Read Iban Hosia 1 Bible Online

Hosia 1 - Iban bible

Hosia 1

¹ Tu pesan ti diberi TUHAN ngagai Hosea anak Beeri lebuh Usiah, Jotam, Ahas, enggau Hesekiah nyadi raja menua Judah lalu Jeroboam anak Jehoas nyadi raja menua Israel.

²Lebuh TUHAN bejaku ngagai orang Israel ngena Hosea keterubah iya, Iya bejaku munyi tu, “Hosea, alai nuan jadi enggau indu sundal, ngambika iya ngadaka anak ke nyundal baka iya, laban nya gaya menua tu udah butang ketegal iya udah ninggalka Aku.”

³Nya alai Hosea lalu jadi enggau indu siku ke benama Gomer anak Diplaim. Lebuh Gomer ngadaka anak lelaki seduai iya ke tuai,

⁴ TUHAN bejaku ngagai Hosea, “Beri iya nama ‘Jesril,’ laban enda lama da agi Aku deka ngukum raja orang Israel laban aki iya Jehu udah munuh orang di Jesril.[1] Aku deka ngerusak perintah Jehu.[2]

⁵Lalu Aku deka ngerusak kuasa bala soldadu orang Israel ba Lebak Jesril lebuh maya nya ila.”

⁶Gomer ngadaka anak iya ti kedua. Sekali tu anak iya indu. Ku TUHAN bejaku ngagai Hosea, “Beri nama iya ‘Enda Dikerinduka.’ laban Aku enggai agi ngayanka pengerindu ngagai orang Israel tauka ngampun sida.

⁷Tang Aku deka ngayanka pengerindu ngagai orang Judah. Aku TUHAN Allah Taala sida deka ngelepaska sida, tang Aku enggai ngereja nya ngena perang - ngena pedang tauka panah enggau laja tauka ngena kuda tauka ngena orang ke nepan kuda.”

⁸Lebuh Gomer badu agi nusuka anak indu iya, iya lalu ngandung baru, lalu ngadaka siku agi anak lelaki.

⁹Ku TUHAN bejaku ngagai Hosea, “Beri iya nama ‘Ukai Bala Nembiak Aku,’ laban orang Israel ukai bala nembiak Aku, lalu Aku ukai Allah Taala sida.”

¹⁰ Orang Israel deka mayuh tubuh baka pasir ti di tasik, enda ulih diitung tauka ditakar. Diatu Allah Taala bejaku ngagai sida, “Kita ukai nembiak Aku,” tang maya deka datai alai Iya deka nyebut ngagai sida, “Kita tu anak Allah Taala ti idup!”

¹¹Orang Judah enggau orang Israel deka beserakup baru. Sida deka milih siku tuai, lalu sida deka sekali agi mansang sereta nyadi kaya di menua sida empu. Sigi amat, hari Jesril [3] deka nyadi hari ti besai!