Read Iban Amos 8 Bible Online

Amos 8 - Iban bible

Amos 8

¹Aku bisi siti agi genera ari TUHAN ti Pemadu Tinggi. Dalam genera nya aku tepedaka sebakul buah.

²Ku TUHAN nanya, “Amos, nama utai ti dipeda nuan?” “Sebakul buah,” ku aku nyaut. Ku TUHAN bejaku ngagai aku, “Pengujung [7] udah datai ba bala nembiak Aku Israel. Aku enggai agi ngubah runding Diri ti deka ngukum sida.

³Ba hari nya lagu dalam istana deka bebali nyadi sabak orang ke ngulit. Bangkai mensia deka ngachir di semua endur, lalu orang enda bemunyi muai bangkai nya.”

⁴Pendingka tu, kita ke ngindik orang ke suntuk, lalu nguji ngerusak orang ke seranta di menua tu.

⁵Ku kita bejaku dalam ati diri, “Lama amat ga kitai nganti hari ti kudus tu abis, ngambika kitai ulih nyual gandum. Kemaya Hari Sabat deka abis, ngambika kitai ulih belabuh bejual baru? Nya baru kitai nyual gandum kitai ngena rega ti tinggi, ngena takar ti enda betul, lalu nginsur dachin kena ngakal orang ke meli utai.

⁶Kitai tau nyual gandum ti jai, ngena rega ti tinggi. Kitai deka ngiga orang ke seranta, ti enda ulih mayar utang diri, ti enda ulih mayar rega sepasang selipar. Udah nya kitai deka meli iya nyadika ulun kita.”

⁷TUHAN Allah Taala ke disembah orang Israel udah besumpah, “Aku deka seruran ingatka kereja sida ti jai.

⁸Nya alai tanah deka berenyang, lalu semua orang di menua tu deka tusah. Semua menua tu deka berenyang. Menua tu deka begelumbang baka Sungai Nile

⁹Maya deka datai alai Aku deka ngasuh mata hari padam lebuh tengah hari, lalu dunya petang lebuh siang hari. Aku TUHAN ti Pemadu Tinggi, udah bejaku.

¹⁰Aku deka ngubah gawai kita nyadi ulit, lalu ngubah lagu kita nyadi sabak tusah ati. Aku deka ngasuh kita ngukur pala diri, lalu ngasuh kita begari ngena kain guni, lalu kita deka nyadi baka apai indai ke ngulitka anak tunggal sida. Hari nya deka penuh laban penusah datai ke ujung.

¹¹“Maya deka datai alai Aku deka ngasuh lapar pungkang nyadi di menua tu. Mensia deka lapar, tang ukai lapar ke pemakai. Sida deka aus, tang ukai aus ke ai. Sida deka lapar enggau aus ke pesan TUHAN. Aku TUHAN ti Pemadu Tinggi, udah bejaku.

¹²Mensia deka bejalai segau-segau ari Tasik Mati ngagai Tasik Tengah, lalu udah nya mutar ari utara ngagai timur. Sida deka ngiga pesan TUHAN di semua endur, tang sida enda tetemuka pesan nya.

¹³Lebuh hari nya, indah orang ke bujang enggau sida indu ke agi biak sereta bepengerai, deh deka luput laban aus.

¹⁴Sida ke besumpah atas nama engkeramba menua Samaria, lalu nyebut, ‘Dalam nama petara Dan’ tauka ‘Dalam nama petara Beer-seba’ - sida nya deka rebah lalu enda angkat agi.”