Read Iban Jonah 2 Bible Online

Jonah 2 - Iban bible

Jonah 2

¹Jonah lalu besampi dalam perut ikan nya ngagai TUHAN Allah Taala iya:

²“Lebuh aku tusah, O TUHAN, aku ngangauka Nuan, lalu Nuan nyaut aku. Ari dunya pemati aku nyabak minta Nuan nulung, lalu Nuan ninga aku.

³Nuan nikauka aku ngagai tasik nyentuk ngagai tengah tasik, lalu aku dikelingi ai, lalu semua gelumbang Nuan ti besai ngelamun aku.

⁴Aku ngumbai diri udah dibuai ari Nuan lalu nadai agi meda Rumah Sembiang ti kudus.

⁵Ai ngelamun aku lalu ngasuh aku enda ulih enseput. Tasik ngelamun aku lalu rumput tasik melit pala aku.

⁶Aku tengelam terus ngagai pugu bukit ngagai menua ti bisi pintu ti dikunchi belama iya.[4] Tang Nuan, O TUHAN Allah Taala aku, mai aku pulai baru idup-idup ari tasik.

⁷Lebuh aku ngasaika nyawa diri nyau deka apus, aku lalu besampi ngagai Nuan, O TUHAN, lalu dalam Rumah Nuan ti kudus, nuan ninga aku.

⁸Orang ke nyembah engkeramba ti nadai guna udah ngelengkaka penaluk sida ke Nuan.

⁹Tang aku deka belagu muji Nuan. Aku deka ngenjuk piring ngagai Nuan lalu ngereja utai ti udah disemaya aku. Pengelepas endang datai ari TUHAN!”

¹⁰Udah nya TUHAN lalu bejaku ngagai ikan nya. Ikan nya lalu ngeluaka Jonah ba tebing tasik.