Read Iban Hosia 8 Bible Online

Hosia 8 - Iban bible

Hosia 8

¹Ku TUHAN bejaku, “Sepu terumpit kena megau orang mayuh! Bala munsuh nyerang menua Aku baka menaul, laban nembiak Aku udah ngelanggar sempekat enggau adat Aku.

²Taja pen sida ngumbai Aku Allah Taala sida, lalu ngumbai diri nembiak Aku sereta nemu Aku,

³tang sida udah nulak utai ti manah. Ketegal nya, bala munsuh sida deka begagaika sida.

⁴“Bala nembiak Aku udah milih raja, tang ukai dikemendarka Aku. Sida nuduhka orang nyadi tuai, tang ukai nitihka penemu Aku. Sida begagaka engkeramba ngena emas enggau pirak sida, kena sida ngerusak diri empu.

⁵Aku begedika sapi emas ti disembah orang di nengeri Samaria. Aku pedis ati ngagai sida. Ni pengelama baru sida deka diau tuchi

⁶di menua Israel? Engkeramba nya digaga tukang. Engkeramba nya ukai Allah Taala. Sapi emas orang Samaria deka dipechahka!

⁷Sida nanam ribut, nya alai sida deka ngetau kabut! Gandum sida nadai tangkai, lalu enda ulih mansutka roti. Tang enti sema iya ulih mansutka roti, orang bansa bukai ga deka makai roti nya.

⁸Israel nyau sebaka enggau bansa bukai, sereta nadai guna baka periuk ti udah pechah.

⁹Kieh baka keledai kampung, orang Israel bejalai ngatika diri. Sida udah mupuk ngiga tulung ari orang Asiria, lalu udah ngaji bansa bukai nyaga sida.

¹⁰Tang diatu Aku deka ngempuruka sida, lalu ngukum sida. Enda lama da agi, sida deka ngelingkang natka diri pedis lebuh raja menua Asiria nekanka pengidup sida.

¹¹“Makin mayuh agi alta digaga orang Israel kena muai dosa, makin mayuh agi ga endur alai sida bedosa!

¹²Taja pen Aku nuliska mayuh jaku ajar ke sida, tang sida ngumbai ajar nya nyelai.

¹³Taja pen sida rindu ngenjuk piring, lalu bepakaika dagin,[21] tang TUHAN enda nerima piring nya. Diatu Iya deka ngingatka penyai sida lalu ngukum sida ketegal dosa sida. Sida deka pulai baru ngagai menua Ejip!

¹⁴“Orang Israel enda ingatka Aku ti udah ngaga sida, lalu sida begagaka berapa buah istana. Orang Judah udah nambahka pemayuh nengeri ti bekuta, tang Aku deka nunu nengeri sida, lalu nganguska kuta sida.”