Read Iban Amos 1 Bible Online

Amos 1 - Iban bible

Amos 1

¹ Tu jaku Amos, siku pengibun bedus ari nengeri Tekoa. Dua taun sebedau tanah berenyang nyadi, lebuh Usiah nyadi raja menua Judah lalu Jeroboam anak Jehoas nyadi raja menua Israel, Allah Taala mandangka semua utai tu ngagai Amos pasal Israel.

² Ku Amos bejaku, “TUHAN bejaku enggau nyawa ti inggar ari Bukit Sion. Nyawa Iya meletup ari Jerusalem. Padang rumput lalu rangkai, lalu rumput ba Bukit Karmel layu.”

³ Ku TUHAN bejaku, “Orang Damaskus enda ngetu-ngetu bedosa, lalu ketegal nya Aku tetap deka ngukum sida. Sida balat amat merinsaka orang Giliat.

⁴Nya alai Aku deka ngirumka api ngagai istana ti udah digaga Raja Hasael, lalu Aku deka nunu semua kuta Raja Benhadat.

⁵Aku deka mechahka pintu nengeri Damaskus, lalu muai orang ke diau ba Lebak Aben, enggau pemerintah ke di Beteden. Orang Siria deka ditabanka nyadi orang tangkap ngagai menua Kir.”

⁶ Ku TUHAN bejaku, “Orang Gasa enda ngetu-ngetu bedosa, lalu ketegal nya Aku tetap deka ngukum sida. Sida udah nabanka semua orang ari siti bansa, lalu nyual sida nyadi ulun ngagai orang Edom.

⁷Nya alai Aku deka ngirumka api ngagai dinding nengeri Gasa, lalu nunu semua kuta nengeri nya.

⁸Aku deka muai orang ke merintah di nengeri Asdot enggau Eskelon. Aku deka ngukum nengeri Ekron, lalu semua orang Pilistin ti agi idup deka mati magang.

⁹ Ku TUHAN bejaku, “Orang Tire enda ngetu-ngetu bedosa, lalu ketegal nya Aku tetap deka ngukum sida. Sida udah nabanka semua orang ari siti bansa ngagai menua Edom, lalu sida udah mungkir ari sempekat pemaik ti udah digaga sida.

¹⁰Nya alai Aku deka ngirumka api ngagai dinding kuta nengeri Tire, lalu nunu semua kuta iya.”

¹¹ Ku TUHAN bejaku, “Orang Edom enda ngetu-ngetu bedosa, lalu ketegal nya Aku tetap deka ngukum sida. Sida udah begagaika kaban belayan sida empu,[1] iya nya orang Israel, lalu nadai nemu kasihka sida. Pengeringat sida nadai besekat, lalu sida enda nemu badu ringat.

¹²Nya alai Aku deka ngirumka api ngagai nengeri Teman, lalu nunu semua kuta di Bosrah.”

¹³ Ku TUHAN bejaku, “Orang Amon enda ngetu-ngetu bedosa, lalu ketegal nya Aku tetap deka ngukum sida, laban sida udah meruti perut indu ke ngandung di Giliat, lebuh sida beperang kena sida nambahka pemesai rampa menua sida.

¹⁴Nya alai Aku deka nyelup dinding kuta nengeri Rabah, lalu api nya deka makai kuta nengeri nya. Udah nya, orang deka manjung lebuh sida beperang, lalu bamuk baka kabut.

¹⁵Raja sida enggau bala pemesai iya deka dibuai ngagai menua bukai.”