Read Iban Jonah 1 Bible Online

Jonah 1 - Iban bible

Jonah 1

¹ Nyadi sekali, TUHAN bejaku ngagai Jonah anak Amitai.

²Ku TUHAN bejaku, “Alai nuan mansang ngagai Nineweh, nengeri ti besai nya, lalu bejaku ngelaban nengeri nya, laban Aku nemu penyai orang di nengeri nya.”

³Tang Jonah mupuk ngagai endur bukai, deka ngerarika diri ari TUHAN. Iya mansang ngagai Jopa, alai iya ke tetemuka sebuah kapal ti baru deka bekejang ngagai menua Spain. Iya mayar tambang diri, lalu nepan kapal nya sama enggau bala kelasi, deka belayar ngagai menua Spain, deka ngejangka diri jauh ari TUHAN.

⁴Tang TUHAN ngasuh biaubalai mangka ba tasik nya, lalu kabut balat amat nyadi datai ke kapal nya nyau deka pechah.

⁵Bala kelasi balat amat takut, lalu rauh-rauh ngangauka petara sida minta tulung. Udah nya sida muai barang [1] ari kapal nya, ngambika kapal sida lempung agi,[2] Lebuh utai tu benung nyadi, Jonah udah nurun ke baruh, gali dalam ruang kapal nya, lalu tinduk jenak amat.

⁶Lebuh kepten kapal nya tetemuka Jonah, iya lalu bejaku enggau Jonah, “Nama kebuah nuan tinduk? Angkat, lalu besampi ngagai petara nuan minta iya nulung, nyangka iya deka sinu ati ke kitai, lalu enda nejuka kitai mati.”

⁷Ku bala kelasi bejaku enggau pangan diri, “Aram kita bechabut undi kena ngiga sapa ke ngasuh kitai ditinggang penusah tu.” Sida lalu bechabut undi, lalu nama Jonah kena chabut.

⁸Nya alai sida lalu bejaku enggau iya, “Padahka ngagai kami diatu, sapa ke patut diukum ketegal utai tu? Nama kebuah nuan ditu? Datai ari ni nuan? Nama bansa nuan?”

⁹“Aku tu orang Hebrew,” ku Jonah nyaut. “Aku nyembah TUHAN Allah Taala ti di serega, ke ngaga tanah enggau tasik.”

¹⁰Jonah lalu madahka ngagai sida pasal iya ke rari ari TUHAN. Bala kelasi lalu balat amat takut, lalu ku sida bejaku enggau iya, “Utai ti dikereja nuan nya amat jai!”[3]

¹¹Kabut nyau majak balat-sebalat. Nya alai bala kelasi lalu nanya iya, “Nama utai ti patut dikereja kami ngagai nuan kena ngasuh kabut tu teduh?”

¹²Ku Jonah nyaut, “Buai aku ke tasik, nya baru tasik deka teduh, laban aku nemu, kita dipangkaka kabut tu ketegal penyalah aku.”

¹³Tang bala kelasi nguji mai kapal nya ke tebing, bedayung enggau naka pemendar sida. Tang kabut nya majak balat-sebalat, lalu sida enda ulih ngampir ngagai tebing.

¹⁴Nya alai sida nyabak ngangauka TUHAN, “O TUHAN, kami besampi, anang ngukum kami ketegal kami munuh orang tu! Nuan, O TUHAN, endang betanggungjawapka semua utai tu. Utai tu endang dikereja Nuan Empu.”

¹⁵Udah nya sida lalu nanggung Jonah, lalu muai iya ngagai tasik. Tasik lalu tekala nya teduh.

¹⁶Bala kelasi lalu balat amat takutka TUHAN, datai ke sida nyau meri siti piring, lalu besemaya deka betuaika Iya.

¹⁷ TUHAN lalu ngasuh siku ikan ti besai nelan Jonah, lalu Jonah mengkang dalam perut ikan nya tiga hari tiga malam.