Read Iban Penyampau 12 Bible Online

Penyampau 12 - Iban bible

Penyampau 12

¹Nyadi Moses udah jadi enggau indu orang Kus, lalu Miriam seduai Aron ngutuk iya pasal nya.

²Ku seduai iya, “Kati TUHAN semina bejaku ngena [9] Moses aja? Kati Iya nadai udah bejaku ngena [10] kitai?” TUHAN ninga jaku seduai iya.

³ (Moses nya orang ke baruh ati. Nadai orang ke baruh agi ati ari iya di dunya tu.)

⁴TUHAN lalu tekala nya bejaku ngagai Moses, Aron enggau Miriam, “Aku ngasuh kita tiga pansut lalu mansang ngagai Langkau Kain TUHAN.” Sida tiga lalu mansang ngagai Langkau Kain nya.

⁵TUHAN lalu nurun dalam gentilang remang, bediri ba penama ngagai Langkau Kain nya, lalu ngangau, “Aron! Miriam!” Seduai iya lalu mansang ke mua,

⁶lalu ku TUHAN bejaku, “Dingaka utai ti disebut Aku! Lebuh bala nabi kita bisi enggau kita,[11] Aku mandangka Diri ngagai sida dalam genera, lalu bejaku ngagai sida dalam mimpi.

⁷ Tang jalai Aku bejaku enggau Moses ke nembiak Aku, bisi lain mimit. Aku udah ngasuh iya nyadi tuai semua nembiak Aku orang Israel.[12]

⁸Nya alai, Aku bejaku ngagai iya betunga mua, enggau terang lalu enda ngena jaku sempama. Iya udah meda gamal Aku! Nya alai nama kebuah seduai berani bejaku ngelaban nembiak Aku Moses?”

⁹TUHAN ringat ngagai seduai iya. Nya alai, lebuh Iya mupuk

¹⁰lalu mua hari nya ninggalka Langkau Kain TUHAN, kulit Miriam lalu tekala nya dibalut penyakit kulit ti tau ngerampit. Kulit iya bebali burak baka seleju. Lebuh Aron malik ngagai iya, lalu meda iya dibalut penyakit nya,

¹¹iya lalu bejaku enggau Moses, “Tuan, anang ngasuh kami duai merinsa natka ukum tu ketegal pemeli kami duai.

¹²Anang nejuka iya nyadi baka orang ke ada mati lulus, lalu lenyau setengah ari semua isi iya.”

¹³Moses lalu nyabak ngangauka TUHAN, “O Allah Taala, geraika iya!”

¹⁴ Disaut TUHAN, “Enti apai iya udah ngeludah mua iya, iya enda tau enda natka pemalu diri tujuh hari. Nya alai, awakka iya ditejuka diau di luar kem seminggu. Udah nya baru iya tau dibai pulai baru ngagai kem.”

¹⁵Miriam lalu diasuh diau ari luar kem tujuh hari, lalu orang mayuh enda mindah ari endur nya datai ngagai maya iya dibai pulai baru ngagai kem.

¹⁶Udah nya sida lalu angkat ari Haserot, lalu nirika kem sida di menua puang Paran.