Read Iban Penyampau 14 Bible Online

Penyampau 14 - Iban bible

Penyampau 14

¹Orang Israel lalu nyabak semalam-malam nya.

²Sida mutap ngelaban Moses seduai Aron. Ku sida, “Manah agi kami mati di menua Ejip, tauka mati di menua puang tu!

³Nama kebuah TUHAN mai kami ngagai menua nya? Semina ngasuh kami mati beperang, lalu bini enggau anak kami ditangkap munsuh. Enda ka manah agi enti kami nikal ngagai menua Ejip?”

⁴Ku sida bejaku enggau diri sama diri, “Aram kitai milih siku tuai, lalu pulai baru ngagai menua Ejip!”

⁵Moses seduai Aron lalu nyungkurka diri ke tanah di mua orang mayuh.

⁶Josua anak Nun, enggau Kalep anak Jepuneh, iya nya dua iku ari bala pematau, nyarikka gari diri

⁷lalu bejaku ngagai orang mayuh, “Menua ti dipatau kami nya menua ti pemadu manah.

⁸Enti TUHAN rinduka kitai, Iya deka mai kitai kin, lalu meri menua ti kaya sereta ami nya ngagai kitai.

⁹ Anang ngelaban TUHAN, lalu anang takutka orang ke nguan menua nya. Sida ulih alah laban kitai. TUHAN bisi enggau kitai, lalu Iya udah ngalahka petara ti nyaga sida. Nya alai, anang takut.”

¹⁰Tang semua orang Israel deka nuku seduai iya ngena batu, deka munuh seduai iya. Tekala nya orang Israel lalu tepedaka mulia TUHAN ayan ari atas Langkau Kain TUHAN.

¹¹Ku TUHAN bejaku ngagai Moses, “Ni pengelama orang tu agi mechat Aku? Ni pengelama sida mengkang enggai arapka Aku, taja pen Aku udah ngereja mayuh macham kereja ajih ba bala sida?

¹²Aku deka ngerusak sida ngena penyakit, lalu Aku deka ngasuh nuan nyadi apai ke siti bansa ti besai sereta bekuasa agi ari sida tu!”

¹³ Tang ku Moses bejaku enggau TUHAN, “Nuan udah mai orang tu pansut ari menua Ejip ngena kuasa Nuan. Lebuh orang Ejip ninga pasal utai ti dikereja Nuan ngagai bala nembiak Nuan,

¹⁴sida deka madahka utai nya ngagai orang ke diau di menua tu. Orang nya udah ninga pasal Nuan, TUHAN, ke bisi enggau kami, pasal Nuan ke ayan dipeda bala mayuh lebuh mua hari Nuan ngetu ba atas kami, enggau pasal Nuan ke bejalai dulu ari kami dalam gentilang remang lebuh siang hari, enggau dalam tiang api lebuh malam hari.

¹⁵Nya alai, enti nuan munuh semua nembiak Nuan, semua bansa bukai ti udah ninga pasal Nuan deka ngumbai

¹⁶Nuan udah munuh bala nembiak Nuan di menua puang laban Nuan enda ulih mai sida ngagai menua ti udah disemaya deka diberi Nuan ngagai sida.

¹⁷Nya alai, TUHAN, Aku besampi, pandangka kuasa Nuan ngagai kami, lalu kereja utai ti udah disemaya Nuan lebuh Nuan nyebut,

¹⁸ ‘Aku tu TUHAN ti lubah ringat, lalu Aku ngayanka pengerindu enggau penetap ati ti besai, lalu ngampun dosa enggau pengawa ti ngelaban. Tang Aku deka ngukum anak, uchu orang ngagai ketiga enggau keempat serak ketegal dosa apai indai sida.’

¹⁹Nya alai, TUHAN, nitihka pemesai pengerindu Nuan ti enda berubah, aku minta Nuan ngampun dosa bala orang tu, baka Nuan ti udah ngampun sida sekumbang sida ke udah pansut ari menua Ejip.”

²⁰TUHAN lalu nyaut, “Aku deka ngampun sida nitihka pinta nuan.

²¹ Tang laban Aku endang Allah Taala ti idup, lalu mulia Aku ngemenuhka dunya, Aku besemaya,

²²nadai siku ari bala orang tu deka idup lalu tama ngagai menua nya. Sida udah meda mulia Aku, enggau kereja ajih ti udah dikereja Aku di menua Ejip, enggau di menua puang, tang sida udah suah nguji pengeliat ati Aku, lalu enggai ngasika Aku.

²³Sida enda tau sekali-kali tama ngagai menua ti udah disemaya Aku ngagai aki ini sida. Nadai siku ari bala orang ke nulak Aku deka tama ngagai menua nya.

²⁴ Tang laban nembiak Aku, Kalep, lain agi perangai ari orang bukai, lalu mengkang taluk ngagai Aku, Aku deka mai iya ngagai menua ti udah dipatau iya, lalu bala peturun iya deka bempu menua nya,

²⁵iya nya lebak ti diuan orang Amalek enggau orang Kanaan diatu. Pagila kita enda tau enda nikal, lalu bejalai ngagai menua puang, nengah jalai ti mansa Tasik Mirah.”

²⁶Ku TUHAN bejaku ngagai Moses seduai Aron,

²⁷“Ni pengelama orang ke jai tu agi mutap ngelaban Aku? Aku udah ninga jaku putap sida ngelaban Aku!

²⁸Nya alai, sebut ngagai sida, ‘Laban Aku idup, Aku besumpah deka ngereja utai ti udah dipinta nuan. Aku ti TUHAN, udah bejaku.

²⁹ Kita deka mati, lalu bangkai kita deka ngachir ba sebelah menua puang tu. Laban kita udah mutap ngelaban Aku, nadai siku kita ke lebih ari dua puluh taun umur deka tama ngagai menua nya.

³⁰Aku udah besemaya ngasuh kita idup di menua nya, tang nadai siku kita deka diau dia, kelimpah ari Kalep anak Jepuneh enggau Josua anak Nun.

³¹Kita udah bejaku ngumbai anak kita deka ditangkap, tang Aku deka mai sida ngagai menua ti udah ditulak kita, lalu menua nya deka nyadika menua sida.

³²Tang kita empu deka mati di menua puang tu.

³³ Bala anak kita deka diau segau-segau di menua puang tu empat puluh taun, natka pemerinsa ketegal kita enda tetap ati ngagai Aku, nyentuk ngagai semua bala kita abis mati magang.

³⁴Kita deka betanggungjawapka dosa kita empu, setaun ke genap hari kita matau menua nya. Nya baru kita deka ensepi kati ku asai ngelaban Aku!

³⁵Aku besumpah deka ngereja utai tu ngagai kita ke jai, ti udah begempuru ngelaban Aku. Genap iku kita deka mati di menua puang tu. Aku ti TUHAN, udah bejaku.’ ”

³⁶Orang ke udah diasuh Moses matau menua nya, udah pulai baru lalu mai berita ti bula, lalu nya nyungkak orang Israel mutap ngelaban TUHAN. Nya alai TUHAN ngasuh sida diserang penyakit, lalu sida mati.

³⁸Ari dua belas iku bala pematau nya, semina Josua seduai Kalep aja agi mengkang idup.

³⁹Lebuh Moses madahka ngagai orang Israel utai ti udah disebut TUHAN, sida lalu ngulit balat amat.

⁴⁰Tumu pagi hari siti, sida lalu mansang nyerang menua ti bebukit nya. Ku sida, “Kami diatu sedia deka bejalai ngagai menua ti udah dipadahka TUHAN ngagai kitai. Kami ngaku diri udah bedosa.”

⁴¹Tang ku Moses, “Enti pia, nama kebuah kita ngelaban pesan TUHAN diatu? Kita tetap enda ulih mujur!

⁴²Anang mupuk enggai ke kita alah laban munsuh, laban TUHAN nadai enggau kita.

⁴³Lebuh kita beperang ngelaban orang Amalek enggau orang Kanaan, kita deka mati, laban TUHAN nadai enggau kita, ketegal kita enggai nitihka Iya.”

⁴⁴Tang sida majak ngemeranika diri mansang ngagai menua ti bebukit nya, taja pen Peti Lampang Batu Adat TUHAN enggau Moses enda angkat ari kem.

⁴⁵Udah nya orang Amalek enggau orang Kanaan ti diau dia nyerang lalu ngalahka sida, lalu begagaika sida nyentuk ngagai Hormah.