Read Iban Amos 5 Bible Online

Amos 5 - Iban bible

Amos 5

¹Orang Israel, pendingka leka sabak ti dikena aku ngenang pasal kita:

²Israel ti dara bungas, udah rebah, lalu enda angkat agi! Iya ditinggalka garing-garing ba tanah, lalu nadai orang ngangkatka iya.

³Laban ku TUHAN ti Pemadu Tinggi bejaku, “Sebuah nengeri di menua Israel ngirumka seribu iku soldadu, tang ka semina seratus iku aja ulih mulaika diri. Sebuah agi nengeri ngirumka seratus iku, tang ka semina sepuluh iku aja ulih mulaika diri.”

⁴Laban ku TUHAN bejaku ngagai orang Israel, “Datai ngagai Aku, nya baru kita idup.

⁵Anang besembah di Beer-seba. Anang nguji ngiga Aku di Betel, laban Betel deka lesap. Anang mansang ngagai Gilgal, laban orang ke diau dia deka diukum lalu dibuai ngagai menua bukai.”

⁶Datai ngagai TUHAN, nya baru kita idup. Enti kita enda datai ngagai Iya, Iya deka nurun baka api ngagai orang Israel. Api nya deka nganguska orang di Betel, lalu nadai orang ulih madamka iya.

⁷Tulah meh kita ke meri atur ti enda lurus, lalu enda begunaka pengelurus di dunya tu!

⁸ TUHAN udah ngaga bintang, Bintang Tujuh enggau Bintang Banyak. Iya ngubah pemetang nyadi penampak siang hari lalu siang hari nyadi malam. Iya ngangauka ai tasik lalu mubuhka ai nya ngagai dunya. Nama Iya TUHAN.

⁹Iya ngerusak orang ke kering lalu ngerusak kuta sida.

¹⁰Kita begedika orang ke mantah atur ti enda lurus, lalu madahka utai ti bendar dalam kot.

¹¹Kita udah nekanka pengidup orang ke seranta, lalu ngerumpak gandum ari sida. Nya alai kita enda ulih diau dalam rumah batu ti digaga kita, tauka ngirup wain ari kebun anggur ti ditanam kita.

¹²Aku nemu penyai dosa kita, enggau pemayuh penyalah ti udah dikereja kita. Kita merinsaka orang ke manah, makai suap, lalu nagang orang ke seranta bulih atur ti lurus dalam kot.

¹³Nya alai, orang ke pintar enda bemunyi lebuh maya ti baka nya!

¹⁴Kita patut ngereja utai ti ngena, ukai ngereja penyai, ngambika kita ulih idup. Nya baru TUHAN Allah Taala ti Pemadu Bekuasa deka meruan enggau kita, munyi ti ku kita.

¹⁵Begedika utai ti jai, rinduka utai ti ngena, lalu beri atur ti lurus dalam kot. Nyangka ukur TUHAN deka kasihka orang Israel ti agi idup.

¹⁶Nya alai ku TUHAN ti Pemadu Bekuasa bejaku, “Orang deka beterauh nyabak tusah ati ba sebelah jalai raya di nengeri. Indah orang bumai deh deka dibai, sama enggau orang ke tukang sabak, ngulitka orang ke mati.

¹⁷Orang deka beterauh nyabak ba semua kebun anggur. Semua utai tu deka nyadi, laban Aku deka datai ngukum kita.” TUHAN udah bejaku.

¹⁸Tulah meh kita ke nganti Hari TUHAN! Nama guna hari nya ba kita? Ba kita, hari nya deka nyadi hari pemetang, ukai hari penampak.

¹⁹Hari nya deka nyadi baka orang ke ngerarika diri ari singa, lalu besatup enggau beruang! Tauka, baka orang ke pulai ke rumah, bepegai ba dinding, lalu dipantuk ular!

²⁰Hari TUHAN deka mai pemetang, ukai mai penampak. Hari nya deka piam lalu nadai penampak.

²¹ Ku TUHAN bejaku, “Aku begedika gawai pengarap kita. Aku enggai meda utai nya!

²²Lebuh kita mai piring tunu, enggau piring tepung ngagai Aku, Aku enggai nerima utai nya. Aku enggai nerima jelu ti gemu ti dienjuk kita ngagai Aku nyadika piring kita.

²³Badu agi kita belagu. Aku enggai ninga musik belikan kita.

²⁴Tang awakka atur ti lurus rarat baka ai sungai, lalu awakka pengelurus baka sungai ti enda nemu langkang.

²⁵ “Orang Israel, Aku nadai minta piring enggau pemeri dalam kandang empat puluh taun Aku ke nguluka kita nengah menua puang.

²⁶Tang diatu, laban kita udah nyembah engkeramba Sakut, ti dikumbai kita raja, enggau Kaiwan ti petara bintang kita, kita enda tau enda mai sida

²⁷lebuh Aku muai kita ngagai menua ti ngilah Damaskus,” ku TUHAN ke benama Allah Taala ti Pemadu Bekuasa bejaku.