Read Iban Penyampau 18 Bible Online

Penyampau 18 - Iban bible

Penyampau 18

¹Ku TUHAN bejaku ngagai Aron, “Nuan, bala anak lelaki nuan, enggau orang Lewi deka betanggungjawapka penyalah ti besangkut-paut enggau pengawa ti dikereja dalam Langkau Kain Aku, tang semina nuan, enggau bala anak lelaki nuan aja deka betanggungjawapka penyalah ti besangkut-paut enggau pengawa imam.

²Bai kaban belayan nuan, iya nya orang Lewi, bekereja sama enggau nuan, ngambika sida nyaup nuan lebuh nuan enggau bala anak lelaki nuan bekereja dalam Langkau Kain TUHAN.

³Sida enda tau enda ngereja pengawa sida ke nuan, lalu betanggungjawapka semua pengawa dalam Langkau Kain nya, tang sida enda tau negu utai ti kudus dalam Endur ti Kudus, tauka negu alta. Enti sida negu utai nya, sida enggau nuan empu, deka dibunuh.

⁴Sida enda tau enda gawa sama enggau nuan, lalu ngereja semua pengawa dalam Langkau Kain TUHAN. Tang orang bukai enda tau bekereja enggau nuan.

⁵Semina nuan enggau bala anak lelaki nuan aja deka betanggungjawapka semua pengawa dalam Endur ti Kudus enggau ba alta, ngambika Aku enda agi ringat ngagai orang Israel.

⁶Aku tu ti udah milih kaban belayan nuan, iya nya orang Lewi, ari semua orang Israel, nyadika pemeri ti diserahka ngagai nuan. Sida udah diserahka ngagai Aku, ngambika sida ulih ngereja pengawa sida dalam Langkau Kain TUHAN.

⁷Tang semina nuan enggau bala anak lelaki nuan aja deka betanggungjawapka semua pengawa imam ti besangkut-paut enggau alta, sereta enggau semua utai ba Endur ti Pemadu Kudus. Semua utai tu nyadika tanggungjawap nuan magang, laban Aku udah meri ngagai nuan pengawa nyadi imam nyadika pemeri nuan. Orang bukai enda tau bekereja dia. Enti sida datai semak ngagai Endur ti Pemadu Kudus nya, sida deka dibunuh.”

⁸Ku TUHAN bejaku ngagai Aron, “Ingat, Aku meri ngagai nuan semua piring ti enda ditunu ti diberi ngagai Aku. Aku meri utai nya ngagai nuan, enggau ngagai peturun nuan, nyadika ungkup kita belama iya.

⁹Ari semua piring ti pemadu kudus, ti enda ditunu ba alta, tu bagi piring ti diempu nuan: piring gandum, piring pengampun dosa, enggau piring kena bebayar. Semua utai ti diberi ngagai Aku, ti nyadika piring ti kudus, diempu nuan enggau bala anak lelaki nuan.

¹⁰Kita enda tau enda makai utai nya ba endur ti kudus, lalu semina orang ke lelaki aja tau makai utai nya. Kita enda tau enda ngumbai utai nya kudus.

¹¹“Nambahka nya, semua pemeri bukai ti diberi orang Israel ngagai Aku, endang enggi nuan magang. Aku meri utai nya ngagai nuan, ngagai anak lelaki nuan, enggau ngagai anak indu nuan, belama iya. Semua kita sebilik ke tuchi, tau makai utai nya.

¹²“Aku meri ngagai nuan semua utai ti pemadu manah ari buah bungas ti diberi orang Israel ngagai Aku genap taun, iya nya, minyak kana, wain, enggau gandum.

¹³Semua utai nya enggi nuan magang. Semua kita sebilik ke tuchi, tau makai utai nya.

¹⁴ “Semua utai ti udah diserahka ngagai Aku, endang enggi nuan magang.

¹⁵“Semua anak tuai mensia tauka jelu ti diserahka orang Israel ngagai Aku, endang enggi nuan magang. Tang nuan enda tau enda nyambut bayar ti dikena nebus anak tuai mensia, lalu nyambut mega bayar ti dikena orang nebus genap iku anak tuai jelu ti tuchi.

¹⁶Anak mensia deka dibeli pulai baru lebuh umur iya sebulan, ngena rega ti udah ditetapka, iya nya lima singkap pirak, nitihka atur ti udah diletak dalam Langkau Kain TUHAN.

¹⁷Tang anak tuai jelu sapi, bedus, enggau kambin, enda tau dibeli pulai baru. Sida nya enggi Aku siku aja. Unsaika darah sida ngagai alta, lalu tunu lemak sida nyadika piring ti diberi ngagai Aku ngena api. Bau piring nya deka ngerinduka ati Aku.

¹⁸Tang dagin sida nya endang enggi nuan, baka isi dada, isi kaki kanan ari piring ti manah nya.

¹⁹“Aku meri ngagai nuan, ngagai anak lelaki nuan, enggau ngagai anak indu nuan, belama iya, semua piring ti diberi orang Israel ngagai Aku. Tu sempekat ti enda tau dilanggar, ti digaga Aku enggau nuan, sereta enggau bala peturun nuan.”

²⁰Ku TUHAN bejaku ngagai Aron, “Kita nadai ungkup tanah di menua Israel, lalu kita pen nadai mega diberi pesaka. Semina Aku ti TUHAN aja nyadika pesaka nuan.”

²¹ Ku TUHAN bejaku, “Aku udah meri ngagai orang Lewi semua pemeri sepuluh peratus ti diberi orang Israel ngagai Aku, laban sida gawa dalam Langkau Kain TUHAN.

²²Orang Israel ti bukai enda agi tau datai semak ngagai Langkau Kain TUHAN, enggai ke sida diukum bunuh.

²³Belabuh ari diatu, semina orang Lewi aja deka ngintu Langkau Kain TUHAN, lalu betanggungjawapka semua pengawa dalam Langkau Kain nya. Adat tu mega deka dikena semua peturun nuan belama iya. Orang Lewi nadai tanah di menua Israel,

²⁴laban Aku udah meri ngagai sida semua pemeri sepuluh peratus ti diberi orang Israel ngagai Aku nyadika ungkup sida. Nya kebuah Aku madahka sida nadai pesaka tanah di menua Israel.”

²⁵Ku TUHAN bejaku ngagai Moses,

²⁶“Nambahka nya nuan enda tau enda nyebut ngagai orang Lewi munyi tu: ‘Lebuh kita nerima ari orang Israel pemeri sepuluh peratus ti diberi TUHAN ngagai kita nyadika ungkup kita, kita enda tau enda meri sepuluh peratus ari utai nya ngagai TUHAN.

²⁷Pemeri nya deka dikira sebaka enggau pemeri ti diberi orang bumai ari gandum enggau ari wain ti baru.

²⁸Nya meh jalai kita deka meri pemeri ngagai TUHAN, ari semua pemeri sepuluh peratus ti diterima kita ari orang Israel. Kita enda tau enda meri pemeri ti diserahka ngagai TUHAN tu, ngagai Imam Aron.

²⁹Ari semua pemeri ti diberi ngagai kita, serahka pemeri ti endang enggi TUHAN; utai ti pemadu manah ari semua pemeri nya enda tau enda diberi ngagai TUHAN.

³⁰Sebut ngagai sida: Lebuh kita udah nyerahka utai ti pemadu manah nya ngagai TUHAN, nya baru kita tau nyimpan laluh ari utai nya, baka orang bumai ke nyimpan utai ti laluh lebuh iya udah meri pemeri iya.

³¹Nuan enggau kita sebilik tau makai laluh ari utai nya di semua endur, laban utai nya nyadika upah kita ke gawa dalam Langkau Kain TUHAN.

³²Kita enda salah lebuh kita makai utai nya, asal ga kita udah meri utai ti pemadu manah ari utai nya ngagai TUHAN. Tang anang makai pemeri ti kudus ti diberi orang Israel, sebedau utai ti pemadu manah ari utai nya diberi ngagai TUHAN, laban nya ngamahka piring nya. Enti kita ngamahka pemeri nya, kita deka dibunuh.”