Read Iban Hosia 4 Bible Online

Hosia 4 - Iban bible

Hosia 4

¹Ku TUHAN bedawaka orang Israel: “Kita orang Israel, pendingka utai ti disebut TUHAN. Penetap ati enggau pengerindu nadai agi di menua tu, lalu orang Israel enda ngaku Aku nyadika Allah Taala sida.

²Sida ngaga semaya, tang sida mungkir ari semaya nya. Sida bula, munuh orang, ngenchuri, sereta butang. Penyalah sida nambah-menambah. Orang nyau betangkan-tangkan mati dibunuh.

³Nya alai menua tu deka rangkai, lalu semua utai ti idup di menua tu deka mati magang. Semua mensia, jelu, burung, enggau ikan deka mati magang.”

⁴Ku TUHAN bejaku, “Anang besalah sebarang orang! Ukai semua orang salah. Aku bejaku ngelaban kita ke imam.

⁵Siang malam kita ngereja penyalah,[11] lalu sida nabi pen nadai mega lebih ari kita. Aku deka ngerusak Israel ti indai kita.

⁶Nembiak Aku deka dirusak, laban sida enda bedulika Aku. Kita ke imam enda bedulika Aku, lalu udah nulak ajar Aku. Nya alai, Aku nulak kita, lalu enggai ngaku bala anak kita nyadika imam Aku.

⁷“Makin mayuh agi kita nyadi imam, makin mayuh agi ga kita bedosa ngelaban Aku. Nya alai Aku enggai agi masa kita, tang deka mechat kita.

⁸Kita gaga ati meda bala nembiak Aku bedosa, ngambika kita ulih ngelantangka diri ngena piring ti dikena muai dosa sida.

⁹Kita deka merinsa natka ukum baka orang mayuh! Aku deka ngukum kita ketegal penyai ti dikereja kita.

¹⁰Kita deka makai piring ti endang ungkup kita, tang kita deka mengkang lapar. Kita deka nyembah petara ti ngasuh peridi, tang kita deka mengkang nadai anak, laban kita udah ninggalka Aku lalu nitihka petara bukai.”

¹¹Ku TUHAN bejaku, “Wain, nemuka lama tauka baru, bela ngasuh bala nembiak Aku enda nemu berunding!

¹²Bala nembiak Aku betanyaka utai ngagai kayu, lalu tungkat sida meri sida leka jaku. Laban roh sundal udah nesatka sida, lalu sida udah ninggalka Allah Taala sida, ngambika sida ulih nyundal.

¹³Sida ngenjuk piring ba endur alai nyembah engkeramba ba sebelah tuchung bukit, lalu sida nunu menyan di baruh kayu ti tinggi sereta jurai ba sebelah munggu, laban endur nya lindung! Nya lalu ngujungka bala anak indu kita nyundal, lalu menantu indu kita butang.

¹⁴Aku enggai ngukum anak indu kita ketegal sida nyundal, lalu Aku pen enda mega ngukum menantu indu kita ketegal sida butang, laban laki sida empu deh beleman enggau indu sundal, lalu ngenjuk piring sama enggau indu sundal dalam rumah sembiang.[12] Pemeli kita empu deka ngujungka kita dirusak.

¹⁵“Tang taja pen kita orang Israel enda tetap ati ngagai Aku, awakka Judah enda ngereja utai ti salah baka nya. Anang nyembah di Gilgal tauka di Bet-aben,[13] tauka ngaga semaya dia dalam nama Allah Taala ti idup.

¹⁶Orang Israel kieh baka penakan kuda. Baka ni ku Aku ulih engkani sida baka ke engkani anak domba ba padang rumput?

¹⁷Orang Israel udah kena laban jayau engkeramba. Awakka sida baka nya aja.

¹⁸Lebuh sida udah balat ngirup wain, sida lalu ngelantangka diri nyundal. Sida rindu agi ke diri dipechat ari ke dibasa.

¹⁹Sida deka ditabanka, baka ke dikebuka ribut, lalu sida deka malu ke piring [14] [15] ti diberi sida ngagai engkeramba.