Read Iban Hosia 7 Bible Online

Hosia 7 - Iban bible

Hosia 7

¹“Genap kali Aku deka ngeraika Israel, lalu ngasuh sida nyadi kaya-raja baru, Aku semina tepedaka utai ti jai ti dikereja sida. Sida nipu pangan diri. Sida tama ngagai rumah orang lalu ngenchuri. Sida ngerumpak orang ba sebelah jalai raya.

²Sida ngumbai Aku enda ingatka semua penyai nya. Tang dosa ngelulung sida, lalu Aku meda dosa nya.”

³Ku TUHAN bejaku, “Orang mayuh bepekat lalu nipu raja enggau bala pemesai iya.

⁴Semua sida nya orang ke aum-juak sereta enda taluk magang. Ati sida ke begedi mau baka api ti ba dapur, ti dikena ngaga roti, api ti enda ibuh disurungka datai ke roti nya mansau.

⁵Lebuh raja ngintu pengerami iya, bala pemesai iya mabuk ngirup wain.

⁶Sida mau [19] baka api ti dikena manggang roti. Semalam-malam pengeringat sida ngungut, lalu lebuh pagi hari pengeringat nya mau baka api.

⁷“Sida balat ringat lalu munuh orang ke megai perintah. Bala raja sida udah dibunuh betangkan-tangkan, tang nadai siku orang besampi ngangauka Aku.”

⁸Ku TUHAN bejaku, “Orang Israel baka roti ti dipanggang setengah mansau. Sida begaul enggau orang bansa bukai.

⁹Sida enda nemu orang bansa bukai nginsap pengering sida. Lalu sida enda nemu pala diri nyau buban-banan.

¹⁰Penyumbung orang Israel deka besaksi ngelaban [20]sida empu; tang taja pia, sida enda pulai baru ngagai TUHAN ti Allah Taala sida, tauka ngiga Iya ketegal semua utai nya.

¹¹Israel nyau baka burung achang, beli lalu enda nemu berunding. Sida minta tulung menua Ejip, udah nya minta tulung orang Asiria!

¹²Tang lebuh sida bejalai, Aku deka nibarka jala Aku ngagai sida. Aku deka mai sida baka ke mai burung. Aku deka disiplin sida nitihka utai ti dipadahka sida ngagai gempuru sida.

¹³“Tulah meh sida, laban sida udah ninggalka Aku. Sida deka dirusak, laban sida udah angkat ngelaban Aku. Aku endang deka nebus sida, tang sida bejaku bula ngelaban Aku.

¹⁴Sida enda besampi ngagai Aku ari ati sida, tang nyungkurka diri ba peninduk sida, lalu duie-duie nyabak. Sida ngurik tubuh diri lebuh sida minta gandum enggau wain. Sida angkat ngelaban Aku!

¹⁵Aku tu ti udah matih sereta ngeringka lengan sida. Tang taja pia sida bepekat ngelaban Aku.

¹⁶Sida nguingka diri ngagai utai ti nadai guna. Sida udah nyadi baka panah ti enda menyana; bala pemesai sida deka mati laban pedang ketegal pemeli jaku sida. Lalu orang Ejip deka ketawaka sida.”