Read Iban Hosia 11 Bible Online

Hosia 11 - Iban bible

Hosia 11

¹ “Lebuh Israel agi mit, Aku rinduka iya lalu Aku ngangauka anak Aku pansut ari menua Ejip.

²Tang makin bebendar agi Aku [31] ngangauka iya, makin jauh agi ga iya ninggalka Aku.[32] Bala nembiak Aku ngenjuk piring ngagai Baal. Sida nunu menyan ngagai engkeramba.

³Aku udah ngiring lalu ngajar orang Israel bejalai. Aku udah merap bala nembiak Aku tang sida enda ngaku Aku udah ngeraika sida.

⁴Aku nguluka sida enggau penelap sereta enggau pengerindu. Aku ngangkatka sida ngagai kuyu Aku. Aku ngenduk lalu nyapi sida.[33]

⁵“Sida enggai pulai baru ngagai Aku, nya alai sida enda tau enda pulai baru ngagai menua Ejip, lalu Asiria deka merintah sida.

⁶Nengeri sida deka diserang, lalu pintu nengeri sida deka diruntuhka. Perang nya deka ngerusak bala nembiak Aku laban sida ngereja utai ti dikumbai sida manah.

⁷Nembiak Aku keras deka ninggalka Aku. Sida ngangauka Iya ti Pemadu Tinggi, tang Iya enda ngangkatka sida.[34]

⁸ “Baka ni ku Aku ulih ngelengkaka kita, Israel? Baka ni ku Aku ulih ninggalka kita? Baka ni ku Aku ulih ngerusak kita baka Aku ti udah ngerusak Admah, tauka ngaga kita baka Aku ti udah ngaga Seboim? Ati Aku sigi enggai ngereja nya! Ati Aku kelalu balat rinduka kita.

⁹Aku enggai ngukum kita lebuh Aku ringat. Aku enggai agi ngerusak Israel, laban Aku tu Allah Taala, ukai mensia, Aku ti kudus, ke meruan enggau kita. Aku enggai datai ngagai kita lebuh Aku ringat.

¹⁰“Bala nembiak Aku deka nitihka Aku lebuh Aku negung munyi singa ngelaban munsuh sida. Sida deka beguai datai ngagai Aku ari barat.

¹¹Sida deka datai ari Ejip, ngelaju burung, enggau ari Asiria, baka burung achang. Aku deka mai sida pulai baru ngagai rumah sida empu. Aku ti TUHAN udah bejaku.”

¹²Ku TUHAN bejaku, “Orang Israel udah ngelulung Aku ngena pemula enggau jaku tipu, tang orang Judah agi nitihka Allah Taala sereta tetap ati ngagai Iya ti kudus.