Read Iban Penyampau 17 Bible Online

Penyampau 17 - Iban bible

Penyampau 17

¹Ku TUHAN bejaku ngagai Moses,

²“Asuh orang Israel meri ngagai nuan dua belas iti tungkat, siti ari siku-siku tuai raban bansa. Tuliska nama orang ba tungkat sida siku-siku,

³lalu udah nya, tuliska nama Aron ba tungkat ti ngarika peturun Lewi, siti tungkat ke siku-siku tuai raban bansa.

⁴Bai semua tungkat nya ngagai Langkau Kain TUHAN, lalu engkahka tungkat nya di mua Peti Lampang Batu Adat, ba endur alai Aku ke betemu enggau nuan.

⁵Udah nya, tungkat orang ke dipilih Aku deka bekantuk. Nya meh jalai Aku deka madamka putap orang Israel ke seruran ngelaban nuan.”

⁶Nya alai Moses bejaku ngagai orang Israel, lalu tiap iku bala tuai sida meri tungkat sida ngagai iya, siti tungkat ke genap raban bansa, dua belas iti semua iya, lalu tungkat Aron diengkahka begulai enggau tungkat sida.

⁷Udah nya Moses lalu ngengkahka semua tungkat nya dalam Langkau Kain TUHAN, di mua Peti Lampang Batu Adat TUHAN.

⁸ Hari siti, lebuh Moses tama ngagai Langkau Kain TUHAN, iya meda tungkat Aron, ti ngarika raban bansa Lewi, udah bekantuk. Tungkat nya udah bekuntum, bebungai, lalu mansutka buah almon ti mansau!

⁹Moses mai semua tungkat nya, lalu mandangka semua tungkat nya ngagai orang Israel. Sida meda utai ti udah nyadi, lalu genap iku bala tuai bela ngambi tungkat diri.

¹⁰Ku TUHAN bejaku ngagai Moses, “Engkahka tungkat Aron baru di mua Peti Lampang Batu Adat. Tungkat tu deka disimpan kena nangkan orang Israel ke ngelaban TUHAN, sida deka mati enti sida enda badu mutap.”

¹¹Moses lalu ngereja nitihka pesan TUHAN.

¹²Ku orang Israel bejaku enggau Moses, “Mati meh kami tu!

¹³Enti orang ke datai semak ngagai langkau sembiang nya enda tau enda mati, mati magang meh kami tu!”