Read Iban Amos 9 Bible Online

Amos 9 - Iban bible

Amos 9

¹Aku meda TUHAN bediri ngimbai alta. Iya meri atur tu: “Palu semua puchuk tiang Rumah Sembiang enggau naka pemalat ngambika pugu tiang berenyang. Patahka tiang nya, lalu awakka sida rebah ninggang pala mensia. Aku deka munuh sida ti bukai lebuh maya perang. Nadai siku sida ulih ngerarika diri. Nadai siku sida ulih ngidupka nyawa diri.

²Enti sida numbak lubang ngagai dunya pemati, Aku deka nangkap sida. Enti sida niki ke langit, Aku deka nurunka sida ari nya.

³Enti sida belalai ba tuchung Bukit Karmel, Aku deka ngiga sida, lalu nangkap sida. Enti sida belalai ari Aku ba buntut tasik, Aku deka ngasuh naga tasik [8] ngigit sida.

⁴Enti sida ditangkap lalu ditabanka munsuh, Aku deka ngeletak sida dibunuh. Aku udah mutuska runding deka ngerusak sida, ukai deka nulung sida.”

⁵TUHAN ti Pemadu Bekuasa negu tanah, lalu tanah berenyang. Semua orang ke diau dia ngulit magang. Semua dunya deka begelumbang baka Sungai Nile.

⁶TUHAN ngaga rumah Iya di langit, lalu ari atas dunya Iya ngengkahka kebung langit. Iya ngangauka ai tasik lalu mubuhka sida ngagai dunya. Nama Iya TUHAN!

⁷Ku TUHAN bejaku, “Orang Israel, Aku berundingka kita baka Aku ke berundingka orang Etiopia Aku udah mai orang Pilistin ari Krit, enggau orang Siria ari Kir, baka Aku ti udah mai kita ari menua Ejip.

⁸Aku TUHAN ti Pemadu Tinggi, benung ngemataka perintah Israel ti bedosa tu, lalu Aku deka muai iya ari dunya tu. Tang Aku enda ngerusak semua peturun Jakop.

⁹“Aku deka meri atur, lalu ngusak orang Israel baka ke ngusak gandum dalam pengayak. Aku deka ngusak sida di semua bansa kena muai semua sida ke nadai guna.

¹⁰Bala nembiak Aku ke bedosa deka dibunuh lebuh beperang, iya nya semua sida ke nyebut, ‘Allah Taala enggai nejuka kitai bebadi.’ ”

¹¹ Ku TUHAN bejaku, “Hari deka datai alai Aku deka nirika perintah David baru, ti baka rumah ti udah tembawai. Aku deka ngaduka dinding iya, lalu ngaga iya baru. Aku deka ngaga iya baru baka gaya iya ti dulu kelia.

¹²Udah nya orang Israel deka ngambi teda menua Edom, enggau semua menua ti endang enggi Aku dulu menya,” ku TUHAN ti deka ngasuh utai tu nyadi bejaku.

¹³“Hari deka datai,” ku TUHAN bejaku, “alai gandum deka tumbuh jampat agi ari iya sempat diketau, lalu buah anggur deka jampat agi mansang ari iya sempat digaga nyadi wain. Wain ti manis deka beteritik ari bukit, lalu rarat ba sebelah munggu.

¹⁴Aku deka mai bala nembiak Aku pulai baru ngagai menua sida empu. Sida deka nirika baru nengeri sida ke udah nyadi tembawai, lalu diau dia. Sida deka nanam kebun anggur, lalu ngirup wain. Sida deka bekebun, lalu makai utai ti ditanam sida empu.

¹⁵Aku deka nanam bala nembiak Aku ba menua ti udah diberi Aku ngagai sida, lalu sida enda dichabut agi.” TUHAN Allah Taala kita udah bejaku.