Read Iban Hosia 6 Bible Online

Hosia 6 - Iban bible

Hosia 6

¹“Aram kitai pulai baru ngagai TUHAN. Iya udah encharikka kitai, tang Iya deka ngeraika kitai. Iya udah ngemakalka kitai, tang Iya deka malut telih kitai.

²Dalam dua hari Iya deka ngidupka kitai baru; ba hari ti ketiga Iya deka ngangkatka kitai ngambika kitai tau idup di mua Iya.

³Aram kitai majak nguji meretika TUHAN. Iya tetap deka datai ngagai kitai, baka penumbuh mata hari, baka ujan ti labuh ninggang tanah.”

⁴Tang ku TUHAN bejaku, “Israel enggau Judah, nama utai ti patut dikereja Aku ngagai kita? Pengerindu kita ke Aku jampat lesap baka sebun ambun pagi hari, baka ai ambun ti lesap tumu pagi.

⁵Nya kebuah Aku udah ngasuh bala nabi Aku betemu enggau kita, mai pesan pasal ukum enggau pengerusak. Utai ti diguna Aku ari kita nya terang sereta nyata:

⁶ Aku begunaka pengerindu ti meruan belama iya, ukai piring. Aku rindu agi ke kita nemu Aku, ari kita ke meri piring tunu ngagai Aku.

⁷“Tang di Adam,[18] sida ngelanggar sempekat ti udah digaga Aku enggau sida. Dia meh endur alai sida ngayanka diri enda tetap ati ngagai Aku.

⁸Nengeri Giliat penuh laban orang ke jai enggau pemunuh.

⁹Bala sida imam nyau baka bala perumpak ke ngeramka ipa nganti orang ke mansa. Indah ba jalai raya ngagai endur ti kudus di Sekem deh sida bebunuhka orang, lalu ngereja penyalah ti besai.

¹⁰Aku bisi udah meda siti utai ti jai nyadi di menua Israel: bala nembiak Aku udah ngamahka diri besembahka engkeramba.

¹¹“Nyadi kita orang Judah, Aku udah ngeletak maya alai Aku deka mai kita pulai baru.