Read Iban Penyampau 27 Bible Online

Penyampau 27 - Iban bible

Penyampau 27

¹Malah, Noah, Hoklah, Milkah, enggau Tirsah nya anak indu Selopehat. Selopehat nya anak Heper, anak Giliat, anak Machir, anak Manasi, anak Josep.

²Sida bediri di mua Moses, Imam Eleasar, bala tuai bansa, enggau semua orang Israel ba penama ngagai Langkau Kain TUHAN. Ku sida,

³“Apai kami mati di menua puang, lalu iya nadai anak lelaki. Iya nadai enggau orang nitihka Korah ngelaban TUHAN. Iya mati laban dosa iya empu.

⁴Tang taja pen apai kami nadai anak lelaki, tang nama iya enda patut dipadamka ari suku raban bansa iya empu. Nya alai beri ngagai kami tanah ari bala kaban belayan apai kami.”

⁵Moses lalu mantaika pekara sida nya di mua TUHAN,

⁶lalu ku TUHAN bejaku ngagai iya,

⁷ “Utai ti dipinta bala anak indu Selopehat nya endang ngena. Beri sida tanah ari bala kaban belayan apai sida, ngambika pesaka iya diempu sida.

⁸Padahka ngagai orang Israel, lebuh lelaki mati nadai ninggalka anak lelaki, anak indu iya tau bempu pesaka iya.

⁹Enti iya nadai anak indu, sida menyadi lelaki iya tau bempu pesaka iya.

¹⁰Enti iya nadai menyadi lelaki, sida menyadi lelaki apai iya tau bempu pesaka nya.

¹¹Enti iya nadai menyadi lelaki tauka aya, nya baru kaban belayan iya ti nyempil agi tau bempu utai nya, lalu tau ngumbai utai nya reta tengkira iya empu. Orang Israel enda tau enda nitihka adat tu, munyi ti udah dipadahka Aku ti TUHAN ngagai nuan.”

¹² Ku TUHAN bejaku ngagai Moses, “Alai nuan niki ngagai Bukit Abarim, lalu tinjau menua ti deka diberi Aku ngagai orang Israel.

¹³Lebuh nuan udah ninjau menua nya, nuan deka mati, baka menyadi nuan Aron,

¹⁴laban seduai sama udah ngelaban pesan Aku di menua puang Sin. Lebuh semua orang Israel mutap ngelaban Aku di Meribah, nuan enggai ngaku Aku endang bekuasa sereta kudus di mua sida.” (Meribah nya mata ai di Kades, ti di menua puang Sin.)

¹⁵Moses lalu besampi,

¹⁶“TUHAN Allah Taala ti pun semua pengidup, aku besampi, minta Nuan ngeletak siku orang nguluka orang mayuh

¹⁷ sereta ulih nyadi tuai nguluka sida beperang, ngambika bala nembiak Nuan enda baka raban bedus ti nadai orang ngibun.”

¹⁸ Ku TUHAN bejaku ngagai Moses, “Ambi Josua anak Nun, orang ke landik ngereja pengawa, lalu engkahka jari nuan ba pala iya.

¹⁹Asuh iya bediri di mua Imam Eleasar, enggau di mua semua orang Israel, lalu padahka ngagai orang mayuh Josua deka nganti nuan.

²⁰Beri ngagai iya sekeda kuasa nuan, ngambika semua orang Israel ngasika iya.

²¹ Tang iya deka bediri di mua Imam Eleasar; lalu Imam Eleasar deka ngarika iya betanyaka ngagai Aku ngena Urim enggau Tumim,[31] bagi utai ti diasuh Aku kereja iya; lalu semua orang Israel deka nitihka atur iya lebuh sida tama pansut.”

²²Moses lalu ngereja utai ti diasuh TUHAN. Iya mai Josua lalu ngasuh iya bediri di mua Imam Eleasar, enggau di mua semua orang Israel;

²³ ngengkahka jari iya ba pala Josua, lalu meri Josua kuasa nganti iya, munyi ti dipesanka TUHAN.