Read Iban Amos 2 Bible Online

Amos 2 - Iban bible

Amos 2

¹ Ku TUHAN bejaku, “Orang Moap enda ngetu-ngetu bedosa, lalu ketegal nya Aku tetap deka ngukum sida. Sida enda bebasaka tulang raja menua Edom tang nunu tulang nya nyadi amau.

²Aku deka ngirumka api ngagai menua Moap lalu nunu semua kuta di Keriot. Orang Moap deka mati ninga munyi orang ke beperang, lebuh bala soldadu manjung lalu terumpit disepu.

³Aku deka munuh pemerintah ke di menua Moap enggau semua tuai menua nya.”

⁴Ku TUHAN bejaku, “Orang Judah enda ngetu-ngetu bedosa, lalu ketegal nya Aku tetap deka ngukum sida. Sida udah mechat ajar Aku, lalu enda nitihka pesan Aku. Sida udah dibai tesat ulih petara ti pelesu ke dipetuaika bala aki ini sida.

⁵Nya alai Aku deka ngirumka api ngagai menua Judah, lalu nunu kuta nengeri Jerusalem.”

⁶Ku TUHAN bejaku, “Orang Israel enda ngetu-ngetu bedosa, lalu ketegal nya Aku tetap deka ngukum sida, laban sida nyual orang ke lurus kena meli pirak, enggau nyual orang ke seranta kena meli sepasang selipar, nyadi ulun orang bukai.

⁷Sida ngindik [2] orang ke lemi, enggau orang ke nadai daya, lalu ngejuka orang ke seranta. Anak enggau apai sama beleman enggau siku indu ke ulun, lalu ngamahka nama Aku ti kudus.

⁸Sida gali ngimbai alta belapikka kain ti nyadika gadai utang orang ke seranta, lalu dalam Rumah Sembiang Allah Taala sida ngirup wain ti udah dibeli ngena duit ukum orang ke berutang ba sida.

⁹ “Tang taja pia, kita ke nembiak Aku, ketegal kita meh Aku udah ngeluska orang Amor, ti tinggi baka kayu sidar, sereta kering baka kayu oak.

¹⁰Aku udah mai kita pansut ari menua Ejip, nguluka kita nengah menua puang empat puluh taun, lalu meri kita menua orang Amor nyadika menua kita.

¹¹ Aku udah milih sekeda anak kita nyadi nabi, lalu sekeda nembiak kita nyadi Nasir.[3] Kati nya enda pia, orang Israel? Aku ti TUHAN udah bejaku.

¹²Tang kita mejalka orang Nasir ngirup wain, lalu enda nyagi sida nabi madahka pesan Aku.

¹³Diatu Aku deka ngenyakka kita ke tanah, lalu kita deka bedemuh munyi kerita tarit ti sarat laban gandum.

¹⁴Indah orang ke laju belanda deh enda ulih ngerarika diri. Orang ke kering deka lembut tulang, lalu bala soldadu enda ulih ngidupka nyawa diri.

¹⁵Orang ke landik ngena panah deh enda ulih nanka diri. Orang ke laju belanda, enda ulih rari, lalu orang ke nepan kuda enda ulih rari ngidupka nyawa diri.

¹⁶Ba hari nya, indah soldadu ke pemadu berani deh deka ngelengkaka senyata sida, lalu rari.” TUHAN udah bejaku.