dipeda aku dalam genera ti dulu, datai terebai nurun ngagai aku. Nyadi jam ba urung nya endang maya orang ngenjuk piring lemai hari.

²²Ku Gabriel nerangka ngagai aku, “Daniel, aku datai laban aku deka meri nuan penemu-dalam enggau pengelandik meretika utai.

²³Lebuh nuan belabuh mantaika peminta nuan ngagai Allah Taala, Iya nyaut nuan. Iya rinduka nuan, nya alai aku udah datai ditu madahka saut ngagai nuan. Dingaka enggau manah lebuh aku nerangka genera nya.

²⁴“Tujuh kali tujuh puluh taun nya meh pengelama ti udah diletak Allah Taala kena Iya ngelepaska bansa nuan enggau nengeri kita ke kudus tu, ari dosa enggau penyai. Dosa deka diampun, lalu pengelurus ti meruan belama iya deka didudukka, ngambika genera, enggau jaku nabi dikamatka, lalu Rumah Sembiang ti kudus[17] deka diserahka baru.

²⁵Peratika utai tu ngambika nuan mereti: Berengkah ari maya meri atur ngaga Jerusalem baru, nyentuk ngagai maya penatai tuai ke dipilih Allah Taala, tujuh kali tujuh taun deka lempus. Jerusalem deka digaga baru. Jalai raya enggau kuta ti tegap deka digaga baru, lalu nengeri nya deka mengkang bediri tujuh kali enam puluh dua taun, tang tu maya mayuh macham penusah nyadi.

²⁶Lalu ba pengujung timpuh nya, tuai ti udah dipilih Allah Taala deka dibunuh enggau nadai kebuah. Nengeri nya enggau Rumah Sembiang deka diserang lalu dirusak bala soldadu pemerintah ti bekuasa. Pengujung nya deka datai baka ai bah, mai perang enggau pengerusak ti udah disediaka Allah Taala.

²⁷ Tuai nya deka ngaga siti sempekat enggau mayuh orang dalam kandang tujuh taun, lalu lebuh setengah ari timpuh nya udah lempus, iya deka madamka semua pengawa ti beberika piring enggau pemeri. Utai Ti Balat Jai [18] deka diengkah ba legit Rumah Sembiang, lalu deka mengkang dia nyentuk ngagai maya orang ke ngengkahka iya dia besatup enggau penusah ti udah disediaka Allah Taala ke iya.”