Read Iban Penyampau 23 Bible Online

Penyampau 23 - Iban bible

Penyampau 23

¹Ku Balaam bejaku enggau Balak, “Gaga tujuh iti alta ditu ke aku, lalu bai ngagai aku tujuh iku sapi ti lelaki, enggau tujuh iku bedus ti lelaki.”

²Balak lalu ngereja utai ti diasuh Balaam gaga iya. Iya enggau Balaam lalu nyerahka siku sapi ti lelaki enggau siku bedus ti lelaki ba siti-siti alta nya.

³Udah nya Balaam bejaku enggau Balak, “Bediri nuan ditu ngimbai piring tunu nuan tu. Aku deka bejalai kebukai, deka nemu enti TUHAN deka, tauka enggai betemu enggau aku. Aku deka madahka ngagai nuan utai ti dipandangka Iya ngagai aku.” Balaam lalu bejalai kediri ngagai tuchung bukit sigi,

⁴lalu Allah Taala betemu enggau iya. Ku Balaam bejaku enggau Allah Taala, “Aku udah ngaga tujuh iti alta, lalu udah meri siku sapi ti lelaki enggau siku bedus ti lelaki ba genap iti alta nya.”

⁵TUHAN lalu madahka ngagai Balaam utai ti patut disebut iya, lalu ngasuh Balaam pulai baru ngagai Balak, lalu meri pesan TUHAN ngagai iya.

⁶Balaam lalu pulai, lalu nemu Balak mengkang bediri ngimbai piring tunu iya, sama enggau semua tuai orang Moap.

⁷Balaam lalu nyebut jaku ti benabi tu: “Balak, raja orang Moap udah mai aku Ari Siria, ari bukit ti di timur. ‘Datai lalu bejaku enggau aku,’ ku iya bejaku. ‘Sumpah orang Israel.’

⁸Baka ni ku aku nyumpah utai ti enda disumpah Allah Taala, Tauka bejakuka pasal ukum, enti TUHAN apin bejakuka pasal ukum?

⁹Ari tuchung bukit ti tinggi, aku ulih meda sida. Aku ulih nengkilaka sida ari munggu. Sida tu bansa orang ke diau kediri. Sida nemu diri udah lebih agi diberekatka ari semua bansa bukai.

¹⁰Bala peturun Israel nyau ngemayuh amau. Sida enda ulih diitung. Awakka aku ngapuska seput aku baka siku nembiak Allah Taala. Awakka aku mati mai ati ti lantang baka orang ke lurus.”

¹¹Udah nya Balak lalu bejaku enggau Balaam, “Nama utai tu ti udah dikereja nuan ba aku? Aku udah mai nuan kitu, ngasuh nuan nyumpah munsuh aku, tang nuan merekatka sida.”

¹²Disaut Balaam, “Aku semina ulih nyebut utai ti diasuh TUHAN.”

¹³Udah nya Balak bejaku enggau Balaam, “Aram bejalai enggau aku ngagai siti agi endur. Nuan ulih meda orang Israel ari endur nya. Sumpah sida ke aku ari endur nya.”

¹⁴Balak lalu mai Balaam ngagai padang ti di Sopim, ti ba tuchung Bukit Pisgah. Balak mega ngaga tujuh iti alta dia, lalu nyerahka siku sapi ti lelaki enggau siku bedus ti lelaki ba genap iti alta nya.

¹⁵Ku Balaam bejaku enggau Balak, “Bediri nuan ditu ngimbai piring tunu nuan. Aku deka betemu enggau Allah Taala ba endur nyin.”

¹⁶TUHAN betemu enggau Balaam, madahka ngagai iya utai ti patut disebut iya, lalu ngasuh iya pulai baru ngagai Balak, lalu meri pesan TUHAN ngagai Balak.

¹⁷Nya alai Balaam pulai baru ngagai Balak, lalu nemu Balak mengkang bediri ngimbai piring tunu, sama enggau bala tuai orang Moap. Balak lalu nanyaka utai ti udah disebut TUHAN.

¹⁸Balaam lalu nyebut jaku ti benabi tu: “Datai kitu ke nuan Balak anak Sipor, Lalu pendingka utai ti deka disebut aku.

¹⁹Allah Taala ukai baka mensia ti bula. Iya ukai baka mensia ti ngubah runding diri. Utai ti disemaya Iya sigi deka dikereja Iya. Iya bejaku, lalu utai nya nyadi.

²⁰Aku udah diasuh merekat, Lalu lebuh Allah Taala merekat, aku enda ulih narit berekat nya pulai baru.

²¹Aku meda utai ti deka nyadi, lalu nemu orang Israel enda kena laban penusah tauka pengachau jemah ila. TUHAN Allah Taala sida bisi enggau sida. Sida madahka Iya endang Raja sida.

²²Allah Taala udah mai sida pansut ari menua Ejip. Iya belaban ngarika sida baka sapi ti lelaki ke siga.

²³Nadai puchau, tauka pengaruh ulih ngelaban orang Israel. [24] Orang deka nyebut tu pasal orang Israel, ‘Peda kita utai ti udah dikereja Allah Taala!’

²⁴Bansa Israel nya baka singa. Iya enda ngetu ngapa sebedau iya nyarik lalu makai, Sebedau iya ngirup darah utai ti dibunuh iya.”

²⁵Udah nya Balak lalu bejaku enggau Balaam, “Enti nuan enggai nyumpah orang Israel, anang ga nuan merekatka sida!”

²⁶Disaut Balaam, “Ukai enda aku udah madahka ngagai nuan, aku enda tau enda ngereja semua utai ti diasuh TUHAN?”

²⁷Ku Balak bejaku, “Aram bejalai enggau aku. Aku deka mai nuan ngagai siti agi endur. Kada enda Allah Taala deka ngasuh nuan nyumpah sida ke aku ari endur nya.”

²⁸Nya alai iya mai Balaam ngagai tuchung Bukit Peor di menua puang.

²⁹Ku Balaam bejaku enggau Balak, “Gaga tujuh iti alta ke aku ditu, lalu bai ngagai aku tujuh iku sapi ti lelaki enggau tujuh iku bedus ti lelaki.”

³⁰Balak ngereja nitihka asuh Balaam, lalu meri siku sapi ti lelaki enggau siku bedus ti lelaki ba genap iti alta nya.