Read Iban Joel 2 Bible Online

Joel 2 - Iban bible

Joel 2

¹Sepu terumpit kena megau orang mayuh di Sion, bukit Allah Taala ti kudus.[1] Getar-getar meh kita orang Judah! Hari TUHAN nyau deka datai.

²Hari nya deka petang, chelum laban mua hari. Bala buntak nyerang baka pemetang ti map bukit. Nadai utai udah kala nyadi baka nya lalu nadai mega utai baka nya deka nyadi udah bekau nya.

³Bala buntak nya baka api ti makai semua utai ti tumbuh. Adap ke mua, menua nya baka Kebun Eden, tang adap kebelakang, menua nya baka menua puang. Nadai utai ti enda diempa sida.

⁴ Gamal sida baka kuda. Sida belanda baka kuda perang.

⁵Lebuh sida merejuk ba sebelah tuchung bukit, sida beguru munyi kerita perang. Sida meretih munyi bangkai rumput ti diempa api. Sida bebaris baka bala soldadu ke sedia deka nyerang.

⁶Lebuh sida datai semak, semua orang takut magang. Mua semua orang nyau puchat magang.

⁷Sida nyerang baka bala soldadu. Sida niki dinding kuta baka soldadu. Semua sida maju terus ke mua lalu enda limpang

⁸tauka mempang jalai pangan diri. Sida mumbuska kuta, lalu nadai utai ulih nagang sida.

⁹Sida merejuk nyerang nengeri. Sida belanda melunggang kuta. Sida niki rumah lalu tama nengah jenila baka penchuri.

¹⁰ Tanah berenyang lebuh sida nyerang. Langit begetar. Mata hari enggau bulan nyadi petang, lalu bintang nadai agi manchar.

¹¹ TUHAN meri atur ngagai bala soldadu Iya munyi guntur. Bala soldadu ke ngasika Iya endang mayuh sereta kering. Naka meh pemalat Hari TUHAN! Sapa ulih idup?

¹²“Tang taja pia,” ku TUHAN bejaku, “pulai baru meh kita diatu ngagai Aku enggau pengabis ati kita, bepasa, nyabak sereta ngulit.

¹³Awakka ati kita ke tusah ngayanka kita amat nesal ati. Enda chukup enti kita semina nyarikka gari kita aja.” Pulai meh kita baru ngagai TUHAN Allah Taala kita. Iya nelap sereta penuh pengasih. Iya liat ati lalu ngamatka semaya Iya. Iya endang seruran sedia deka ngampun, lalu enda ngukum.

¹⁴Nyangka ukur TUHAN Allah Taala kita deka ngubah runding Iya lalu merekatka kita ngena mayuh utai ti ditanam. Nya baru kita ulih meri Iya gandum enggau wain.

¹⁵Sepu terumpit ba Bukit Sion. Asuh orang bepasa, lalu kangauka orang begempuru!

¹⁶Gelumuka orang mayuh. Tuchi orang mayuh. Bai sida ke tuai. Gempuruka sida ke agi biak enggau bala anak mit mega. Indah orang ke baru jadi melaki-bini deh enda tau enda ninggalka rumah sida lalu datai.

¹⁷ Sida imam, ke bekereja ke TUHAN ba entara alta enggau penama ngagai Rumah Sembiang, enda tau enda nyabak lalu besampi: “Kasihka bala nembiak Nuan, TUHAN. Anang nejuka bansa bukai ngelese sereta mechat kami ngena jaku, ‘Dini alai Allah Taala kita?’ ”

¹⁸Udah nya TUHAN lalu ngayanka Diri angkunka menua Iya. Iya kasihka bala nembiak Iya.

¹⁹Ku Iya nyaut sida: “Diatu Aku deka meri kita gandum, wain enggau minyak kana, lalu kita deka kenyang. Bansa bukai enda agi mechat kita.

²⁰Aku deka muai bala buntak ti datai ari utara lalu muru sida ngagai menua puang. Rintai ti di mua deka diburu ngagai Tasik Mati, lalu rintai ti di belakang diburu ngagai Tasik Tengah. Bangkai sida deka bau but. Aku deka ngerusak sida ketegal semua utai ti udah dikereja sida ngagai kita.

²¹“Tanah, anang takut, tang gaga ati sereta lantang laban TUHAN udah ngereja utai ti besai!

²²Jelu, anang takut, laban rumput nyau galak, kayu nyau bebuah, lalu buah ara enggau buah anggur nyau mayuh.

²³“Gaga ati meh kita, orang Sion. Rami gaga ati meh kita ke TUHAN Allah Taala kita; Laban Iya udah meri kita ujan lebuh musin ruruh daun enggau lebuh musin bungai, nitihka musin sida.

²⁴Pelangka deka penuh laban gandum. Ai anggur enggau minyak kana deka lilih ari pitan.

²⁵Aku deka meri pulai baru ngagai kita utai ti udah lenyau ari jari kita dalam berapa taun bala buntak makai utai ti ditanam kita. Aku Empu ti udah ngasuh bala buntak nya nyerang kita.

²⁶Diatu kita deka mayuh utai diempa, lalu kenyang. Kita deka muji TUHAN Allah Taala kita, ti udah ngereja utai ti badas ke kita. Bala nembiak Aku enda agi dipechat.

²⁷Nya baru kita orang Israel deka nemu Aku endang begulai enggau kita lalu kita deka nemu Aku ti TUHAN, endang Allah Taala kita lalu kita nadai Allah Taala bukai. Bala nembiak Aku enda agi dipechat.

²⁸ “Udah nya, Aku deka nuang Roh Aku ngagai semua mensia: bala anak lelaki kita enggau anak indu kita deka madahka pesan Aku. Bala orang ke tuai deka bemimpi, lalu orang ke biak deka meda genera.

²⁹Lebuh maya nya ila Aku deka mega nuang Roh Aku ngagai bala ulun ti lelaki enggau ti indu.

³⁰“Aku deka meri tanda ke hari nya di langit enggau di dunya. Darah deka tetumpah, lalu api enggau asap deka pegari.

³¹ Mata hari deka piam, lalu bulan deka bebali mirah baka darah sebedau Hari TUHAN ti besai sereta balat nya datai.

³² Tang semua orang ke minta tulung TUHAN deka dilepaska. Munyi ti udah disebut TUHAN, ‘Sekeda orang di Jerusalem ulih ngerarika diri. Sida ke dipilih Aku, deka idup.’ ”