Read Iban Joel 3 Bible Online

Joel 3 - Iban bible

Joel 3

¹Ku TUHAN bejaku, “Lebuh maya nya ila Aku deka ngasuh menua Judah enggau Jerusalem kaya-raja baru.

²Aku deka ngempuruka semua bansa lalu mai sida ngagai Lebak Ngakim. Dia Aku deka ngakim sida ketegal semua utai ti udah dikereja sida ngagai bala nembiak Aku, enggau ngagai pesaka Aku menua Israel, laban sida udah ngachirka orang Israel ngagai menua bukai lalu udah magi menua Aku,

³lalu udah bechabut undi kena nentuka sapa ti deka bempu nembiak Aku, lalu udah nyual nembiak ti lelaki kena meli indu sundal, lalu udah nyual indu kena meli wain lalu udah ngirup wain nya.

⁴ “Nama utai ti dikereja nuan ngagai Aku, Tire, Sidon, enggau semua menua Pilistin? Kati kita nguji malas Aku? Enti pia, Aku deka malas penyai kita enggau jampat!

⁵Kita udah ngerampas pirak enggau emas Aku, lalu udah nabanka pengaya Aku ngagai rumah engkeramba kita.

⁶Kita udah nabanka orang Judah enggau orang Jerusalem jauh ari menua sida empu, lalu nyual sida ngagai orang Gerika.

⁷Diatu Aku deka mai sida pansut ari endur alai kita ke udah nyual sida. Aku deka ngereja ngagai kita, utai ti udah dikereja kita ngagai sida.

⁸Aku deka ngasuh bala anak lelaki enggau bala anak indu kita dijual ngagai orang Judah, lalu orang Judah deka nyual sida ngagai orang Sabian ti diau jauh. Aku ti TUHAN udah bejaku.

⁹“Sebut tu ngagai semua bansa: ‘Sedia beperang. Kangauka bala raja berani kita. Gempuruka semua soldadu kita, lalu mupuk!

¹⁰ Tempa pengeradu tanah kita nyadi pedang enggau lungga ti dikena kita nyarau kayu nyadi sangkuh. Indah sida ke lemi deh enda tau enda belaban.

¹¹Datai enggau jampat [2] semua bansa ti ngelingi menua tu, lalu begempuru ba lebak.’ ” O TUHAN! Asuh meh bala soldadu Nuan nurun lalu nyerang sida!

¹²“Semua bansa enda tau enda sedia lalu datai ngagai Emperan Ngakim. Dia meh endur alai Aku ti TUHAN deka duduk ngakim semua bansa ti ngelingi menua tu.

¹³ Sida nya bansa ti jai. Pantap sida baka ke mampat jagung lebuh maya ngetau. Anchurka sida baka ke mitan buah anggur dalam pitan ti penuh datai ke wain nyau lilih.”

¹⁴Beribu-ribu iku sida begempuru ba Emperan Ngakim. Nya meh endur alai Hari TUHAN deka datai enda lama da agi.

¹⁵Mata hari enggau bulan nyau piam, lalu bintang nadai agi manchar.

¹⁶ TUHAN bejaku enggau nyawa ti inggar ari Bukit Sion. Nyawa Iya meletup munyi guntur pansut ari Jerusalem. Dunya enggau langit begetar. Tang TUHAN deka nyaga bala nembiak Iya.

¹⁷“Nya baru kita orang Israel deka nemu Aku endang TUHAN Allah Taala kita. Aku diau di Sion, bukit Aku ti kudus. Jerusalem deka nyadi nengeri ti kudus. Orang ari menua bukai enda agi ngalahka iya.

¹⁸Lebuh maya nya ila, bukit deka penuh laban kebun anggur, lalu jelu sapi deka ditemu ba semua munggu. Semua menua Judah deka mayuh ai. Siti sungai deka rarat ari Rumah Sembiang, lalu sungai nya deka mai ai ngagai Emperan Akasia.

¹⁹“Menua Ejip deka nyadi menua puang, lalu menua Edom deka nyadi tembawai ti nadai guna laban sida udah nyerang menua Judah lalu munuh orang ke nadai penyalah.

²⁰Aku deka malas ngarika[3] sida ke udah dibunuh. Aku enggai ngalau sida ke udah ngereja penyalah. Tang Judah enggau Jerusalem deka diuan belama iya, lalu Aku ti TUHAN deka diau ba Bukit Sion.”