Read Iban Penyampau 1 Bible Online

Penyampau 1 - Iban bible

Penyampau 1

¹ Kena satu hari bulan ti kedua, kedua taun udah bekau orang Israel pansut ari menua Ejip, TUHAN bejaku ngagai Moses dalam Langkau Kain TUHAN, di menua puang Sinai. Ku Iya,

²“Itung pemayuh tubuh orang Israel, nitihka ripih suku raban bansa enggau ruang bilik sida. Tuliska nama semua orang ke lelaki,

³ke umur dua puluh taun ke atas, ti tau enggau beperang. Seduai Aron enda tau enda ngitung pemayuh tubuh sida, nitihka raban peturun enggau ruang bilik sida.

⁴Bai tuai ari siti-siti raban nyaup nuan.

⁵Tu nama orang ke udah dipilih nyaup nuan: [Ari raban bansa] — [Tuai raban bansa] Reuben — Elisur anak Sedeur Simeon — Selumil anak Jurisadai Judah — Nason anak Aminadap Isakar — Netanel anak Suar Sebulun — Eliap anak Helon Epraim — Elisama anak Amihut Manasi — Gamaliel anak Pedasur Benjamin — Abidan anak Gideoni Dan — Ahieser anak Amisadai Aser — Pagil anak Okran Gat — Eliasap anak Deuel Naptali — Ahira anak Enan

¹⁷Moses seduai Aron lalu mai orang ke udah disebut nama nya,

¹⁸lalu kena satu hari bulan ti kedua, seduai iya ngempuruka semua orang Israel, lalu nuliska nama semua orang nitihka ripih suku raban bansa enggau ruang bilik sida. Nama orang lelaki ke umur dua puluh taun ke atas lalu dituliska magang, lalu diitung,

¹⁹nitihka pesan TUHAN ngagai Moses. Nya alai Moses nuliska nama orang mayuh di menua puang Sinai.

²⁰Lelaki ti tau enggau beperang dituliska nama magang nitihka nama suku raban bansa enggau ruang bilik sida, belabuh ari raban bansa Reuben anak tuai Jakop. Baka tu ku pemayuh tubuh sida: [Raban bansa] — [Pemayuh tubuh] Reuben — 46,500 iku Simeon — 59,300 iku Gat — 45,650 iku Judah — 74,600 iku Isakar — 54,400 iku Sebulun — 57,400 iku Epraim — 40,500 iku Manasi — 35,400 iku Dan — 62,700 iku Aser — 41,500 iku Naptali — 53,400 iku Pemayuh semua sida: — 603,550 iku

⁴⁷Tang orang Lewi enda dituliska nama baka raban bansa ti bukai,

⁴⁸laban TUHAN udah nyebut ngagai Moses,

⁴⁹“Tang anang ngitung tubuh raban bansa Lewi. Nuan enda tau ngitung sida lebuh nuan ngitung tubuh orang Israel;

⁵⁰tang asuh sida ngemataka Langkau Kain Aku, enggau semua pekekas ke Langkau Kain nya. Sida deka ngesan langkau sembiang enggau semua pekekas iya, gawa dalam langkau sembiang nya, lalu nirika kem sida ngelingi langkau sembiang nya.

⁵¹Genap kali kita mindah kem, orang Lewi deka ngererak langkau sembiang nya, lalu nirika iya baru ba endur ti baru. Enti orang bukai datai semak ngagai langkau sembiang nya, orang nya deka dibunuh.

⁵²Orang Israel ti bukai deka nirika kem sida beraban-raban, nitihka raban diri empu, di baruh menira sida empu.

⁵³Tang orang Lewi deka nirika kem sida ngelingi Langkau Kain TUHAN, ngambika bisi nyaga iya, nagang orang datai semak, enggai ke Aku ringat ngagai orang Israel.”

⁵⁴Nya alai orang Israel ngereja semua utai nitihka pesan TUHAN ngagai Moses.