Read Iban Penyampau 15 Bible Online

Penyampau 15 - Iban bible

Penyampau 15

¹Ku TUHAN bejaku ngagai Moses,

²“Sebut ngagai orang Israel: Lebuh kita datai di menua ti deka alai kita diau, ti diberi Aku ngagai kita,

³lalu kita meri ngagai TUHAN siku sapi ti lelaki, siku bedus ti lelaki, siku bedus, tauka siku kambin nyadika piring tunu, tauka nyadika piring kena ngamatka semaya, tauka nyadika piring ti diberi nitihka peneka ati diri, tauka nyadika piring ti selalu diberi kita ba gawai pengarap kita, ti bebau rengut ke TUHAN,

⁴kita enda tau enda meri ngagai TUHAN sama enggau genap iku jelu nya, sekilogram tepung ti udah dichampur enggau seliter minyak kana nyadika piring gandum,

⁵enggau seliter wain nyadika piring ti diirup sama enggau genap iku anak domba nya.

⁶Enti kita meri bedus ti lelaki, beri mega dua kilogram tepung ti udah dichampur enggau satu setengah liter minyak kana nyadika piring gandum,

⁷enggau satu setengah liter wain. Bau piring tu deka ngerinduka ati TUHAN.

⁸Enti kita meri siku sapi ti lelaki nyadika piring tunu ngagai TUHAN, tauka nyadika piring kena ngamatka semaya, tauka nyadika piring pemaik,

⁹kita enda tau enda meri tiga kilogram tepung ti udah dichampur enggau 2 liter minyak kana nyadika piring gandum,

¹⁰enggau dua liter wain. Bau piring tu deka ngerinduka ati TUHAN.

¹¹Nya meh utai ti deka diberi sama enggau genap iku sapi, genap iku bedus ti lelaki, siku jelu bedus, tauka siku kambin.

¹²Enti kita meri lebih ari siku jelu, piring ti diberi sama enggau jelu nya deka ditambahka nitihka pemayuh jelu.

¹³Semua orang ke asal bansa orang Israel enda tau enda ngereja utai tu lebuh sida ngenjuk piring ti diberi ngena api. Utai nya deka bebau rengut lalu ngerinduka ati TUHAN.

¹⁴Lalu enti orang kampar ti diau begulai enggau kita, nemuka iya nya diau lama tauka enda lama enggau kita, ngenjuk piring ti diberi ngena api, piring ti bebau rengut di mua TUHAN, sida enda tau enda nitihka adat tu.

¹⁵Adat tu enda tau enda dititihka kita enggau orang kampar ti diau begulai enggau kita, datai ke belama iya. Ba mata TUHAN kita endang sebaka enggau sida.

¹⁶ Adat tu enda tau enda dititihka kita enggau sida.

¹⁷Ku TUHAN bejaku ngagai Moses

¹⁸“Sebut ngagai orang Israel: Lebuh kita datai ba menua ti alai Aku mai kita

¹⁹lalu lebuh kita makai pemakai ti ulih kita di menua nya, kita enda tau enda ngenjuk piring ngagai TUHAN.

²⁰Lebuh kita manggang roti, kita enda tau enda meri tuku roti ti keterubah, ti digaga ari gandum ti baru, nyadika piring ngagai TUHAN. Utai tu enda tau enda diberi ngena chara ti dikena kita ngenjuk piring gandum ti ditungku kita.

²¹Piring roti ti dipanggang kita enda tau enda diberi kita ngagai TUHAN, datai ke belama iya.

²²“Tang enti sema orang, enggau ukai sengaja, enda ingat nitihka sekeda ari adat tu ti udah disebut TUHAN ngagai Moses,

²³semua utai ti udah dipesanka TUHAN ngagai kita ngena Moses, kenyau ari maya TUHAN meri pesan nya enggau udah lepas nya, dalam semua serak orang ke dalam bansa kita,

²⁴enti penyalah nya ukai dikereja orang Israel enggau sengaja, semua sida enda tau enda meri siku sapi ti lelaki nyadika piring tunu, ti bebau rengut, ngagai TUHAN, sama enggau piring gandum enggau ari wain sida nitihka adat, enggau siku kambin ti lelaki nyadika piring pengampun dosa.

²⁵Imam deka ngereja pengawa nuchi orang Israel, lalu sida deka diampun, laban penyalah nya ukai dikereja sida enggau sengaja, lalu sida udah mai piring pengampun dosa nyadika piring ti diberi ngena api ti diberi ngagai TUHAN.

²⁶Semua orang Israel, enggau semua orang kampar ti diau begulai enggau sida, deka diampun magang, laban semua sida nya udah sama enggau ngereja penyalah nya.

²⁷ “Enti kita bedosa, tang ukai enggau sengaja, kita enda tau enda meri siku kambin indu ke umur setaun nyadika piring pengampun dosa.

²⁸Imam deka ngereja pengawa nuchi kita ari dosa kita, ba alta, ngambika kita diampun.

²⁹Atur tu mega deka dititihka semua orang ke enda sengaja bedosa, nemuka sida nya asal orang Israel, tauka orang kampar ti diau begulai enggau sida.

³⁰Tang barang sapa bedosa enggau sengaja, nemuka sida nya asal orang Israel, tauka orang kampar, sida nya salah laban sida enda bebasaka TUHAN, lalu sida deka dibunuh,

³¹laban sida udah nulak jaku TUHAN, lalu udah sengaja ngelanggar siti ari pesan Iya. Sida deka betanggungjawapka pemati diri empu.

³²Nyadi sekali, lebuh orang Israel agi di menua puang, sida nemu orang siku ngumpul kayu api lebuh Hari Sabat.

³³Iya lalu dibai ngagai Moses, Aron enggau ngagai semua orang Israel.

³⁴Orang nya lalu kena tan, laban sida enda nemu utai ti patut dikereja sida ngagai iya.

³⁵Udah nya TUHAN lalu nyebut ngagai Moses, “Orang nya enda tau enda dibunuh. Semua orang Israel enda tau enda nuku iya ngena batu di luar kem.”

³⁶Nya alai semua orang Israel mai iya ke luar ari kem, lalu nuku iya ngena batu, datai ke mati, munyi ti udah dipesanka TUHAN ngagai Moses.

³⁷Ku TUHAN bejaku ngagai Moses,

³⁸ “Bejaku nuan ngagai orang Israel, lalu asuh sida ngaga rambing ba sukut gari sida, lalu ngelekatka tali ti biru ba siti-siti rambing nya. Sida enda tau enda ngereja nya ba genap serak sida.

³⁹Rambing nya deka dikena sida ngingatka semua pesan TUHAN, lalu ngereja pesan nya, lalu enda nitihka pengingin ati, tauka pengingin ti datai ari mata sida empu.

⁴⁰Nya alai kita deka ingat lalu ngereja semua pesan Aku, lalu nyadi kuduska Allah Taala kita.

⁴¹Aku tu TUHAN Allah Taala kita, ti udah mai kita pansut ari menua Ejip, ngambika Aku nyadi Allah Taala kita. Aku tu TUHAN Allah Taala kita.”