Read Iban Penyampau 25 Bible Online

Penyampau 25 - Iban bible

Penyampau 25

¹Lebuh orang Israel agi diau ba kem sida ba Emperan Akasia, sida ke lelaki belabuh beleman enggau indu bansa Moap ti diau dia.

²Sida indu tu ngambi sida ngabang ngagai gawai miring, alai petara orang Moap ke disembah. Orang Israel makai pemakai sereta nyembah petara

³Baal di Peor. Nya alai TUHAN ringat ngagai sida

⁴lalu nyebut ngagai Moses, “Tangkap semua orang Israel ti udah nguluka orang ngereja utai tu, lalu titihka jaku Aku. Bunuh sida lebuh siang hari.[30] Nya baru Aku enda agi ringat ngagai orang Israel.”

⁵Ku Moses bejaku enggau bala pemesai, “Genap iku kita enda tau enda munuh semua lelaki ari raban bansa kita empu ti udah nyembah Baal di Peor.”

⁶Nyadi siku lelaki orang Israel bisi mai siku indu bansa Midian ngagai langkau kain iya, dipeda Moses enggau bala orang Israel, lebuh sida benung ngulit ba penama ngagai Langkau Kain TUHAN.

⁷Lebuh Pinehas anak Eleasar, uchu Imam Aron, meda nya, iya lalu angkat ninggalka bala mayuh. Iya mai sangkuh,

⁸nitihka lelaki enggau indu nya ngagai langkau kain lelaki nya, numbuk seduai iya ngena sangkuh nya lalu ngebuska tubuh seduai iya. Nya meh jalai penyakit ditagang ngerusak orang Israel.

⁹Tang penyakit nya udah munuh dua puluh empat ribu iku orang.

¹⁰Ku TUHAN bejaku ngagai Moses,

¹¹“Ketegal utai ti udah dikereja Pinehas, Aku enda agi ringat ngagai orang Israel. Iya enggai meda orang nyembah petara bukai tang semina Aku Siku aja. Nya kebuah Aku enda munuh sida lebuh Aku ringat.

¹²Nya alai padahka ngagai Pinehas, Aku deka ngaga siti sempekat enggau iya. Sempekat nya deka meruan belama iya.

¹³Iya enggau peturun iya deka nyadi imam belama iya, laban iya tetap ati ngagai Aku, lalu udah ngasuh dosa orang Israel diampun.”

¹⁴Nama lelaki orang Israel ke dibunuh sama enggau indu orang Midian nya Sisa Imri anak Salu, tuai bilik ke raban bansa Simeon.

¹⁵Nama indu nya Kosbi. Apai iya Sur, siku ari orang ke nyadi tuai suku raban bansa ke peturun orang Midian.

¹⁶Ku TUHAN bejaku ngagai Moses,

¹⁷“Serang orang Midian, lalu bunuh sida

¹⁸ketegal penyai ti udah dikereja sida ngagai nuan, lebuh sida nipu kita di Peor, enggau ketegal Kosbi, ti udah dibunuh lebuh maya penyakit nyerang di Peor.”