Read Iban Penyampau 13 Bible Online

Penyampau 13 - Iban bible

Penyampau 13

¹Ku TUHAN bejaku ngagai Moses,

²“Pilih siku tuai ari genap raban bansa orang Israel, lalu asuh sida matau menua Kanaan ti deka diberi Aku ngagai orang Israel.”

³Moses lalu ngereja utai ti diasuh TUHAN, lalu ngasuh bala tuai bejalai ari menua puang Paran, baka tu: [Raban bansa] — [Kepala] Reuben — Shamua anak Sakur Simeon — Sapat anak Hori Judah — Kalep anak Jepuneh Isakar — Igal anak Josep Epraim — Hosea anak Nun Benjamin — Palti anak Rapu Sebulun — Gadiel anak Sodi Manasi — Gadi anak Susi Dan — Amiel anak Gemali Aser — Setur anak Mikael Naptali — Nahbi anak Bopsi Gat — Geuel anak Machi.

¹⁶Nya meh nama orang ke diasuh Moses matau menua Kanaan. Lalu Moses nukar nama Hosea anak Nun ngagai Josua.

¹⁷Moses ngasuh sida mupuk. Ku iya bejaku enggau sida, “Bejalai kita ari tu tunga ke utara, ngagai selatan menua Kanaan,[13] lalu udah nya bejalai ngagai menua ti bebukit.

¹⁸Peratika gaya menua nya, pemayuh orang ke nguan menua nya, enggau pengering sida.

¹⁹Peratika enti menua nya manah tauka enda, sekalika orang dia diau dalam nengeri ti bekuta tauka dalam nengeri ti enda bekuta.

²⁰Peratika enti tanah dia ami, lalu bisi utan tauka nadai. Lalu anang enda mai sekeda buah ti tumbuh di menua nya.” (Buah anggur nyau deka mansau lebuh maya nya.)

²¹Sida lalu bejalai tunga ke utara, lalu meratika menua nya, belabuh ari menua puang Sin ti di selatan, nyentuk ngagai Rehob, semak Lebo-hamat di utara.

²²Sida bejalai ngagai selatan menua nya, lalu datai di Hebron, alai raban peturun Ahiman, Sheshai, enggau Talmai, iya nya peturun orang ke besai gamal ti dikumbai bansa Anakim, diau. (Nengeri Hebron digaga tujuh taun dulu agi ari nengeri Zoan di menua Ejip.)

²³Sida datai ba Lebak Eskol. Dia sida netak setangkai buah anggur ti berat amat, datai ke sida nyau ngasuh dua iku orang ngaling tangkai buah nya. Sida mega mai buah delima, enggau buah ara.

²⁴(Endur nya lalu dikumbai Lebak Eskol [14] ketegal setangkai buah anggur ti dijarau orang Israel ba endur nya.)

²⁵Lebuh sida udah matau menua nya empat puluh hari, sida lalu pulai

²⁶ngagai Moses, Aron enggau ngagai semua orang Israel di Kades, di menua puang Paran. Sida madahka pasal utai ti udah dipeda sida, lalu mantaika buah ti dibai sida.

²⁷Ku sida madahka ngagai Moses, “Kami udah datai ba menua ti diasuh nuan patau kami. Menua nya kaya sereta ami. Tu buah ari menua nya.

²⁸Tang orang ke nguan menua nya kering, lalu nengeri sida besai amat, sereta bekuta. Nambahka nya, kami meda peturun orang Anakim diau dia.

²⁹Orang Amalek diau di sitak selatan menua nya. Orang Iti, orang Jebus, enggau orang Amor diau di menua ti bebukit, lalu orang Kanaan diau ngimbai Tasik Tengah, enggau ngimbai Sungai Jordan.”

³⁰Kalep lalu minta orang badu agi ragak, lalu ku iya bejaku, “Kitai patut nyerang sida diatu, lalu ngalahka menua nya. Kitai ulih ngalahka menua nya.”

³¹Tang orang ke udah bejalai sama enggau Kalep lalu bejaku, “Anang! Kitai enda ulih nyerang sida, laban sida kering agi ari kitai.”

³²Nya alai sida lalu nusui berita ti bula ngagai orang Israel pasal menua ti udah dipatau sida. Ku sida, “Kitai nadai kitai ulih diau likun di menua nya. Indah orang ke bempu menua nya deh nadai pengelikun diau dia. Lalu semua orang ke dipeda kami tinggi amat tubuh.

³³ Kami bisi meda orang ke besai gamal dia. Sida tu peturun orang Anakim, lalu kami asai ke mit baka buntak. Nyangka nya gaya kami dipeda sida.”