Read Iban Amos 3 Bible Online

Amos 3 - Iban bible

Amos 3

¹Orang Israel, pendingka pesan tu ti udah disebut TUHAN ngelaban kita, ngelaban semua orang Israel ti udah dibai Iya pansut ari menua Ejip.

²“Ari semua bansa di dunya tu, semina kita aja ti udah dipilih Aku. Nya kebuah Aku deka ngukum kita ketegal semua penyai kita.”

³Kati dua iku orang ulih begulai bejalai enti seduai iya enda besemaya dulu?

⁴Kati singa negung sebedau iya bulih jelu? Kati anak singa merengung dalam lubang iya, enti iya apin nangkap utai?

⁵Kati burung ulih disintak panjuk, enti panjuk nya apin ditan? Kati panjuk ulih ingkas ngapa, enti utai nadai ngingkaska iya?

⁶Kati orang ke di nengeri enda takut lebuh terumpit begau disepu? Kati penusah ti besai ulih nyadi dalam nengeri, enti enda ari asuh TUHAN?

⁷TUHAN ti Pemadu Tinggi nadai kala ngereja utai ngapa enti Iya empai mandangka resia Iya dulu ngagai bala nembiak Iya, iya nya sida nabi.

⁸Lebuh singa negung, sapa enda takut? Lebuh TUHAN ti Pemadu Tinggi udah bejaku, sapa ulih nagang diri benabi?

⁹Bejaku ngagai sida ke diau di istana menua Ejip enggau di Asdot: “Begempuru ba munggu ngelingi Samaria, lalu peda pemalat penyarut enggau penyalah ti dikereja orang dia.”

¹⁰Ku TUHAN bejaku, “Orang tu ngisi rumah sida enggau utai ti dirampas enggau dirumpak sida. Sida enda nemu jalai idup enggau ati ti betul.

¹¹Nya alai munsuh deka ngelulung menua sida, ngerusak kuta sida, lalu ngerumpak utai ari rumah sida.”

¹²Ku TUHAN bejaku, “Baka pengibun bedus ke semina ulih ngelepaska dua iti kaki, tauka siti pending bedus ari nyawa singa, baka nya meh gaya orang Israel, ke nyandih ba kerusi-panjai sida di Samaria, deka dilepaska.

¹³Ku TUHAN ti Pemadu Bekuasa bejaku, “Pendingka diatu, lalu beri jaku tangkan ngagai bala peturun Jakop:

¹⁴ Lebuh Aku ngukum orang Israel ketegal dosa sida, Aku deka ngerusak semua alta di Betel. Sukut semua alta deka dipatahka, lalu labuh ke tanah.

¹⁵Aku deka ngerusak rumah ti dikena orang lebuh musin chelap enggau lebuh musin panas. Rumah ti dilagu enggau gading, deka nyadi tembawai. Semua rumah ti besai, deka dirusak magang.”