Read Iban Jonah 4 Bible Online

Jonah 4 - Iban bible

Jonah 4

¹Tang Jonah balat amat enda lantang ati meda nya, lalu iya ringat.

² Nya alai iya besampi, “TUHAN, kati aku nadai udah nyebut, sebedau aku angkat ari rumah, madahka Nuan endang deka ngereja utai nya? Nya kebuah aku enggau naka ulih rari ngagai menua Spain! Aku nemu Nuan endang Allah Taala ti penuh laban pengerindu enggau pengasih, seruran liat ati, seruran nelap, lalu seruran sedia deka ngubah runding Diri, lalu enda nyadi ngukum.

³ Nya alai, awakka aku mati, TUHAN. Manah agi aku mati ari ke idup.”

⁴Ku TUHAN nyaut, “Nuan enda patut ringat.”

⁵Jonah pansut ari nengeri nya tunga ke timur, lalu duduk. Iya ngaga siti dunju, lalu duduk belindung dalam dunju nya, deka meda utai ti deka nyadi ba nengeri nya.

⁶Udah nya TUHAN Allah Taala ngasuh sepun kayu tumbuh ngelindung Jonah, ngambika iya nyamai agi pendiau. Jonah gaga amat ati meda kayu nya.

⁷Tang ba urung dini hari pagi siti, Allah Taala ngasuh siku ulat nyerang kayu nya, lalu kayu nya mati.

⁸Lebuh mata hari nyau udah niki, Allah Taala lalu ngasuh ribut ti angat muput ari timur, lalu Jonah nyau deka luput laban mata hari ti manchar ngagai pala iya. Nya alai iya ngajihka diri mati.[5] “Manah agi aku mati, ari ke idup,” ku iya bejaku.

⁹Tang ku Allah Taala bejaku ngagai iya, “Nuan enda patut ringat ketegal kayu nya.” Disaut Jonah, “Aku endang patut ringat, chukup balat ringat!”

¹⁰Ku TUHAN bejaku ngagai iya, “Kayu nya tumbuh dalam semalam, lalu lesap hari siti. Nuan nadai ngereja utai ngagai kayu nya, lalu nuan nadai ngasuh iya tumbuh, tang taja pia nuan tusah ati ke kayu nya!

¹¹Nya alai Aku patut lebih agi kasihka nengeri Nineweh ti besai nya, laban nengeri nya bisi 120,000 iku anak mit ti nadai nemu utai, nyengkaum mayuh bala jelu!”