Read Iban Hosia 10 Bible Online

Hosia 10 - Iban bible

Hosia 10

¹Orang Israel baka batang anggur ti lebat buah. Kaya agi sida, mayuh agi ga alta digaga sida. Mayuh agi asil ulih sida ari tanah sida, manah agi ga gaya tiang batu keramat ti disembah sida.

²Orang ke ati deka ngelakar enda tau enda natka pemerinsa ketegal dosa sida. Allah Taala deka ngerubuh alta sida, lalu ngerusak tiang keramat sida.

³Enda lama da agi orang tu deka nyebut, “Kitai nadai raja, laban kitai enda nangika TUHAN. Tang nama utai ti ulih dikereja raja ke kitai?”

⁴Sida nyebut jaku ti nadai guna, lalu sida ngaga semaya ti bula, enggau sempekat ti nadai guna. Atur ti lurus udah nyadi atur ti bingkuk, ti tumbuh baka rumput ti berachun ba tanah umai ti udah dichangkul.

⁵Orang ke diau di nengeri Samaria deka takut, lalu deka ngulitka sapi sida ti lelaki [25] ti digaga ari emas di Bet-aben.[26] Sida enggau bala imam ke bekereja ke engkeramba nya deka nyabakka iya. Sida deka duie-duie nyabak lebuh emas dikerebakka ari engkeramba nya.

⁶Engkeramba nya deka dibai ngagai menua Asiria, lalu diberi nyadika pemeri ngagai raja. Orang Israel deka dipechat, lalu sida deka malu ketegal jaku lalau ti dititihka sida.

⁷Raja sida deka ditabanka, baka ke nganyutka repik kayu ba ai.

⁸ Rumah sembiang alai orang ke nyembah engkeramba ba tuchung bukit di Aben,[27] alai orang Israel ti nyembah engkeramba, deka dirusak. Madang duri enggau rumput deka tumbuh lalu ngelamun alta sida. Orang mayuh deka ngangauka bukit, “Lalaika kami!” sereta ngangauka munggu, “Lamun kami!”

⁹ Ku TUHAN bejaku, “Orang Israel nadai nemu ngetu bedosa ngelaban Aku kenyau ari sida ke bedosa di Gibe-ah [28] suba. Nya alai, sida deka diserang di Gibe-ah.

¹⁰Aku deka nyerang [29] orang ke bedosa nya. Semua bansa deka setanah ngelaban sida, lalu sida deka diukum ketegal pemayuh dosa sida.

¹¹“Dulu menya Israel udah kala nyadi baka sapi dara ti udah dilatih, lalu sedia deka nungku gandum. Tang Aku mutuska runding deka ngengkahka kungkung ba rekung iya ti manah nya, lalu nyendiaka iya ngereja pengawa ti kasar agi. Aku udah ngasuh Judah narit pengeradu tanah, lalu Israel deka narit perengka ti dikena mechahka tanah.

¹² Ku Aku bejaku, ‘Radu tanah bukai ke diri empu, tanam pengelurus, lalu ketau berekat ti deka datai ari pengangkun kita ke Aku. Tu meh maya kita patut nguingka diri ngagai Aku ti TUHAN kita, lalu Aku deka datai lalu nuang berekat ngagai kita.’

¹³Tang kita nanam penyai, lalu kita ngetau penyai. Kita udah makai buah ti pansut ari pemula kita empu. “Laban kita ngarapka kerita perang kita [30] enggau pemayuh bala soldadu kita,

¹⁴kita deka diserang munsuh, lalu semua kuta kita deka dirusak magang. Utai ti deka nyadi nya sebaka enggau utai ti udah nyadi lebuh Raja Salman ngerusak nengeri Bet-arbel lebuh perang nya suba, lalu sida ke indai enggau bala anak sida redak lalu mati.

¹⁵Tu utai ti deka nyadi ba kita, kita orang Betel, ketegal pemalat penyai ti udah dikereja kita. Lebuh perang belabuh, raja menua Israel deka mati.”