Read Iban Penyampau 24 Bible Online

Penyampau 24 - Iban bible

Penyampau 24

¹Diatu baru Balaam nemu TUHAN udah ngasuh iya merekatka orang Israel. Nya alai iya enda agi begigaka tanda baka ke dikereja iya dulu ari nya. Iya nguing tunga ngagai menua puang

²lalu tepedaka orang Israel diau ba kem sida beraban-raban. Roh Allah Taala lalu bekuasa ba iya,

³lalu iya benabi: “Tu pesan Balaam anak Beor, jaku orang ke lansik meda, [25]

⁴ke ulih ninga utai ti disebut Allah Taala. Aku tegenung meda utai dalam genera, Genera ti datai ari Allah Taala ti Pemadu Bekuasa.

⁵Langkau kain orang Israel amat manah,

⁶Baka rintai batang kayu engkerema Tauka baka kebun ti ngimbai sungai, Baka kayu garu ti ditanam TUHAN Tauka baka kayu sidar ti ba tebing ai.

⁷Hari deka ujan lebat Lalu sida deka nanam benih sida ba padang ti mayuh ai. Raja sida deka kering agi ari Agak, Lalu perintah Iya deka ngerembai jauh.

⁸Allah Taala udah mai sida pansut ari menua Ejip. Iya belaban ngarika sida baka sapi ti lelaki ke siga. Sida nelan munsuh sida, Ngeredakka tulang sida, matahka panah sida.

⁹ Bansa orang nya deka nyadi baka singa ti kering. Lebuh iya tinduk, nadai orang berani ngerak iya. Barang sapa merekatka orang Israel, deka nerima berekat. Lalu barang sapa nyumpah orang Israel, deka kena sumpah.”

¹⁰Balak ngenggamka jari iya laban iya balat ringat, lalu bejaku enggau Balaam, “Aku mesanka nuan, ngasuh nuan nyumpah munsuh aku, tang nuan udah merekatka sida tiga kali.

¹¹Pulai nuan ngagai menua nuan empu! Aku udah besemaya deka ngupah nuan, tang TUHAN udah nagang nuan bulih upah nya.”

¹²Disaut Balaam, “Aku udah madahka ngagai bala seruan ti diasuh nuan betemu enggau aku,

¹³enti sema nuan meri aku semua pirak enggau emas ari istana nuan, enda meh aku ulih ngelaban pesan TUHAN lalu ngereja utai nitihka peneka ati aku empu. Aku semina deka nyebut utai ti diasuh TUHAN.”

¹⁴Ku Balaam bejaku enggau Balak, “Aku diatu deka mulaika diri ngagai bala aku empu, tang sebedau aku mupuk, aku deka meri nuan jaku tangkan pasal utai ti deka dikereja orang Israel ngagai bala nembiak nuan jemah ila.”

¹⁵Balaam lalu benabi munyi tu: “Pesan ari Balaam anak Beor, Jaku ari orang siku ke lansik meda,[26]

¹⁶Ke ulih ninga utai ti disebut Allah Taala Lalu nyambut penemu ti datai ari Iya ti Pemadu Tinggi. Aku tegenung meda utai dalam genera Genera ti datai ari Allah Taala ti Pemadu Bekuasa.

¹⁷Aku ninjau ngagai maya ti jemah ila, Lalu aku tepedaka bansa orang Israel. Siku raja, ke baka bintang ti terang, deka angkat ari bansa orang nya. Iya deka datai ari bansa orang Israel baka bintang ti terebai. Iya deka nyerang bala tuai orang Moap Lalu ngalahka semua peturun Set. [27]

¹⁸Iya deka ngalahka munsuh iya di Edom Lalu ngaga menua sida nyadika pesaka iya empu, Lebuh orang Israel majak menang.

¹⁹Orang Israel deka ngindik sida Lalu ngeluska sida ke agi idup.”

²⁰Udah nya, dalam genera iya Balaam tepedaka orang Amalek, lalu iya benabi munyi tu: “Orang Amalek tu bansa ti pemadu kering ari semua bansa, Tang ba pengujung iya, sida deka lus belama iya.”

²¹Dalam genera iya, Balaam tepedaka bansa Ken, lalu iya benabi munyi tu: “Endur alai nuan diau endang likun, Ngelikun sarang ti digaga tinggi ba tingkah batu,

²²Tang kita bansa Ken deka dirusak Lebuh orang Asiria ngaga kita nyadi orang tangkap sida.” [28]

²³Balaam lalu benabi munyi tu: “Bala sapa nya ke begempuru di utara? [29]

²⁴Bala orang ke nyerang deka belayar ari pulau Saiprus. Sida deka ngalahka menua Asiria enggau menua Eber, Tang sida, deka mega abis mati belama iya.”

²⁵Udah nya Balaam besikap lalu pulai ngagai menua iya empu. Balak pen angkat lalu mulaika diri.