Read Iban Penyampau 20 Bible Online

Penyampau 20 - Iban bible

Penyampau 20

¹Dalam bulan ti kesatu, semua orang Israel datai di menua puang Sin, lalu nirika kem sida di Kades. Miriam mati dia, lalu dikuburka dia.

² Nyadi endur alai sida ke nirika kem nya nadai ai. Nya alai orang mayuh begempuru ngelingi Moses seduai Aron

³lalu ngutuk seduai iya: “Manah agi kami mati di mua Langkau Kain TUHAN sama enggau orang Israel ti bukai.

⁴Nama kebuah seduai mai kami ngagai menua puang tu? Ngambika kami mati ditu sama enggau jelu tupi kami?

⁵Nama kebuah seduai mai kami pansut ari menua Ejip ngagai endur ti enda manah tu? Endur tu enda manah alai nanam gandum, tauka kayu ara, tauka anggur, tauka buah delima. Indah ai irup deh nadai!”

⁶Moses seduai Aron lalu ngejangka diri ari orang mayuh, lalu bediri ba penama ngagai Langkau Kain TUHAN. Seduai iya nyungkurka diri ke tanah, lalu mulia TUHAN pegari di mua seduai iya.

⁷Ku TUHAN bejaku ngagai Moses,

⁸“Ambi tungkat ti di mua Peti Lampang Batu Adat. Udah nya, nuan enggau Aron deka ngempuruka semua orang Israel. Di mua semua sida, nuan deka bejaku ngagai batu nya, lalu ai deka pansut ari batu nya. Nya chara nuan deka ngasuh ai pansut ari batu nya, ke orang mayuh, ngambika bisi diirup sida enggau jelu sida.”

⁹Moses mansang lalu ngambi tungkat nitihka jaku TUHAN.

¹⁰Iya enggau Aron lalu ngempuruka semua orang Israel semak batu nya, lalu ku Moses bejaku ngagai sida, “Pendingka aku diatu, kita ke seruran angkat ngelaban; kati kita ngasuh kami mansutka ai ari batu tu ke kita?”

¹¹ Moses lalu ngedarka tungkat iya, lalu malu batu nya dua kali ngena tungkat nya. Ai lalu mayuh amat pansut ari batu nya, lalu semua orang mayuh enggau jelu sida bela ngirup magang.

¹²Tang ku TUHAN bejaku ngagai Moses seduai Aron, “Laban seduai enda manggaika diri ba Aku, lalu enda ngaku pengudus Aku di mua orang Israel, seduai enda tau nguluka sida ngagai menua ti udah diberi Aku ngagai sida.”

¹³Pekara tu nyadi di Meribah,[16] alai orang Israel ke mutap ngelaban TUHAN, endur alai Iya ke ngayanka pengudus Iya.

¹⁴Moses ngasuh bala seruan bejalai ari Kades ngagai raja menua Edom, “Tu jaku ari kaban belayan nuan, orang Israel: Nuan nemu pemerinsa ti udah ditatka kami,

¹⁵pasal aki ini kami ke bejalai ngagai menua Ejip, alai kami ke lama diau. Orang Ejip udah merinsaka kami, enggau aki ini kami,

¹⁶lalu lebuh kami nyabak ngangauka TUHAN, Iya ninga sabak kami, lalu ngasuh siku melikat nguluka kami pansut ari menua Ejip. Diatu kami udah datai di Kades, sebuah nengeri ti ba garis entara menua kita.

¹⁷Kami minta kita ngemendarka kami bejalai nengah menua kita. Kami enda nengah umai tauka kebun anggur kita, lalu kami pen enda mega ngirup ai ari telaga kita. Kami semina deka bejalai nengah jalai raya aja. [17] Kami enda limpang ke kanan tauka ke kiba, datai ke kami udah meraka menua kita.”

¹⁸Tang ku orang Edom nyaut, “Kita enda tau nengah menua kami, enggai ke kami nyerang kita.”

¹⁹Ku orang Israel bejaku ngagai iya, “Kami semina deka bejalai nengah jalai raya aja, lalu enti kami tauka jelu tupi kami bisi ngirup ai kita, kami deka mayar utai nya. Awakka kami bejalai kaki nengah menua kita, nadai lebih ari nya.”

²⁰Tang ku orang Edom bejaku ngagai sida, “Kita enda tau nengah menua kami.” Soldadu orang Edom lalu datai nyerang orang Israel.

²¹Nya meh jalai orang Edom enggai ngelakka orang Israel bejalai nengah menua sida. Orang Israel lalu nguingka diri ari sida.

²²Semua orang Israel lalu bejalai ari Kades lalu datai ba Bukit Hor.

²³Lalu ku TUHAN bejaku ngagai Moses seduai Aron ba Bukit Hor, ba garis entara menua orang Edom,

²⁴“Aron deka mati, laban iya enda tau tama ngagai menua ti udah diberi Aku ngagai orang Israel, laban seduai udah ngelaban pesan Aku di Meribah.

²⁵Bai Aron enggau anak lelaki iya Eleasar niki ngagai Bukit Hor,

²⁶lalu buka pekayan Aron ari iya ba bukit nya, lalu rasukka pekayan nya ba anak iya Eleasar. Aron deka mati ba bukit nya.”

²⁷Moses lalu ngereja nitihka asuh TUHAN. Sida niki ngagai Bukit Hor, dipeda semua orang Israel.

²⁸ Moses lalu muka pekayan Aron, lalu ngerasukka pekayan nya ba Eleasar. Aron lalu mati ba tuchung bukit nya, lalu Moses seduai Eleasar nurun ari bukit nya.

²⁹Lebuh semua orang Israel meda Aron udah mati, sida lalu ngulitka iya tiga puluh hari.