Read Iban Amos 6 Bible Online

Amos 6 - Iban bible

Amos 6

¹Tulah meh kita ke udah ngelantangka diri diau di Sion, enggau kita ke ngasaika diri diau likun di Samaria, kita ke tuai bansa ti besai tu, kita ke digusung orang Israel lebuh sida minta saup!

²Mupuk meh kita lalu peda nengeri Kalneh. Udah nya mupuk ngagai nengeri Hamat, lalu terus ngagai nengeri Gat di menua Pilistin. Kati semua nengeri nya manah agi ari menua Judah enggau menua Israel? Kati menua sida besai agi ari menua kita?

³Kita enda arapka hari pengerusak deka datai, tang utai ti dikereja kita semina ngasuh hari nya datai semak agi.

⁴Tulah kita, kita ke gali ngunjurka diri ba peninduk kita, bepakaika dagin rusa enggau dagin anak domba!

⁵Kita rindu ngarang lagu, baka David, lalu nebah lagu nya ngena belikan.

⁶Kita ngirup wain penuh mangkuk, lalu ngena minyak wangi ti pemadu manah bau, tang kita enda ngulitka menua Israel ti nyadi tembawai.

⁷Nya alai kita deka nyadi orang ke terubah-rubah dibuai ngagai menua bukai. Gawai enggau pengerami makai besai kita deka padam.

⁸TUHAN Allah Taala ti Pemadu Bekuasa udah meri jaku tangkan tu: “Aku begedika penyumbung orang Israel. Aku pedis ati ngagai rumah limas sida. Aku deka nyerahka indu nengeri sida, enggau semua utai dalam nengeri nya, ngagai bala munsuh.”

⁹Enti sepuluh iku lelaki agi tinggal dalam siti ruang bilik, sida deka mati.

¹⁰Kaban belayan orang ke mati nya, orang ke ngatur pengawa nyenggai iya, deka mai bangkai iya pansut ari rumah nya. Kaban belayan nya deka ngangauka orang ke agi idup dalam rumah nya, “Kati bisi orang enggau nuan dia?” Orang ke dalam rumah deka nyaut, “Nadai!” Udah nya kaban iya nya deka nyebut, “Anang ragak! Kitai enda tau enda bejimat. Nyebut nama TUHAN pen enda meh tau.”[4]

¹¹Lebuh TUHAN bejaku meri atur, rumah ti besai enggau ti mit deka diredakka.

¹²Kati kuda belanda ba atas batu? Kati orang kala ngeradu tasik ngena jelu sapi? Tang taja pia, kita udah nunsangka atur ti lurus lalu ngaga iya nyadi rachun, lalu utai ti ngena nyadi utai ti salah.

¹³Kita temegah madahka diri udah ngalahka nengeri Lo-debar.[5] Ku kita temegah bejaku, “Kitai chukup kering ngalahka Karnaim.”[6]

¹⁴Ku TUHAN Allah Taala ti Pemadu Bekuasa bejaku, “Kita orang Israel, Aku deka ngasuh bala soldadu ari menua bukai nguan menua kita. Sida deka nekanka pengidup kita kenyau ari Lebo-hamat di utara nyentuk ngagai Sungai Arabah di selatan.”