Read Iban Hosia 5 Bible Online

Hosia 5 - Iban bible

Hosia 5

¹“Pendingka tu ulih kita ke imam! Peratika enggau manah, kita orang Israel! Anang enda mending, kita ke ari ruang bilik raja! Kita udah dikarapka ngakim enggau lurus, tang kita empu deka diakim! Kita udah nyadi panjuk di Mispah, nyadi jarin ti ditan ba Bukit Tabor,

²nyadi lubang kebung ti dalam di nengeri Akasia,[16] lalu Aku deka ngukum semua kita.

³Aku nemu gaya bansa orang Israel. Sida enda ulih belalai ari Aku. Sida udah enda tetap ati ngagai Aku, lalu sida enda patut nyembah Aku.”

⁴Penyai ti udah dikereja orang mayuh nagang sida pulai baru ngagai Allah Taala sida. Pengawa ti besembahka engkeramba balat nanchang sida, lalu sida enda ngaku TUHAN.

⁵Penyumbung orang Israel deka besaksi ngelaban sida empu. Dosa sida empu ti ngasuh sida tesangkut lalu tetingkap, lalu orang Judah sama rebah enggau sida.

⁶Sida mai bedus enggau sapi sida lalu meri utai nya nyadika piring ngagai TUHAN, tang utai nya nadai mai penguntung ngagai sida. Sida enda ulih nemu TUHAN, laban Iya udah ninggalka sida.

⁷Sida udah enda tetap ati ngagai TUHAN. Bala anak sida ukai enggi TUHAN. Nya alai menua sida deka dirusak enda lama da agi.

⁸Sepu terumpit di Gibe-ah! Asuh orang megau orang mayuh di Ramah! Manjung meh kita di Bet-aben [17] mai orang mansang beperang! Mansang beperang meh kita bala Benjamin!

⁹Israel deka dirusak lebuh maya sida diukum. Aku madahka ngagai semua raban bansa orang Israel, utai ti tetap deka nyadi!

¹⁰Ku TUHAN bejaku, “Aku ringat laban tuai orang Judah udah nyerang menua Israel, lalu ngenchuri tanah sida. Nya alai Aku deka mubuhka pengeringat Aku ngagai sida baka ai bah.

¹¹Israel natka diri merinsa kena tekan. Iya udah lenyau menua ti endang patut diempu iya, laban iya keras minta tulung ari orang ke enda ulih nulung iya.

¹²Nya alai Aku deka ngerusak orang Israel, enggau orang Judah.

¹³“Lebuh Israel meda diri balat sakit, lalu lebuh Judah meda diri bakal, nya baru Israel mansang ngagai Asiria minta raja menua nya nulung iya, tang raja nya enda ulih ngeraika sida tauka nyumanka bakal sida.

¹⁴Aku deka nyerang orang Israel enggau orang Judah baka singa. Aku Empu deka nyarikka sida, lalu udah nya ninggalka sida. Lebuh Aku ngirit sida, nadai orang ulih ngelepaska sida.

¹⁵“Aku deka ninggalka nembiak Aku datai ke sida udah chukup merinsa ketegal dosa sida, lalu datai ngiga Aku. Lebuh sida tusah, sida nguji ngiga Aku.”