Read Iban Jonah 3 Bible Online

Jonah 3 - Iban bible

Jonah 3

¹TUHAN lalu bejaku ngagai Jonah baru.

²Ku Iya, “Alai nuan mansang ngagai Nineweh, nengeri ti besai nya, lalu padahka ngagai orang dia pesan ti udah dipadahka Aku ngagai nuan.”

³Nya alai Jonah ngasika TUHAN, lalu mansang ngagai nengeri Nineweh. Nengeri nya besai amat, pejalai tiga hari ari tisi sepiak ngagai tisi sepiak.

⁴ Jonah lalu belabuh bejalai nengah nengeri nya, lalu lebuh iya udah bejalai sehari, iya lalu bejaku enggau orang dia madahka pesan TUHAN, “Dalam empat puluh hari da agi nengeri Nineweh deka dirusak!”

⁵Orang Nineweh arapka pesan Allah Taala. Nya alai sida lalu mutuska penemu ngasuh semua orang bepasa, lalu semua orang, berengkah ari orang ke pemadu tinggi pangkat nyentuk ngagai orang ke pemadu baruh pangkat, bela ngerasukka kain guni kena sida nunjukka diri udah nesal ati.

⁶Lebuh raja nengeri Nineweh ninga pasal utai nya, iya lalu angkat ari kerusi diraja iya, muka baju panjai iya, ngerasukka kain guni, lalu duduk malai amau.

⁷Iya ngirumka atur ngagai orang di Nineweh: “Tu atur ari raja, enggau ari bala pemesai iya: Nadai mensia, tauka jelu, tauka raban bedus, tau makai utai. Sida enda tau makai tauka ngirup.

⁸Semua mensia enggau jelu enda tau enda ngerasukka kain guni. Semua orang enda tau enda bebendar besampi ngagai Allah Taala, lalu enda tau enda muai ulah ti jai, lalu badu agi mangah enggau orang.

⁹Nyangka ukur Allah Taala deka ngubah runding Diri, lalu badu agi ringat, ngambika kitai enda mati!”

¹⁰Allah Taala meda utai ti dikereja sida. Iya meda sida udah ngelengkaka ulah sida ke jai. Nya alai Iya ngubah runding Diri, lalu enda nyadi ngukum sida.