Read Iban Penyampau 10 Bible Online

Penyampau 10 - Iban bible

Penyampau 10

¹Ku TUHAN bejaku ngagai Moses,

²“Gaga dua iti terumpit ari pirak ti ditempa, kena nesau orang mayuh begempuru, enggau kena nesau sida ngererak kem.

³Lebuh terumpit dua iti nya disepu panjai, semua orang Israel enda tau enda begempuru ngelingi nuan ba penama ngagai Langkau Kain TUHAN.

⁴Tang lebuh semina siti aja terumpit disepu, semina tuai peturun aja begempuru ngelingi nuan.

⁵Lebuh terumpit nya disepu nerachat, raban bansa ti ba kem muak ke timur deka angkat.

⁶Lebuh terumpit nya disepu nerachat kedua kali, bala raban bansa ti diau muak ke selatan dalam kem nya deka angkat. Nya alai terumpit ti disepu nerachat nya kena ngangkatka orang ari kem,

⁷tang sepu ti panjai deka dikena nesau orang mayuh.

⁸Terumpit nya enda tau enda disepu bala anak lelaki Aron, iya nya bala imam. Adat tu enda tau enda dititihka belama iya.

⁹Lalu lebuh kita beperang dalam menua kita ngelaban munsuh ke nyerang kita, sepu terumpit tu kena megau orang beperang, ngambika Aku, TUHAN Allah Taala kita, deka ingatka kita lalu nyelamatka kita ari munsuh kita.

¹⁰Lebuh kita ngintu pengerami, baka Gawai Anak Bulan, enggau gawai pengarap ti bukai, kita mega enda tau enda nyepu terumpit lebuh kita ngenjuk piring tunu enggau piring pemaik. Nya baru Aku deka nyaup kita. Aku tu TUHAN Allah Taala kita.”

¹¹Kena dua puluh hari bulan ti kedua, kedua taun orang Israel udah pansut ari menua Ejip, mua hari ti ba atas Langkau Kain TUHAN nya angkat.

¹²Orang Israel lalu belabuh bejalai ninggalka menua puang Sinai, lalu mua hari nya ngetu ba menua puang Paran.

¹³Sida belabuh bejalai nitihka pesan ti udah diberi TUHAN ngena Moses,

¹⁴lalu genap kali sida mindah, sida nitihka tusun nya. Orang ke bejalai di baruh menira bala ti diuluka raban bansa Judah, bejalai dulu, beraban-raban, diuluka Nason anak Aminadap.

¹⁵Orang ke nyadi tuai raban bansa Isakar, nya Netanel anak Suar,

¹⁶lalu orang ke nyadi tuai raban bansa Sebulun nya Eliap anak Helon.

¹⁷Udah nya, langkau sembiang nya direrak, lalu bala raban peturun Gerson enggau bala raban peturun Merari, ke mai langkau sembiang nya, mupuk.

¹⁸Sida lalu ditangkanka orang ke bejalai di baruh menira bala ke diuluka raban bansa Reuben. Sida deka mupuk, beraban-raban. Orang ke nyadi tuai sida nya Elisur anak Sedeur.

¹⁹Orang ke nyadi tuai ke raban bansa Simeon nya Selumil anak Jurisadai.

²⁰Orang ke nyadi tuai ke raban bansa Gat nya Eliasap anak Deuel.

²¹Udah nya bala raban peturun Kohat, ari raban bansa Lewi deka mupuk, mai utai ti kudus. Lebuh sida datai ba endur alai nirika kem baru, langkau sembiang nya sigi udah tembu didirika.

²²Udah nya, orang ke bejalai di baruh menira bala ke diuluka raban bansa Epraim, deka mupuk, beraban-raban. Tuai sida nya Elisama anak Amihut.

²³Orang ke nyadi tuai ke raban bansa Manasi nya Gamaliel anak Pedasur.

²⁴Orang ke nyadi tuai ke raban bansa Benjamin nya Abidan anak Gidioni.

²⁵Ke penudi iya bendar, orang ke bejalai di baruh menira bala ke diuluka raban bansa Dan, deka mupuk beraban-raban. Sida tu orang ke nyaga semua bala mayuh, ari belakang. Tuai sida nya Ahisir anak Amisadai.

²⁶Tuai raban bansa Aser nya Pagil anak Okran,

²⁷lalu orang ke nyadi tuai raban bansa Naptali nya Ahira anak Enan.

²⁸Nya meh gaya tusun sida bejalai, beraban-raban, genap kali orang Israel mindah ari endur siti ngagai endur siti.

²⁹Ku Moses bejaku enggau ipar lelaki iya Hobap anak Jetro, orang Midian, “Kami tu baru deka mupuk ngagai endur ti udah dipadahka TUHAN, ti deka diberi Iya ngagai kami. Iya udah besemaya deka ngasuh orang Israel nyadi kaya-raja, nya alai, aram mupuk enggau kami, lalu kami deka mai kita bekunsika pengaya kami enggau kita.”

³⁰Disaut Hobap, “Enda ibuh aku mupuk enggau kita. Aku deka mulaika diri ngagai menua aku empu.”

³¹Ku Moses bejaku, “Anang ninggalka kami, laban nuan nemu endur alai kami tau nirika kem di menua puang tu, lalu nuan tau nyadi malin kami.

³²Enti nuan mupuk enggau kami, kami deka bekunsika enggau nuan semua berekat ti diberi TUHAN ngagai kami.”

³³Lebuh orang Israel ninggalka menua Sinai, bukit ti kudus nya, sida bejalai tiga hari. Peti Lampang Batu Adat TUHAN endang seruran dibai dulu ari bala sida, ngiga endur alai sida tau nirika kem.

³⁴Lebuh sida mindah ari endur siti ngagai endur siti, mua hari TUHAN mengkang ari atas sida lebuh siang hari.

³⁵ Genap kali Peti Lampang Batu Adat nya dibai mupuk, Moses deka nyebut, “Angkat, TUHAN. Pambarka munsuh Nuan, lalu asuh orang ke begedika Nuan, rari!”

³⁶Lalu genap kali Peti Lampang Batu Adat nya ngetu, Moses nyebut, “Pulai baru, TUHAN, ngagai beribu-ribu iti ruang bilik orang Israel.” [7]