Read Iban Amos 7 Bible Online

Amos 7 - Iban bible

Amos 7

¹Aku bisi siti genera ari TUHAN ti Pemadu Tinggi. Dalam genera nya aku tepedaka TUHAN nempa bala buntak lebuh rumput ti diempu raja udah dikempat, lalu rumput nya belabuh nyumbuk baru.

²Dalam genera nya aku tepedaka buntak makai semua utai ti tumbuh di menua nya, lalu ku aku bejaku, “TUHAN ti Pemadu Tinggi, ampun bala nembiak Nuan! Baka ni ku jalai sida ulih idup? Sida iya mit amat sereta lemi!”

³TUHAN lalu ngubah runding Diri, lalu bejaku, “Utai ti dipeda nuan nya, enda nyadi.”

⁴Aku lalu bisi siti agi genera ari TUHAN ti Pemadu Tinggi. Dalam genera nya aku tepedaka TUHAN nyendiaka Diri ngukum bala nembiak Iya ngena api. Api nya nganguska tasik ti besai di baruh dunya, lalu belabuh nganguska tanah.

⁵Udah nya aku lalu bejaku, “Badu agi, O TUHAN ti Pemadu Tinggi! Baka ni ku bala Nuan ulih idup? Sida iya mit amat sereta lemi!”

⁶TUHAN lalu ngubah runding Diri baru, lalu bejaku, “Utai tu pen enda mega nyadi.”

⁷Aku bisi siti agi genera ari TUHAN. Dalam genera nya aku tepedaka TUHAN bediri ngimbai siti dinding ti udah digaga belalauka tali penyukat, lalu ba jari Iya bisi siti tali penyukat.

⁸Ku Iya nanya aku, “Amos, nama utai ti dipeda nuan?” “Tali penyukat,” ku aku nyaut. Udah nya Iya lalu bejaku, “Enggau tali tu Aku nunjukka nembiak Aku bingkuk baka dinding. Aku enggai agi ngubah runding Diri ti deka ngukum sida.

⁹Endur alai peturun Isak besembah, deka dirusak. Endur ti kuduska orang Israel, deka nyadi tembawai. Aku deka madamka peturun Raja Jeroboam.

¹⁰Udah nya Amasiah, ti nyadi imam di Betel, lalu madahka ngagai Jeroboam, raja menua Israel: “Amos benung bepekat enggau orang mayuh deka angkat ngelaban nuan. Utai ti disebut iya deka ngerusak menua tu.

¹¹Tu utai ti disebut iya: ‘Jeroboam deka mati beperang, lalu orang Israel deka dibuai ari menua sida ngagai menua bukai.’ ”

¹²Udah nya Amasiah lalu bejaku enggau Amos, “Badu agi nuan benabi ditu! Pulai nuan ngagai menua Judah, lalu bantaika jaku ajar nuan din. Awakka sida ngupah nuan nyadi nabi.

¹³Anang agi benabi di Betel ditu. Tu palan alai raja besembah, rumah sembiang bansa.”

¹⁴Disaut Amos, “Aku ukai benabi ngiga upah. Aku tu pengibun bedus, lalu aku ngintu kayu ara.

¹⁵Tang TUHAN udah ngambi aku ari pengawa aku ke ngibun bedus, lalu ngasuh aku datai lalu benabi ngagai nembiak Iya Israel.

¹⁶Nya alai, diatu pendingka utai ti disebut TUHAN. Nuan ngasuh aku badu agi benabi, ngasuh aku ngetu bejaku ngelaban orang Israel.

¹⁷Nya alai, Amasiah, tu utai ti disebut TUHAN ngagai nuan, ‘Bini nuan deka nyadi indu sundal di nengeri tu, lalu bala anak nuan deka mati beperang. Menua nuan deka dibagi lalu diberi ngagai orang kapir, lalu nuan empu deka mati di menua orang kapir. Lalu orang Israel tetap deka dibuai ngagai menua bukai.’ ”