Read Iban Hosia 13 Bible Online

Hosia 13 - Iban bible

Hosia 13

¹Dulu menya, lebuh raban bansa Epraim bejaku, raban bansa orang Israel ti bukai takut, laban sida bebasaka Epraim. Tang orang Israel bedosa laban sida nyembah Baal, lalu sida mati.

²Sida agi majak bedosa begagaka engkeramba ari besi ngambika bisi disembah sida - engkeramba ti digaga ari pirak, ti ditempa lalu digaga jari mensia. Lalu udah nya, ku sida bejaku, “Beri piring ngagai engkeramba tu!” Baka ni ku orang ulih nyium engkeramba nya, engkeramba ti baka gamal sapi ti lelaki?[36]

³Nya alai orang tu deka lesap baka sebun ambun pagi hari, baka ai ambun ti lesap tumu pagi. Sida baka ampa ti dikebuka ribut ari endur alai nungku, baka asap ti pansut ari serumbung.

⁴Ku TUHAN bejaku, “Aku tu TUHAN Allah Taala kita ke udah mai kita pansut ari menua Ejip. Kita nadai petara bukai tang semina Aku aja. Semina Aku aja ke Penebus kita.

⁵ Aku udah ngibun kita di menua puang ti rangkai.

⁶Tang lebuh kita datai ba menua ti manah, kita kenyang lalu puas ati, lalu udah nya kita sumbung lalu enda agi ingatka Aku.

⁷Nya alai Aku deka nerekam kita baka singa. Baka engkuli, Aku deka ngipa kita ba jalai ti ditengah kita.

⁸Aku deka nerekam kita baka beruang ti lenyau anak, lalu Aku deka nyarikka tubuh kita. Baka singa, Aku deka makai kita dia lalu nyarikka kita baka jelu babas.

⁹“Aku deka ngerusak kita orang Israel! Udah nya sapa ulih nulung kita?[37]

¹⁰ Kita minta raja enggau tuai bansa, tang baka ni ku sida ulih ngelepaska bansa kita?[38]

¹¹ Aku ringat lalu meri kita raja, lalu lebuh Aku ngeransi, Aku ngambi raja nya ari kita.

¹²“Dosa enggau penyalah orang Israel udah dituliska, lalu ditaruh teguh.

¹³Israel bisi peluang idup, tang iya kelalu beli lalu enda ngambi peluang nya - baka anak mit ke baru deka ada, ke enggai pansut ari kandung.

¹⁴ Aku enggai ngelepaska bansa orang tu ari dunya pemati tauka ngelepaska sida ari kuasa pemati. Bai kitu [39] penyakit nuan, pemati! Bai kitu [40] pengerusak nuan, dunya pemati! Aku enggai agi kasihka bansa orang tu.

¹⁵Taja pen orang Israel tumbuh baka rumput,[41] Aku deka ngasuh ribut ti angat muput ari menua puang, lalu ribut nya deka ngerangkaika mata ai enggau telaga sida. Ribut nya deka ngambi abis lengis semua utai ti berega.

¹⁶Samaria deka diukum laban iya udah angkat ngelaban Aku. Bala nembiak iya deka mati beperang. Anak mit deka diempaska ngagai tanah, lalu perut indu ke ngandung deka diperuti.”