Read Iban Hosia 9 Bible Online

Hosia 9 - Iban bible

Hosia 9

¹Anang kita rami gaga, O Kita orang Israel! Anang rami tauka manjung baka orang bansa bukai. Kita udah ninggalka Allah Taala kita, lalu enda tetap ati ngagai Iya. Di serata menua tu kita udah nyual diri baka indu sundal ngagai petara Baal, lalu udah gaga ati ke gandum ti dikumbai kita kena iya mayar kita!

²Tang enda lama da agi kita enda chukup gandum enggau minyak kana, lalu nadai agi wain.

³Orang Israel enda agi diau di menua TUHAN, tang deka pulai baru ngagai menua Ejip, lalu di menua Asiria sida deka makai pemakai ti enda tuchi.[22]

⁴Di menua orang bansa bukai sida enda ulih ngenjuk piring wain ngagai TUHAN, lalu piring sida enda ulih ngerinduka ati Iya. Piring nya baka pemakai ti diempa orang ke ngulit. Semua orang ke makai piring nya deka kamah laban iya, laban pemakai nya semina ngenyangka sida aja. Piring nya enda datai ba Rumah TUHAN.

⁵Nama utai ti deka dikereja sida lebuh maya gawai, enggau lebuh gawai TUHAN?

⁶Laban taja pen sida enda dirusak, orang Ejip deka ngumpul sida, lalu orang Mempis deka nguburka sida. Reta tengkira pirak enggau endur alai rumah sida ke udah bediri menya, deka dilamun rumput enggau madang duri.

⁷ Maya ngukum udah datai; sida deka nerima ukum ti patut diterima sida. Sida deka nyebut, “Nabi nya beli. Iya gila.” Kita balat begedika aku laban dosa kita besai.

⁸Allah Taala udah ngirumka aku nyadi nabi ngambika aku nyadi jejaga orang Israel. Tang kita nguji manjuk aku baka ke manjuk burung di sebarang endur aku bejalai. Indah dalam Rumah Sembiang, deh orang mayuh begedika nabi.

⁹ Sida udah ngereja penyai baka ke udah dikereja di Gibe-ah.[23] Allah Taala deka ingatka dosa sida lalu ngukum sida ketegal dosa nya.

¹⁰ Ku TUHAN bejaku, “Lebuh Aku terubah tetemuka Israel, Aku asai ke tetemuka buah anggur di menua puang. Lebuh Aku terubah meda aki ini kita, Aku asai ke tepedaka buah ara ti terubah mansau. Tang lebuh sida datai ba Bukit Peor, sida berengkah nyembah Baal, lalu enda lama udah nya sida lalu nyadi jai baka petara ti dikerinduka sida.

¹¹Penampak nama Israel deka terebai kebukai baka burung, lalu sida nadai agi anak, nadai agi indu ke ngandung, nadai agi anak dikandung.

¹²Enti sida bisi anak, Aku deka ngambi anak sida, datai ke nadai siku sida agi idup. Tulah meh sida lebuh Aku ninggalka sida.”

¹³Suba aku bisi meda bala anak sida baka kayu engkerema ti ditanam ba padang ti manah [24] tang diatu Israel enda tau enda mai bala anak iya pansut ngambika sida dibunuh.

¹⁴TUHAN, kereja siti aja utai ngagai orang tu: asuh bala indu sida nadai anak, tauka enda ulih nusuka anak!

¹⁵Ku TUHAN bejaku, “Semua pengawa sida ke jai udah belabuh dikereja sida di Gilgal. Dia meh endur alai Aku ke berengkah begedika sida. Lalu ketegal penyai ti udah dikereja sida, Aku deka muru sida ari menua Aku. Aku enggai agi rinduka sida. Semua bala tuai sida udah angkat ngelaban Aku.

¹⁶Orang Israel tu baka kayu ti udah rangkai urat, lalu enda bebuah. Sida nadai ulih beranak, tang enti sema sida beranak, Aku deka munuh anak ti balat dikesayauka sida.”

¹⁷Allah Taala ti dipetuaika aku, deka nulak bala nembiak Iya, laban sida enda mendingka Iya. Sida deka belelang ngagai menua bukai.