Read Iban Hosia 2 Bible Online

Hosia 2 - Iban bible

Hosia 2

¹Nuan patut ngumbai menyadi lelaki nuan, “Ammi,” [4] lalu ngumbai menyadi indu nuan, “Ruhamah.” [5]

²Anak, alai kita bejaku enggau indai kita, taja pen iya ukai bini Aku agi, lalu Aku pen ukai laki iya agi. Bejaku enggau iya minta iya badu agi butang, lalu badu agi nyundal,

³enggai ke Aku ngeruntun kain ari tubuh iya ngambika iya telanjai baka iya ke baru ada menya. Aku deka ngaga iya nyadi menua puang, lalu iya deka mati aus.

⁴Aku enggai kasihka bala anak iya, laban sida nya anak indu sundal ti enda nemu malu.[6] Ku indai sida bejaku, “Aku deka mansang ngagai bala ambai aku, ke meri aku pemakai enggau ai, bulu bedus enggau kain linin, minyak kana enggau wain.”

⁶Nya alai Aku deka ngandang iya ngena pagar ti digaga ari kayu ti beduri, lalu ngaga dinding kena mempang jalai iya.

⁷Iya deka belanda nitihka bala ambai iya, tang enda ulih nitihka sida. Iya deka begigaka sida, tang enda tetemuka sida. Udah nya iya deka bejaku, “Aku deka pulai baru ngagai laki aku ti terubah, laban aku udah lantang agi diau begulai enggau iya suba ari aku ke diatu.”

⁸Iya sigi enggai ngaku Aku udah meri iya gandum, wain, minyak kana, enggau semua pirak enggau emas ti dikena iya nyembah Baal.

⁹Nya alai lebuh maya ngetau nyau datai, Aku deka ngambi pulai baru gandum enggau wain ti udah diberi Aku ngagai iya, lalu deka ngambi bulu bedus enggau kain linin ti udah diberi aku kena iya begari.

¹⁰Aku deka nelanjaika iya di mua bala ambai iya, lalu nadai orang ulih ngelepaska iya ari kuasa Aku.

¹¹Aku deka madamka semua gawai iya, iya nya gawai ninting taun, gawai tiap bulan, enggau pengerami Hari Sabat iya, iya nya semua gawai pengarap iya.

¹²Aku deka ngerusak kebun anggur enggau kayu ara iya ti dikumbai iya diberi bala ambai iya ketegal iya udah bekereja ke sida. Aku deka ngaga kebun anggur enggau kebun buah ara iya nyadi menua puang, laban jelu babas deka ngerusak sida.

¹³Aku deka ngukum iya laban iya udah begawai ke bala petara Baal, lebuh iya nunu menyan ngagai sida, lalu ngias diri ngena tinchin enggau batu ti berega, lalu nitihka bala ambai iya, lalu enda ingatka Aku, ku TUHAN bejaku.

¹⁴Nya alai Aku deka mai iya ngagai menua puang, laban Aku deka ngulihka ati iya baru ngena jaku ti siru.

¹⁵ Aku deka meri kebun anggur iya pulai baru ngagai iya, lalu ngaga Emperan Penusah nyadika pintu pengadang. Iya deka nyaut Aku dia baka iya ti udah nyaut Aku lebuh iya agi biak suba, lebuh iya datai ari menua Ejip.

¹⁶Udah nya baru iya deka sekali agi ngumbai Aku laki iya, lalu enda agi ngumbai Aku Baal [7] iya.

¹⁷Aku enggai sekali-kali nejuka iya nyebut nama Baal agi.

¹⁸Lebuh maya nya ila, Aku deka ngaga siti sempekat enggau semua jelu babas enggau burung, ngambika sida enda ngemediska bala nembiak Aku. Aku deka mega muai semua senyata perang ari menua tu, semua pedang enggau panah, ngambika bala nembiak Aku diau dalam pemaik enggau pengelikun.

¹⁹Israel, Aku deka ngambi nuan nyadika bini Aku dalam pengelurus, sereta tetap ati ngagai nuan. Aku deka seruran rindu sereta kasihka nuan lalu bempu nuan belama iya.

²⁰Aku deka ngamatka semaya Aku, lalu ngaga nuan nyadika enggi Aku, lalu nuan deka ngaku Aku nyadika TUHAN nuan.

²¹Lebuh maya nya ila, Aku deka nyaut sampi bala nembiak Aku Israel.[8] Aku deka ngasuh hari ujan, lalu tanah deka mansutka gandum enggau buah anggur enggau buah kana.

²³ Aku deka ngentapka bala nembiak Aku diau di menua tu, lalu ngasuh sida kaya-raja. Aku deka ngayanka pengerindu ngagai sida ke dikumbai “Enda Dikerinduka,” enggau ngagai sida ke dikumbai “Ukai Bala Nembiak Aku” Aku deka nyebut, “Kita tu nembiak Aku,” lalu sida deka nyaut, “Nuan meh Allah Taala kami.”