Read Iban Joel 1 Bible Online

Joel 1 - Iban bible

Joel 1

¹Tu pesan TUHAN ngagai Joel anak Petuel.

²Pendingka tu, kita ke tuai umur. Dinga, semua orang ke di menua Judah! Kati utai ti baka tu bisi udah kala nyadi ba rambau kita, tauka ba rambau aki ini kita menya?

³Padahka pasal utai tu ngagai bala anak kita, ngambika sida madahka iya ngagai bala anak sida, lalu anak sida deka madahka iya ngagai serak ti nangkanka sida.

⁴Bala buntak inggap ba utai ti ditanam. Utai ti enda diempa bala buntak nya, deka diempa bala buntak ti datai dudi.

⁵Dani lalu nyabak meh kita ke pemabuk. Nyabak meh kita ke ngirup wain. Buah anggur ti deka dikena ngaga wain, udah rusak.

⁶ Bala buntak udah nyerang menua kitai. Sida kering, lalu enda ulih diitung. Ngeli sida tajam baka ngeli singa.

⁷Sida udah ngerusak batang anggur kitai lalu ngunyah kayu ara kitai. Sida udah ngelitika kulit kayu ara datai ke dan nyau burak magang.

⁸Nyabak meh kita, baka indu dara ke ngulitka pemati lelaki ti deka jadi enggau iya.

⁹Nadai agi gandum tauka wain diberi dalam Rumah Sembiang. Bala imam ngulit laban sida nadai agi piring diberi ngagai TUHAN.

¹⁰Umai nyau nadai agi utai tumbuh lalu tanah ngulit laban gandum udah rusak, buah anggur nyau rangkai, lalu kayu kana nyau layu.

¹¹Tusah ati meh kita orang bumai. Nyabak meh kita ke ngintu kebun anggur, laban gandum, barli, enggau semua utai ti ditanam, udah rusak magang.

¹²Batang anggur enggau batang kayu ara udah layu. Semua kayu buah udah layu lalu mati, lalu orang nadai agi gaga ati.

¹³Rasukka kain guni, lalu nyabak meh kita imam ke bekereja ba alta! Mansang meh kita ngagai Rumah Sembiang lalu ngulit semalam-malam! Laban gandum tauka wain nyau nadai agi diberi ngagai Allah Taala.

¹⁴Asuh orang mayuh bepasa. Gempuruka semua orang mayuh! Gempuruka semua tuai enggau semua orang Judah ngagai Rumah Sembiang lalu nyabak ngagai Allah Taala!

¹⁵ Naka meh pemalat hari nya! Laban Hari TUHAN nyau semak, hari alai Allah Taala ti Pemadu Bekuasa mai pengerusak.

¹⁶Kitai genung-genung nadai daya agi, meda utai ti ditanam kitai rusak. Kitai nyau nadai agi pengaga dalam Rumah Sembiang Allah Taala kitai.

¹⁷Benih mati ba tanah ti rangkai. Nadai agi gandum ditaruh, nya alai tibang ti puang rusak magang.

¹⁸Jelu sapi bemunyi laban sida merinsa laban sida nadai agi rumput di padang. Raban bedus mega merinsa.

¹⁹Aku nyabak ngagai Nuan, TUHAN, laban api udah makai rumput di menua puang, lalu nganguska semua kayu.

²⁰Indah jelu babas deh nyabak ngagai Nuan laban sungai udah rangkai.