Read Iban Penyampau 22 Bible Online

Penyampau 22 - Iban bible

Penyampau 22

¹Orang Israel angkat ari endur nya lalu nirika kem sida ba emperan menua Moap, tunga ke timur Sungai Jordan, di seberai Jeriko.

²Lebuh Balak anak Sipur, ti nyadi raja orang Moap, ninga pasal utai ti udah dikereja orang Israel ngagai orang Amor, enggau pasal pemayuh tubuh orang Israel,

³iya enggau semua nembiak iya lalu balat amat takut.

⁴Orang Moap lalu bejaku enggau bala tuai orang Midian, “Enda lama da agi bala orang tu deka ngerusak semua utai ti ngelingi kitai, indah-indah baka sapi ti ngulam ba padang.” Nya alai Raja Balak

⁵ lalu ngasuh seruan iya madahka Balaam anak Beor, ti diau di Petor semak Sungai Eupratis di menua Amaw. Baka tu ku pesan ti dibai sida ari Balak: “Aku madahka ngagai nuan: siti bansa udah datai ari menua Ejip. Bansa orang nya nyau ngachir di semua endur, lalu nguji ngerampas menua kami.

⁶Sida iya mayuh agi tubuh ari kami. Nya alai, aku minta nuan datai, lalu nyumpah sida ke aku. Nyangka ukur kami ulih ngalahka sida lebuh sida udah kena sumpah, lalu muru sida ari menua kami. Aku nemu, lebuh nuan merekatka orang, orang nya bulih berekat, lalu lebuh nuan nyumpah orang, orang nya ditinggang sumpah.”

⁷Nya alai tuai orang Moap enggau tuai orang Midian mai upah kena meli jaku sumpah nya, mansang ngagai Balaam, lalu meri pesan Balak ngagai iya.

⁸Ku Balaam bejaku enggau sida, “Aku minta kita bemalam ditu malam tu. Pagila baru aku madahka utai ti dipadahka TUHAN ngagai aku.” Nya alai bala tuai orang Moap lalu bemalam enggau Balaam.

⁹Allah Taala datai ngagai Balaam lalu nanya iya, “Sapa orang nya ke bemalam enggau nuan?”

¹⁰Disaut Balaam, “Raja Balak orang Moap udah ngasuh sida madahka ngagai aku

¹¹pasal siti bansa ti udah datai ari menua Ejip, lalu udah ngachir di serata menua iya. Iya minta aku nyumpah orang nya, ngambika iya ulih ngelaban sida, lalu muru sida ari menua iya.”

¹²Ku Allah Taala bejaku enggau Balaam, “Anang mupuk enggau sida, lalu anang nyumpah orang Israel, laban Aku udah merekatka sida.”

¹³Pagi hari siti Balaam dani lalu bejaku ngagai bala seruan Balak, “Pulai meh kita. TUHAN enda ngasuh aku mupuk enggau kita.”

¹⁴Nya alai sida pulai ngagai Balak, lalu madahka pasal Balaam ke enggai enggau sida.

¹⁵Udah nya Balak lalu ngasuh mayuh agi bala tuai bansa, ti tinggi agi pangkat ari sida ke dulu, betemu enggau Balaam.

¹⁶Sida mansang ngagai Balaam, lalu meri pesan tu ari Balak, “Anang enda datai!

¹⁷Aku deka meri nuan upah ti besai, lalu ngereja sebarang utai ti dipinta nuan. Datai kitu, lalu sumpah orang nya ke aku.”

¹⁸Tang disaut Balaam, “Enti sema Balak meri aku semua pirak enggau emas dalam istana iya, enggai meh aku ngelaban pesan TUHAN Allah Taala aku. Indah ba pekara ti pemadu mit deh aku enggai.

¹⁹Tang aku minta kita bemalam ditu, baka sida ke dulu, ngambika aku tau nemu enti TUHAN bisi utai bukai ti deka dipadahka Iya ngagai aku.”

²⁰Malam nya Allah Taala datai ngagai Balaam, lalu bejaku, “Enti bala orang tu datai laban sida minta nuan mupuk enggau sida, sedia meh nuan, tang nuan semina ngereja utai ti diasuh Aku.”

²¹Nya alai, pagi hari siti Balaam nyendiaka keledai iya, lalu mupuk enggau bala tuai orang Moap.

²²Tang Allah Taala ringat laban Balaam mupuk enggau sida, lalu lebuh Balaam benung mupuk ngena keledai iya, disempulang dua iku orang gaji iya, siku melikat TUHAN bediri ba tengah jalai raya nya, lalu mempang iya.

²³Lebuh keledai Balaam meda melikat nya bediri dia megai pedang, iya limpang ari jalai raya nya, lalu nguing ngagai padang. Balaam malu keledai iya, lalu nguingka keledai nya pulai baru ngagai jalai raya.

²⁴Udah nya, melikat nya lalu bediri ba jalai ti sempit, ba entara dua belah kebun anggur, ti bisi dinding batu ari sepiak-sepiak.

²⁵Lebuh keledai nya meda melikat nya, iya lalu bejalai ngembing dinding batu nya, lalu ngempitka kaki Balaam ngagai dinding nya. Balaam lalu malu keledai nya baru.

²⁶Udah nya, melikat nya bejalai dulu baru lalu bediri ba endur ti sempit, ti nadai alai begelih.

²⁷Nyadi sekali tu, lebuh keledai nya meda melikat nya, iya gali. Balaam ringat, lalu belabuh malu keledai nya ngena tungkat iya.

²⁸Udah nya TUHAN lalu meri keledai nya kuasa bejaku, lalu ku keledai nya bejaku ngagai Balaam, “Nama utai ti udah dikereja aku ba nuan, datai ke nuan nyau malu aku tiga kali?”

²⁹Ku Balaam nyaut keledai nya, “Laban nuan udah ngemelika aku! Enti sema aku bisi pedang, aku tetap deka munuh nuan.”

³⁰Ku keledai nya nyaut, “Kati aku tu ukai keledai ti ditepan nuan seumur idup? Kati aku bisi udah kala ngaga nuan baka tu suba?” “Nadai kala,” ku Balaam nyaut.

³¹Udah nya, TUHAN ngasuh Balaam meda melikat ke bediri dia megai pedang iya. Balaam lalu nyungkurka diri ke tanah.

³²Melikat nya lalu nanya Balaam, “Nama kebuah nuan malu keledai nuan tiga kali baka nya? Aku datai laban aku deka mempang jalai nuan, laban nuan enda tau kin. [23]

³³Tang keledai nuan ulih meda aku, lalu limpang ari jalai raya tiga kali. Enti iya enda limpang, aku tetap udah munuh nuan, tang enda munuh keledai nya.”

³⁴Disaut Balaam, “Aku udah bedosa. Aku enda nemu nuan bisi bediri ba jalai raya deka ngelaban aku. Tang enti nuan ngumbai aku salah ketegal aku udah mupuk, pulai meh aku.”

³⁵Tang ku melikat nya bejaku, “Mupuk meh nuan enggau sida, tang nuan semina nyebut utai ti diasuh aku sebut nuan.” Nya alai Balaam mupuk enggau sida.

³⁶Lebuh Balak ninga Balaam nyau deka datai, iya mansang ngambat iya di Ar, nengeri ti ba tebing Sungai Arnon, ba entara menua enggau Moap.

³⁷Ku Balak bejaku enggau Balaam, “Nama kebuah nuan enda datai lebuh aku mesanka nuan terubah iya? Kati nuan ngumbai aku enda ulih ngupah nuan?”

³⁸Disaut Balaam, “Diatu aku udah datai, ukai enda? Tang nama kuasa aku? Aku semina ulih nyebut utai ti diasuh Allah Taala sebut aku.”

³⁹Nya alai Balaam bejalai enggau Balak ngagai nengeri Husot.

⁴⁰Dia Balak lalu nyayat jelu sapi enggau bedus, lalu meri sekeda dagin jelu nya ngagai Balaam, enggau ngagai bala tuai ke bejalai enggau iya.

⁴¹Pagi hari siti, Balak mai Balaam mansang ngagai Bamot-baal. Ari endur nya Balaam ulih meda sebagi ari bala orang Israel.