Read Iban Penyampau 16 Bible Online

Penyampau 16 - Iban bible

Penyampau 16

¹ Nyadi Korah anak Isar, ari raban peturun Kohat, ke ari raban bansa Lewi, enggau Datan, enggau Abiram anak Eliap, enggau On anak Pelet, ke ari raban bansa Reuben,

²mai dua ratus lima puluh iku tuai orang Israel, orang ke udah dipilih sereta tebilang nama, lalu angkat ngelaban Moses.

³Sida begempuru di mua Moses seduai Aron, lalu bejaku ngagai seduai iya, “Seduai nyau kelalu! Semua orang tu kudus magang, lalu TUHAN bisi ba tengah-tengah sida. Nya alai, nama kebuah seduai ngeninggika diri atas bala nembiak TUHAN?”

⁴Lebuh Moses ninga jaku nya, iya lalu nyungkurka diri ke tanah,

⁵ lalu ku iya bejaku ngagai Korah enggau bala iya, “Tumu pagila TUHAN deka mandangka sapa ke nembiak Iya, iya ti kudus, iya ti tau datai semak ngagai TUHAN. Barang sapa dipilih Iya, deka diasuh Iya datai semak ngagai Iya.

⁶Tumu pagila nuan enggau bala orang ke nitihka nuan mai sarang menyan, ngengkahka bara api enggau menyan ba sarang menyan nya, lalu mai utai nya ngagai TUHAN. Barang sapa dipilih TUHAN, nya meh orang ke kudus. Kita orang Lewi tu nyau kelalu!”

⁷

⁸Ku Moses bejaku ngagai Korah. “Kita orang Lewi, pendingka aku:

⁹kati kita ngumbai pekara tu mit? Kita udah diseraraka Allah Taala ke disembah orang Israel, ngambika Iya mai kita semak ngagai Iya Empu, bekereja dalam Langkau Kain TUHAN, lalu bediri di mua orang mayuh lalu bekereja ngarika sida. Kati pekara nya mit?

¹⁰Iya udah nejuka kita enggau orang Lewi datai semak ngagai Iya; lalu kita mega minta diri bekereja nyadi imam?

¹¹Nya alai nuan enggau bala nuan udah begempuru ngelaban TUHAN. Sapa Aron alai kita mutap ngelaban iya?”

¹²Udah nya Moses lalu mesanka Datan seduai Abiram, tang ku seduai iya, “Kami duai enggai datai!

¹³Kati enda chukup nuan udah mai kami pansut ari menua ti ami di menua Ejip, lalu munuh kami di menua puang tu? Kati nuan enda tau enda mega merintah kami?

¹⁴Nuan ukai mai kami ngagai menua ti ami, tauka meri kami umai enggau kebun anggur nyadika pesaka kami. Indah diatu deh nuan nguji nipu kami. Kami duai enggai datai!”

¹⁵Moses ringat, lalu bejaku ngagai TUHAN, “Anang nyambut piring ti dibai sida. Ngambi siku keledai sida, deh aku enda kala, lalu aku nadai kala ngemediska sida.”

¹⁶Ku Moses bejaku enggau Korah, “Nuan enggau orang ke nitihka nuan, enggau Aron, enda tau enda datai di mua TUHAN pagila.

¹⁷Genap iku kita enda tau enda mai sarang menyan diri, ngisi sarang menyan nya enggau menyan, lalu mai sarang menyan nya ngagai TUHAN, dua ratus lima puluh iti sarang menyan nya. Nuan enggau Aron mega enda tau enda bisi siti siku sarang menyan.”

¹⁸Nya alai sida mai sarang menyan sida, ngengkahka bara api enggau menyan ba sarang menyan nya, lalu bediri ba penama ngagai Langkau Kain TUHAN sama enggau Moses seduai Aron.

¹⁹Udah nya Korah lalu ngempuruka semua orang Israel, lalu bediri betunga mua enggau Moses seduai Aron, ba penama ngagai Langkau Kain TUHAN. Tekala nya mulia TUHAN lalu pegari di mua semua orang Israel.

²⁰TUHAN lalu bejaku ngagai Moses seduai Aron,

²¹“Seduai enda tau enda nyurutka diri ari orang tu, ngambika Aku munuh sida diatu.”

²²Tang Moses seduai Aron nyungkurka diri ke tanah, lalu bejaku, “O Allah Taala, Nuan endang pun semua pengidup. Lebuh siku ari bala kami bedosa, kati Nuan ringat ngagai semua bansa kami?”

²³Ku TUHAN bejaku ngagai Moses,

²⁴“Asuh orang mayuh ngejangka diri jauh ari langkau kain Korah, Datan enggau Abiram.”

²⁵Udah nya Moses, disempulang bala tuai orang Israel, mansang ngagai Datan seduai Abiram.

²⁶Ku Moses bejaku enggau orang mayuh, “Anang datai semak ngagai langkau kain orang ke jai nya, lalu anang negu keresa sida, enggai ke semua kita dibunuh sama enggau sida ketegal semua dosa sida.”

²⁷Nya alai sida lalu ngejangka diri jauh ari langkau kain Korah, Datan enggau Abiram. Datan enggau Abiram udah pansut, lalu bediri ba mua pintu langkau kain seduai iya, sama enggau bini anak seduai iya.

²⁸Ku Moses bejaku enggau orang mayuh, “Tu meh jalai kita deka nemu TUHAN udah ngasuh aku ngereja semua utai tu, lalu ukai nitihka peneka ati aku empu.

²⁹Enti orang tu mati baka selama, ukai laban sida diukum Allah Taala, reti nya TUHAN nadai udah ngirumka aku.

³⁰Tang enti TUHAN ngereja utai ti nadai kala udah nyadi, lalu tanah merekah lalu nelan sida enggau sida sebilik, lalu sida labuh idup-idup ngagai dunya pemati, nya baru kita deka nemu orang tu udah nulak TUHAN.”

³¹Lebuh iya baru udah tembu bejaku, tanah ti alai Datan enggau Abiram bediri lalu merekah

³²lalu nelan seduai iya sama enggau sida sebilik, enggau bala orang ke nitihka Korah, sereta enggau reta tengkira sida.

³³Nya alai sida labuh idup-idup ngagai dunya pemati, sama enggau reta tengkira sida. Tanah nya tikup baru, lalu semua sida lesap magang.

³⁴Semua orang Israel ke dia rari magang lebuh sida ninga bala sida Korah nyerauh. Ku orang mayuh manjung, “Rari! Enggai ke tanah nya nelan kitai!”

³⁵Udah nya TUHAN ngirumka api ti mau lalu nganguska dua ratus lima puluh iku orang ke udah meri menyan.

³⁶Udah nya, TUHAN bejaku ngagai Moses,

³⁷“Asuh Eleasar anak Imam Aron, mindahka sarang menyan ari bangkai orang ke udah angus, lalu ngachirka batu arang ari sarang menyan nya ba endur bukai, laban sarang menyan nya kudus.

³⁸Laban talam orang nya udah nyadi kudus laban sarang menyan nya udah dibeli ngena nyawa sida. Nya alai, awakka sarang menyan nya ditempa mipis kena ngelapis alta, laban sarang menyan nya udah diserahka di mua TUHAN. Nya alai sarang menyan nya kudus. Awakka orang Israel ingatka tu.”

³⁹Nya alai Imam Eleasar ngambi sarang menyan ti digaga ari temaga nya, lalu ngasuh orang nempa iya mipis kena ngelapis alta.

⁴⁰Utai tu nyadi kena ngajar orang Israel ke ukai ari peturun Aron, madahka sida enda tau datai semak ngagai TUHAN lalu nunu menyan di mua TUHAN, enggai ke sida mati baka Korah enggau bala iya. Semua utai tu nyadi nitihka jaku ti disebut TUHAN ngagai Eleasar ngena Moses.

⁴¹Hari siti, semua orang Israel mutap magang ngelaban Moses seduai Aron. Ku sida, “Seduai udah munuh bala nembiak TUHAN.”

⁴²Lebuh sida udah begempuru deka ngelaban Moses seduai Aron, sida nguing tunga ngagai Langkau Kain TUHAN, lalu tepedaka mua hari bisi ba atas Langkau nya; mulia TUHAN lalu pegari.

⁴³Moses seduai Aron mansang ke mua ngagai Langkau Kain TUHAN.

⁴⁴ TUHAN lalu bejaku ngagai Moses,

⁴⁵“Seduai enda tau enda nyurutka diri ari orang mayuh tu, laban Aku deka munuh sida ba endur tu diatu!” Seduai iya lalu nyungkurka diri ke tanah,

⁴⁶lalu ku Moses bejaku enggau Aron, “Bai sarang menyan nuan, lalu ambi bara api ari alta lalu engkahka bara api nya ba sarang menyan nya, tuang menyan ngagai bara api nya, lalu bai utai nya enggau jampat ngagai orang mayuh, minta TUHAN ngampun sida. Laban TUHAN udah ringat, lalu penyakit udah berengkah berampit.”

⁴⁷Aron lalu ngereja nitihka asuh Moses, lalu belanda ngagai bala orang mayuh ke begempuru dia. Lalu iya tepedaka penyakit nya endang udah berengkah berampit ba orang mayuh. Iya lalu nuang menyan ngagai sarang menyan nya, lalu minta TUHAN ngampun orang mayuh.

⁴⁸Iya lalu bediri entara orang ke mati enggau orang ke idup. Penyakit nya lalu nadai agi.

⁴⁹Pemayuh orang ke mati ketegal penyakit nya empat belas ribu tujuh ratus iku, enda ngitung orang ke mati sama enggau Korah.

⁵⁰Lebuh penyakit nya nyau nadai agi, Aron pulai baru ngagai Moses ba penama ngagai Langkau Kain TUHAN.